Ntsimbu kanda tu putuke ku lilongesa, tu hasa ku lihula nguetu: ‘Vika nja lavelela ku lilongesa?’ Vunoni tua pande ku vuluka nguetu, vutuhu tu hasa ku tantekeya vi tu ka tanda, vunoni ka lombolokele ngecize ka kuesi viuma via viha via tonda ku tu longesa Yehova. Vuno vati tu hasa ku halakana vie ku tu longesa Yehova?

Vundilenu mangana. Vundilenu Yehova a mi kuase kuivuisisa via tonda mu tantekeye mu ntsimbu ino. (Tia. 1:5) Kati mu tuale lika mana ku viuma vi mu tantekeya.—Visi. 3:​5, 6.

Tavesenu ngolo ya Lizi lia Njambi mu muono uenu. “Lizi lia Njambi li li na muono.” (VaHe. 4:12) Ngeci mukemuo, Mbimbiliya i hasa ku tu longesa viuma via viha kaha ntsimbu yose i tu i tanda, i hasa ku tu kuasa mu vinjila via ku liseza-seza mu muono uetu.

Santselenu ku viuma viose vie ku pangesa Yehova linga a tu longese. Via kulia via mu lutsilielo vie ku tu hana Yehova via pua ngue “ciuano ca viuma via mazi.” (Isaya 25:6) Kati mu likele ku tanda vimpande ka mua lemene ku lilongesa. Nga mu lingamo, mu ka tambula vukuasi vua vuingi kaha mu ka viukilila mu ku lilongesa via Njambi.