1-2. Omo lia vika Yehova ua tu tangele na vuhasi vua kuivua ndzolela nga tu kuasa vakuetu?

 YEHOVA ua tangele vantu na vuhasi vua kuivua ndzolela ya ku hana ku hiana ku tambula. (Vili. 20:35) Vuno ca lomboloka ngecize ka tue kuivua ndzolela mu ku tambula ni? Houe. Mua vusunga, tu vose tue kuivua ndzolela nga tua tambula vumo vuana. Vutuhu ngoco, nga yetu tu hana vakuetu, tue kuivua ndzolela ya kama. Kali-kali Yehova ua tu tangele mu cifua caco. Omo lia vika?

² Mu ku linga Yehova ua tu tangele mu cifua caco, tue ku hasa ku vueza ku ndzolela yetu. Tu hasa ku vueza ku ndzolela yetu mu ku tonda vukovelelo vua ku kuasa vakuetu. Cili vene, Yehova ua tu tangele mu cifua ca ku komouesa!—Visa. 139:14.

3. Omo lia vika Mbimbiliya ya tumbula Yehova kupua ‘Njambi ua ndzolela’?

³ Mbimbiliya ya tu hana vusunga nguayo tu kevua ndzolela mu ku hana. Ngeci ka ce ku tu komouesa ku tantekeya nguetu Mbimbiliya ya tumbula Yehova kupua ‘Njambi ua ndzolela.’ (1 Tim. 1:11) Yehova ikeye ua ku livanga mu ku muesa vuhuanga, kaha na umo uahi ue ku hana ku tuvakana ikeye. Kapostolo Paulu ua handekele ku tuala hali Yehova nguendi: “Muli ikeye tu yoya, na ku endangana, na ku puamo.” (Vili. 17:28) Mua vusunga, “vuana vuose vua ku viuka na vuana vuose vua ku tantuluka” vua fuma kuli Yehova.—Tia. 1:17.

4. Vika vi tu kuasa ku vueza ku ndzolela yetu?

⁴ Tu vose tu tonda kuivua ndzolela ye kuiza mu ku hana. Tu hasa ku lingamo mu ku tambuluisa vuhuanga vua Yehova. (Efe. 5:1) Mu cilongesa cino, tu mona vati Yehova ue ku muesa vuhuanga, na vika tu hasa ku linga nga tu mona nguetu vakuetu  ka ve ku tu santsela omo lia vukuasi vu tue ku va hana. Vimamuna viaco vi tu kuasa ku tualelelaho ku vueza ku ndzolela ya ku kuasa vakuetu.

TAMBULUISENU VUHUANGA VUA YEHOVA

5. Viuma vika ue ku tu hana Yehova?

⁵ Vati Yehova ue ku muesa vuhuanga? Tu talenu vimueso vi na hatako. Yehova ue ku tu hana vi tua tondeka. Vutuhu halumo ka tua kele na vupite, vunoni tu vose tua kala na viuma vi tua tondeka. Ca ku muenako, Yehova ue ku tu hana via kulia, vizalo, na ndzivo. (Visa. 4:8; Mat. 6:​31-33; 1 Tim. 6:​6-8) Vuno Yehova ue ku tu hana vi tua tondeka muomu na pande ku lingamo ni? Houe. Kaha omo lia vika honi ue ku lingamo?

6. Vika tu lilongesa ku Mateu 6:​25, 26?

⁶ Yehova ue ku tu hana vi tua tondeka muomu ua tu lema. Tu hilulenu mezi a Yesu a ku Mateu 6:​25, 26. (Tandenu.) Yesu ua pangesele cimueso ca tuzila, na ku handeka nguendi: “Ka ve ku kuva, cipue ku tia, cipue ku unguluila mu visete.” Kaha naua nguendi: “Isuenu ua muilu a li na ku va lisa.” Munima yaco, Yesu ua lingile cihula nguendi: “Enu ka mua va hianene seho cikuma, ni?” Vika tu lilongesaho? Yehova ua haka seho ya kama ku vangamba vendi ku hiana tusitu. Ngeci mukemuo, nga Yehova ue ku hana tusitu viose vi va tondeka, tu hasa ku kala na vusunga nguetu netu a ka tu hana viose vi tondeka. Ngeci mua cisemi ua yala, Yehova ue ku suka vusoko vuendi omo lia cilemo.—Visa. 145:16; Mat. 6:32.

7. Vati tu hasa ku tambuluisa vuhuanga vua Yehova? (Talenu naua cikupulo.)

⁷ Ngeci mua Yehova, netu tu hasa ku kuasa vakuetu muomu tua va lema. Ca ku muenako, vuno mu tantekeya umo muanetu ni ndumbuetu a tondeka via kulia ni vuzalo? Yehova a hasa ku mi pangesa linga mu va kuase. Vangamba va Yehova va tsimana omo lia ku muesa vuhuanga nga kua soloka viyovo. Ca ku muenako, mu ntsimbu ya musongo ua COVID-19 vamuanetu na vandumbuetu va hanene vakuavo via kulia, vuzalo na viuma vikuavo via tondekele. Kaha vavengi va hanene milambu mu ku kuasa cipanga cetu mu mavu ose. Milambu yaco ya kuasele vamuanetu mu mavu ose vaze va hitile mu viyovo. Vamuanetu vaze va kuasele vakuavo vononokele cimamuna ca ku VaHevelu 13:​16, nguaco: “Ku linga ngozi na ku pangeziela kati mu vi suve:  muomu vikombelo via ngecize [vikevio] via lema Njambi.”

8. Yehova ue ku tu hana ngolo ya ku linga vika? (Filipu 2:13)

⁸ Yehova ue ku tu hana ngolo. Yehova ue kuivua ndzolela ya ku hana ngolo ku vangamba vendi va kuononoka. (Tandenu Filipu 2:13.) Vuno mua vundilaho laza Yehova a mi hane ngolo ya ku vula cimo ceseko, ni ku kolesa mu visoti? Halumo mua mu vundilaho laza a mi hane ngolo ya ku puisamo vimo viuma vi mua tondekele mu litangua. Kaha Yehova mua kumbuluile vivundilo vienu, halumo nenu mua tavele via handekele kapostolo Paulu nguendi: “Nji ku hasa viose muli uze ue ku nji kolesa.”—Filp. 4:13.

9. Vati tu hasa ku tambuluisa Yehova mu ku pangesa ngolo yetu? (Talenu naua cikupulo.)

⁹ Vutuhu ka tua tantulukile, vunoni tu hasa ku tambuluisa Yehova mu ku pangesa ngolo yetu mu ku kuasa vakuetu. Ca ku muenako, tu hasa ku kuasa vakulupe na vamuanetu va vavala mu ku va kuasa na vipanga via ha ndzivo ni ku va landelako vi va tondeka. Cikuavo naua, tu hasa ku lihana mu ku komba na ku linga vipanga vikuavo ku Ndzivo ya Vuangana. Nga tu pangesa ngolo yetu mu ku linga viuma viaco, tu ka hasa ku kuasa vamuanetu.

10. Vati tu hasa ku kaniamesa vakuetu na mezi etu?

¹⁰ Kati mu suve nguenu mezi a mue ku handeka a hasa ku kaniamesa vakuenu. Mu tantekeya umo na lingi viuma via cili u mu hasa ku kaniamesa ni? Ni halumo umo muanetu ni ndumbuetu a tondeka ku mu lembezieka? Nga mukemuo, lekenu muntu uaco nguenu mua mu haka seho. Kaha mu hasa ku mu meneka, ku mu sana ku telefone ni ku mu sonekela mukanda. Kati mu lisosomue cikuma na mezi a mu handeka. Muomu ambe mezi a andende vunoni a ku fuminina ku mutima, a hasa ku kaniamesa vamuanetu linga va tualeleleho ku kolesa.—Visi. 12:25; Efe. 4:29.

11. Vati Yehova ue ku hana mana ku vantu?

¹¹ Yehova ue ku tu hana mana. Tiango ua sonekele nguendi: “Nga umosi ha kati kenu na zela mangana, a a vundile kuli Njambi, ou ue ku hana-hana via vingi ku vose kaha kesi na mintoze.” (Tia. 1:5) Aa mezi a muesa ngecize, Yehova ke ku litulikila mana vunoni na vuhuanga vuose ue ku hanako vantu. Tiango ua handekele naua nguendi, Yehova mue ku hana mana ku vantu, ue ku lingamo ca ku hona “mintoze,” ni nguetu ue ku hana na mutima uose. Yehova ka tondo tu livue mua ku pihia nga tu mu lomba vukuasi linga a tu tuamenene. Vunoni, a tonda tu pue na ku mu lomba vukuasi.—Visi. 2:​1-6.

12. Vukovelelo vuka tua kala navuo vua ku longesa vakuetu vi tu tantekeya?

 ¹² Vati tu hasa ku tambuluisa Yehova mu ku pangesa mana etu nga tu kuasa vakuetu? (Visa. 32:8) Vangamba va Yehova va kala na vukovelelo vua vuingi vua ku longesa vakuavo vi va tantekeya. Ca ku muenako, tue ku longesa vamuanetu va vaha va kale na vutongue mu cipanga ca kuambulula. Kaha vakuluntu mu cikungulukilo ve ku longesa vakua ku kuasa vipanga na vamuanetu va ku mbatiza, va puisemo vuino vipanga viavo mu cikungulukilo. Cikuavo naua, vamuanetu va kala na vutongue mu cipanga ca ku tunga, ve ku longesa vakuavo va kala na vutongue vua vundende linga va puisemo cipanga ca ku tunga vindzivo via ku lemesela.

13. Vati tu hasa ku tambuluisa Yehova nga tu longesa vakuetu vi tu tantekeya?

¹³ Vakua ku longesa vakuavo va pande ku tambuluisa Yehova. Vulukenu nguenu, Yehova mue ku tu hana mana ue ku lingamo na vuhuanga vuose. Ngeci mukemuo, tua pande ku tambuluisa Yehova mu ku longesa vakuetu na mutima uose. Ka tua pandele ku singanieka nguetu, muntu u tuli na ku longesa tangua a ka tu hinga. Cikuavo naua, ka tua pandele ku singanieka nguetu: ‘Ange uahi ua nji longesele, ngeci mukemuo nendi na pande ku lilongesa lika liendi.’ Vangamba va Yehova ka va pandele ku kala na visinganieka viaco. Mu tue ku longesa vakuetu vi tu tantekeya, tue ku lingamo “na miono yetu” ni nguetu, na mutima uose. (1 Tes. 2:8) Kaha tua lavelela nguetu, navo “va ka hasa ku longesa [vakuavo] naua.” (2 Tim. 2:​1, 2) Nga tu longesa vakuetu, tu vose tu ka tantekeya via vingi na kuivua ndzolela hamo lika na vakuetu va tue ku longesa.

NGA VANTU KA VA TU SANTSELA

14. Vavengi ve ku linga vika nga tu va muesa vuhuanga?

¹⁴ Mu tue ku muesa vuhuanga ku vakuetu, cikuma-kuma ku vamuanetu, ve ku tu santsela. Va hasa ku tu tuma kamukanda ni ku muesa ku santsela cavo mu cifua ceka. (Kolo. 3:15) Kaha mu ve ku lingamo, ce ku tu vuisa ndzolela.

15. Vika tua pande ku vuluka nga vakuetu ka va tu muesa ku santsela?

¹⁵ Mua vusunga, vamo ka ve ku muesa ku santsela nga tua va lingila vimo. Vintsimbu vimo, ce ku soloka ngue vakuetu ka ve ku nongonona nguavo tua pangesa ntsimbu yetu, ndzili ni vimbongo linga tu hase ku va kuasa. Nga via soloka, vati tu hasa ku niunga ndzolela yetu? Tu puenu na ku vuluka mezi a ku Vilinga 20:35. Ndzolela i tue kuivua mu ku hana, ka ya hitukilile ha ku santsela ca vakuetu. Ngeci mukemuo, tu hasa ku tualelelaho ku kuasa vakuetu na ndzolela ambe nga ka va muesa ku santsela. Vika vi hasa ku tu kuasa ku lingamo? Tu hilulenu vimo vinjila.

16. Vika vi hasa ku tu kuasa ku tualelelaho ku kuasa vakuetu na ndzolela?

¹⁶ Vulukenu nguenu nga mu kuasa vakuenu, muli na ku tambuluisa Yehova. Ue ku hana viuma via cili ku vantu ambe nga ka ve ku mu santsela. (Mat. 5:​43-48) Yehova ua tu kulahesa nguendi, nga tu kuasa vakuetu ‘ca ku hona ku lavelela vimo kuli vakevo,’ kaha “cilunguiso [cetu] ci ka pua ca kama.” (Luka 6:35) Ngeci mukemuo, kati muivue vusiua nga vakuenu ka va mi santsela. Vunoni vulukenu nguenu, Yehova a ka mi lunguisa ntsimbu yose omo lia viuma vi mue ku linga mu ku kuasa vakuenu, muomu mue “ku hana na ndzolela.”—Visi. 19:17; 2 Kol. 9:7.

17. Vusunga vuka vua seho vue ku tu lingisa ku kuasa vakuetu? (Luka 14:​12-14)

 ¹⁷ Tu hasa naua ku tambuluisa Yehova mu kuononoka cimamuna ca Yesu ca ku Luka 14:​12-14. (Tandenu.) Ka ca puile vuhenge ku muesa vuhuanga kuli vaze ve ku tu muesa vuhuanga. Vunoni vati co nga tua nongonona nguetu, tue ku hana vakuetu linga navo va tu hane? Nga mukemuo, tu setekenu ku linga via handekele Yesu. Tu muesenu vuhuanga ku vantu va tu tantekeya nguetu ka va hasa ku tu hiluisila na vimo viahi. Nga tu lingamo tu kevua ndzolela muomu tuli na ku tambuluisa Yehova. Omo liaco, tu ka tualelelaho kuivua ndzolela ambe nga vakuetu ka va tu santsela ku viuma vi tua va lingila.

18. Vika ka tua pandele ku linga, kaha omo lia vika?

¹⁸ Kati mu singaniekele vakuenu viuma via ku pihia. (1 Kol. 13:7) Nga vakuetu ka ve ku tu muesa ku santsela, tu lihulenu nguetu: ‘Vuno ka va puile mpundu vakua ku santsela, ni va na suvu lika ku lingamo?’ Halumo kuli vusunga vueka vua va lingisa ku hona ku santsela. Vamo va kala na cizango ca ku muesa ku santsela, vunoni ce ku va kaluuila ku lingamo. Halumo ve kuivua ntsoni ya ku tambula vukuasi, cikuma-kuma nga va kele na ku kuasa vakuavo ku nima. Kaha nga tua lema vamuanetu na mutima uose, ka tu ka va singaniekela via ku pihia vunoni tu ka tualelelaho ku va kuasa na ndzolela.—Efe. 4:2.

19-20. Vika naua vi tu kuasa kuivua ndzolela nga tu kuasa vakuetu? (Talenu naua cikupulo.)

¹⁹ Muesenu ntsintsa. Ku tuala ha ku muesa vuhuanga, Muangana Solomone ua sonekele nguendi: “Mbila mbolo yove ku mema; muomu u ka i uana omo matangua a engi a na hiti.” (Ekel. 11:1) Aa mezi a tu longesa ngecize, vintsimbu vimo vakuetu va ka tu muesa lika ku santsela munima ya “matangua a engi.” Tu hilulenu muzimbu ua muesa vusunga vuaco.

²⁰ Miaka ya yingi kunima, mpuevo ya umo kaniungi ua ku zinguluka ua sonekele mukanda ua ku kaniamesa umo ndumbuetu ua  muha mu vusunga. Mu mukanda uaco, ua tsindikile seho ya ku tualelelaho kuononoka Yehova. Kaha munima ya miaka itanu na itatu, ndumbuetu ua kumbuluile mukanda uaco nguendi: “Nji tonda ku mi leka vati mua nji kuasele mu miaka i na hiti.” Ua tualeleleho nguendi: “Mua nji sonekelele mezi a ngozi, vunoni ka nje ku suva mukanda ua mu Mbimbiliya u mua tumbuilemo.” a Munima ya ku lombolola visoti via lihitile navio mu ku hita ca miaka, ndumbuetu ua handekele nguendi: “Vintsimbu vimo, nja tondele ku likela ku pangela Yehova. Vunoni mukanda ua mu Mbimbiliya u mua tumbuile ua nji kuasele ku tualelelaho ku kolesa.” Kaha naua nguendi: “Mu miaka itanu na itatu mukanda u mua nji sonekelele hamo lika na mukanda ua mu Mbimbiliya u mua tumbuilemo, via nji kuasele cikuma.” Aci singaniekenu ndzolela ya vuile mpuevo ya kaniungi ua ku zinguluka mua tambuile mukanda uaco munima ya “matangua a engi”! Na vuno vene, vakuetu va hasa ku tu muesa ku santsela munima ya ntsimbu ya kama.

21. Omo lia vika mu tonda ku tualelelaho ku tambuluisa vuhuanga vua Yehova?

²¹ Ngue mu tua mono, Yehova ua tu tangele na vuhasi vua kuivua ndzolela ya ku hana, ku hiana ku tambula. Tue ku livua vuino mu tue ku kuasa vamuanetu, kaha ce ku tu vuisa ndzolela mu ve ku tu santsela. Vunoni ambe nga ka va tu santsela, kasi tue kuivua ndzolela muomu tua lingi viuma via cili. Kati mu suve nguenu viose-ovio vi mu hana, “Yehova a hasa ku [mi] hia via vingi.” (2 Miz. 25:9) Mua vusunga, Yehova a ka mi lunguisa na via vingi ku hiana vi mue ku hana vakuenu. Kaha ka kuesi ndzolela ya hiana ize i tue kuivua nga Yehova na tu lunguisa. Ngeci mukemuo, tu lihakelenu kapandi ka ku tualelelaho ku tambuluisa vuhuanga vua Tatetu ua muilu.