1. Vika Yesu a ka linga vuovuno?

 TULI NA KU YOYELA mu ntsimbu ya kualuluka ca viuma, vuovuno Yesu a ka sompesa vantu vose ha mavu. Yesu ua handekele vika vi ka soloka ha mavu ntsimbu kanda a putuke ku sompesa. Ua hele vandongesi “citantekeyeso” ca kuiza cendi, kaha “na ku-kotoka ca mavu.” (Mat. 24:3) Vupolofeto vuaco va vu tumbula ku Mateo kapitulu 24 na 25 kaha na Mako 13 na Luka 21.

2. Vika tu simutuila mu cilongesa cino, kaha vati vi tu kuasa?

² Yesu ua tu hanene vilungula vitatu ku hitila mu cisimo ca vampanga na vampembe, vampuevo vakua mana na viheve kaha na cisimo ca vitalentu. Nkala cisimo ci tu kuasa kuivuisisa ngecize, Yesu a ka sompesa vantu kuliya na vilinga viavo. Mu cilongesa cino, tu simutuila ha visimo viaco na ku mona vika tu lilongesaho. Ha katete, tu simutuila ha cisimo ca vampanga na vampembe.

CISIMO CA VAMPANGA NA VAMPEMBE

3. Ntsimbu ika Yesu a ka sompesa vantu?

³ Kuliya na cisimo ca vampanga na vampembe, Yesu ua lomboluele ngecize a ka sompesa vantu kuliya na cifua ci ve tambuilamo muzimbu ua cili, na cifua ci ve ku kuaselamo vantsongo vendi va ku vuavesa. (Mat. 25:​31-46) Mu ntsimbu ya “lamba ya kama,” Yesu a ka sompesa vantu kupua vampanga ni vampembe ntsimbu kanda Alemangendo i putuke. (Mat. 24:21) Ngeci mua kaniungi ue ku tepesa vampanga ku vampembe, Yesu a ka tepesa vaze ve ku kuasa va ku vuavesa kuli vaze ka ve ku lingamo.

4. Kuliya na Isaya 11:​3, 4, omo lia vika tu hasa ku kala na vusunga nguetu Yesu a ka sompesa vantu na vuviuke? (Talenu naua cikupulo .)

 ⁴ Mbimbiliya nguayo, mu kupua Ngazi ya hangula Yehova, Yesu a ka sompesa vantu na vuviuke. (Tandenu Isaya 11:​3, 4.) Ue ku talesesa vuino vilinga via vantu, visinganieka, vihandeka viavo, kaha na cifua ci ve ku yoyelamo na vantsongo vendi. (Mat. 12:​36, 37; 25:40) Yesu a ka tantekeya veya va kuasele vantsongo vendi va ku vuavesa na vipanga viavo. a Imo njila ya seho ya ku va kuaselamo, yapua ku fuitangana mu cipanga ca kuambulula. Vaze ve ku va kuasa va ka va sompesa kupua “vakua vuviuke” kaha va ka tambula “muono ka ue ku hua ua ya-ye” ha mavu. (Mat. 25:46; Ku-So. 7:​16, 17) Mua vusunga cilunguiso caco capua ca cili cikuma! Kaha mu va ka tualelelaho kuononoka mu ntsimbu ya lamba ya kama na munima yaco, mazina avo a ka tualelelaho ku kala “mu mukanda ua muono.”—Ku-So. 20:15.

5. Vika tua lilongesa ku cisimo ca vampanga na vampembe, kaha veya va hasa ku tambula vukuasi ku cisimo caco?

⁵ Puenu vakua vuoloke. Cisimo ca Yesu ca vampanga na vampembe ca tsindika hali vaze va kala na lulavelelo lua ku ka yoyela ha mavu. Ve ku muesa lutsilielo mu ku kuasa vantsongo va Kilistu mu kuambulula, na kuononoka vimamuna via mukuamanda ya hangula Yesu. (Mat. 24:45) Vunoni cipue vaze va kala na lulavelelo lua ku ka yoyela muilu, navo va pande kuononoka cilungula ca kala mu cisimo ca vampanga na vampembe. Omo lia vika? Muomu Yesu ue ku mona vilinga, visinganieka, na vihandeka viavo. Cikuavo naua, navo va pande ku muesa ngecize va pua vakua vuoloke. Yesu ua tele visimo vivali via kala na vilungula via talekesa lika kuli Vakua Kilistu va ku vuavesa. Visimo viaco tu vi uana naua ku Meteo kapitulu 25. Hano honi tu simutuilenu ha cisimo ca vampuevo vakua mana na viheve.

CISIMO CA VAMPUEVO VAKUA MANA NA VIHEVE

6. Ha kati ka vampuevo likumi, vati vatanu va muesele mana? ( Mateo 25:​6-10)

⁶ Mu cisimo ca vampuevo, Yesu ua handekele via vampuevo likumi va ile na ku liuana na sandungi. (Mat. 25:​1-4) Vose va lavelelele ku kala na sandungi ku cilika ca vulo. Yesu ua tumbuile vatanu ha kati kavo nguendi, “visiname” kaha vakuavo vatanu nguendi, “vakua mana.” Vampuevo vakua mana va liviukisilile na ku vingila. Va liviukisilile ku vandamena sandungi ha ntsimbu yose-oyo ye ku hetele ambe vene mukati ka vutsiki. Cikuavo naua, vambatele vindeya na mazi a engi linga va hase ku pangesa ambe nga sandungi ue ku kotokelele. Ku lingamo va hasele ku tualelelaho ku pangesa vindeya viavo. (Tandenu Mateo 25:​6-10.) Kaha mua hetele sandungi, vampuevo vakua mana va ile nendi ku cilika ca vulo. Na vuno vene, Vakua Kilistu va ku vuavesa vaze va liviukisila mu ku tualelelaho ku vingila na kupua vakua vuoloke na ha kuiza ca Kilistu, va ka tambula cilunguiso ca kuli pandakana na sandungi Yesu mu vuangana vuendi vua muilu. b (Ku-So. 7:​1-3) Amba vampuevo va viheve co?

7. Vika via solokelele vampuevo va viheve, kaha omo lia vika?

⁷ Mua hetele sandungi, vampuevo va viheve ka liviukisilile. Vindeya viavo via kele na ku zima kaha ka va kele na mazi a engi.  Mu va tantekeyele nguavo sandungi vuovuno a heta, va ile na ku landa mazi, ngeci mua hetele sandungi vakevo ku va keleko. Ha ntsimbu yaco, vampuevo “vaze va na liviukisilile lumo va kovelele hamo neni mu ciuano ca ku-lia ca vulo, kaha va sokele ku lipito.” (Mat. 25:10) Munima yaco, vampuevo va viheve mu va hilukile, va tondele ku kovela vunoni sandungi ua va lekele nguendi: “Ka nji mi izi.” (Mat. 25:​11, 12) Ua lingilemo muomu ka va liviukisilile ku vandamena sandungi mu ntsimbu ya tondekele. Vika Vakua Kilistu va ku vuavesa va hasa ku lilongesaho?

8-9. Vika vamuanetu va ku vuavesa va lilongesa ku cisimo ca vampuevo vakua mana na viheve? (Talenu naua cikupulo.)

⁸ Liviukisilenu na ku vingila. Yesu ka handekele nguendi, kue ku kele vivunga vivali via vamuanetu va ku vuavesa, cimo civunga ce ku liviukisilile mu ku vandamena ku kotoka ca mavu, kaha civunga cikuavo co kuahi, houe. Vunoni ua kele na ku lombolola vika vie ku solokelele Vakua Kilistu va ku vuavesa nga ka va tualelelaho kuononoka na ku ntsongo. Nga ka va hasele naua ku tambula cilunguiso cavo. (Yoa. 14:​3, 4) Mua vusunga, nga ce ku puile ca vusiua! Ngeci mukemuo, ambe nga tua kala na lulavelelo lua ku ka yoyela muilu ni ha mavu, tu vose tua pande ku tuala mana ku cilungula ca ku cisimo ca vampuevo vakua mana na viheve. Cikuavo naua, tu vose tua pande ku liviukisila na ku tualelelaho na ku ntsongo.—Mat. 24:13.

⁹ Munima ya kuta cisimo ca vampuevo vakua mana na viheve mu ku tsinidika seho ya ku vingila, Yesu ua tele naua cisimo ca vitalentu. Cisimo caco ca tsindika ha seho ya kupua vakua ku fuitangana.

CISIMO CA VITALENTU

10. Vati vakuamanda vavali vononokele? (Mateu 25:​19-23)

¹⁰ Mu cisimo ca vitalentu, Yesu ua handekele via vakuamanda vavali vononokele muangana uavo kaha umo ka lingilemo. (Mat. 25:​14-18) Vakuamanda vavali vononokele muomu  va fuitanganene mu ku vueza vimbongo via muananga uavo. Ntsimbu kanda aye vungezi ua va hele vitalentu ni nguetu vimbongo via vingi. Vakuamanda vavali va kuononoka, va puile vakua ku fuitangana kaha va pangesele vimbongo na mana. Vika vie zilemo? Mua hilukile muangana uavo, ua uanene vimbongo via vingi ku hiana via va sezelele. Ngeci ua va sangalele kaha va kovelele “mu ndzolela ya muangana [uavo].” (Tandenu Mateo 25:​19-23.) Amba mukuamanda ua mu citatu co? Vika ua lingile na vimbongo via mu hanene muangana uendi?

11. Vika via solokelele mukuamanda ua puile “cilenda” kaha omo lia vika?

¹¹ Mukuamanda ua mu citatu ua tambuile talentu imo lika vunoni ua puile “cilenda.” Muangana uendi ua lavelele a pangese talentu yaco na mana, vunoni ua i sitikile mu livu. Kaha mua hilukile muangana, mukuamanda uaco ua mu hiluisilile lika talentu imo ize ya mu hanene. Mukuamanda uaco ka kele na vilinga via cili. Mu cihela ca ku lomba kuecela omo lia ku hona ku vueza vimbongo vi va mu hanene, ua sanene muangana uendi nguendi “muntu ua mukalu.” Mukuamanda uaco ka va mu tavele kuli muangana uendi. Kaha va mu tambuile talentu na ku mu sekula ku ndzivo ya muangana uendi.—Mat. 25:​24, 26-30.

12. Vakuamanda vavali va kuononoka vemanena veya lelo lino?

¹² Vakuamanda vavali va kuononoka vemanena Vakua Kilistu va ku vuavesa. Kaha Muangana Yesu ua va lania va kovele “mu ndzolela ya muangana [uavo.]” Ve ku tambula cilunguiso cavo ca muilu ni nguetu, cisangukilo ca katete. (Mat. 25:​21, 23; Ku-So. 20:5b) Cikuavo naua, lungano lua ku pihia lua mukuamanda ua cilenda, lua pua cilungula ku Vakua Kilistu va ku vuavesa. Mu njila ika?

13-14. Vika Vakua Kilistu va ku vuavesa va lilongesa ku cisimo ca vitalentu? (Talenu naua cikupulo.)

¹³ Puenu vakua ku fuitangana. Mu cisimo ca vitalentu na cisimo ca vampuevo vakua mana na viheve, Yesu ka handekele nguendi Vakua Kilistu va ku vuavesa ve ku puile vilenda. Vunoni, ua kele na ku lombolola vika vie ku solokele nga va hilukila munima. Nga ka va va  ‘sanene na ku va hangula,’ kaha naua nga ka va va tavesele ku kovela mu vuangana vua muilu.—2 Pet. 1:10.

¹⁴ Cisimo ca tele Yesu, ku tuala ha vampuevo vakua mana na viheve kaha na cisimo ca vitalentu, ca muesa ha toma ngecize, Vakua Kilistu va ku vuavesa vose va pande ku liviukisila na ku vingila kaha na kupua vakua ku fuitangana. Vuno Yesu ua hanene naua vilungula vikuavo ku Vakua Kilistu va ku vuavesa ni? Eyo, tu hasa ku uana cilungula caco ku mezi a handekele ku Mateo 24:​40,41.

‘VEYA VA KAYA NENDI’?

15-16. Vati Mateo 24:​40, 41, ye ku kuasa Vakua Kilistu va ku vuavesa ku mona seho ya ku tualelelaho ku vingila?

¹⁵ Ntsimbu kanda Yesu ate visimo vitatu vi tu na mono, ua tumbuile ku sompesa ca ku manusuila ca Vakua Kilistu va ku vuavesa cize, ce ku muesele veya ue ku tavele. Yesu ua handekele via vamala vavali vakua ku pangela mu lihia na vampuevo vavali vakua kutua vunga. Casolokele ngue vamala vavali vakele na ku linga cipanga cimo lika kaha vampuevo naua casolokele ngue vakele na ku linga cipanga cimo lika. Vunoni Yesu ua handekele nguendi: “Umo va ya neni, mukuavo va seza.” (Tandenu Mateo 24:​40, 41.) Munima yaco Yesu ua mamuine vakua ku mu kava nguendi: “Vingilenu, muomu ka mu tantekeya ola ika Muangana uenu a keza.” (Mat. 24:42) Vikevio via handekele naua Yesu munima ya kuta cisimo ca vampuevo vakua mana na viheve. (Mat. 25:13) Vuno vimamuna viaco via litombola ni? Cisoloka ngue via pua vimo lika vene. Vakua Kilistu va ku vuavesa va kuononoka, vakevo lika va ka kovela mu Vuangana muilu.—Yoa. 14:3.

¹⁶ Vingilenu. Vakua Kilistu va ku vuavesa nga ka va tualelelaho ku vingila ka va ka va kungulula hamo lika na vaze “va va hanguile.” (Mat. 24:31) Eci cilungula ca kuata ku vangamba va Njambi vose ambe nga va kala na lulavelelo lua ku ka yoyela muilu ni ha mavu, va pande ku vingila na ku tualelelaho kupua vakua kuononoka.

17. Omo lia vika ka tua pandele ku lisosomua nga Yehova a hangula ku vuavesa vamo vamuanetu ku matangua etu?

¹⁷ Tu tantekeya vuino Yehova, ngeci mukemuo tua kulahela nguetu viose vieku linga via pua via cili. Ka tue ku lisosomua nga Yehova a hangula ku vuavesa vamo kuno ku matangua etu. c Tu tantekeya via handekele Yesu ku tuala ha vakua kupangela mu lihia lia viniu ku ola ya mu likumi na imo. (Mat. 20:​1-16) Ambe vene vaze vezile mu kupanga mu lihia munima yaco, va tambuile fueto imo lika na vakuavo va livangele. Vakua Kilistu va ku vuavesa ntsimbu yose-oyo i ve ku va hangula, va ka tambula fueto yavo nga va tualelelaho kupua vakua kuononoka.

ONONOKENU VILUNGULA

18-19. Vika tua lilongesa mu visimo via tele Yesu?

¹⁸ Vika tua lilongesa? Kuli vaze va kala na lulavelelo lua ku ka yoyela ha mavu, cisimo ca vampanga na vampembe ca tsindika seho ya kala ha ku tualelelaho kupua vakua vuoloke na kuononoka Yehova mu ntsimbu ino kaha na mu lamba ya kama. Ku lutue Yesu a ka hana “muono ka ue ku hua ua ya-ye,” ku vakua kuononoka.—Mat. 25:46.

¹⁹ Cikuavo naua tua hilula visimo vivali via kala na vilungula vi va talekesa ku Vakua Kilistu va ku vuavesa. Mu cisimo ca vampuevo vakua mana na viheve, vatanu ha kati kavo va muesele mana. Va liviukisilile na ku vingila  mu ku vandamena sandungi mu ntsimbu ya tondekele. Vunoni vaze vampuevo va viheve ka va liviukisilile, ngeci mukemuo sandungi ka va tavesele va kale ku cilika cendi ca vulo. Na vuno vene, netu tua pande ku liviukisila na ku tualelelaho ku vandamena ntsimbu yose-oyo i tondeka noho hali ka nehela Yesu ku kotoka ca mavu. Mu cisimo ca vitalentu, tua simutuila via vakuamanda vavali va puile vakua ku fuitangana. Va fuitanganene muangana uavo ngeci va mu ile ku mutima. Vunoni mukuamanda ua cilenda va mu vianene. Vika tu hasa ku lilongesaho? Tua pande ku tualelelaho ku fuitangana mu cipanga ca Yehova na ku ntsongo. Kaha mu ku manusuila, tua lilongesa nguetu Vakua Kilistu va ku vuavesa va pande ku tualelelaho ku vingila linga va ka tambule cilunguiso cavo muilu. Tua lavelela cikuma ntsimbu i va ka va ‘kungulula’ hamo lika na Yesu muilu. Kaha munima ya ndzita ya Alemangendo, va kapua ntsombolua ya Yesu.—2 Tes. 2:1; Ku-So. 19:9.

20. Vika Yehova a ka lingila vaze ve kuononoka vilungula Viendi?

²⁰ Ntsimbu ya ku sompesa ili mu hiehi, vunoni ka tua pandele kuivua vuoma. Nga tu tualelelaho kuononoka, Tatetu ua cilemo a ka tu hana “ngolo ya ku hiana cikumakuma” linga tu ka hase ku “mana ku meso a Muana muntu.” (2 Kol. 4:7; Luka 21:36) Ambe nga tua kala na lulavelelo lua ku ka yoyela muilu ni ha mavu, nga tuononoka vilungula via ku visimo via tele Yesu, tu ka vuisa Tatetu ndzolela. Kaha omo lia ngozi ya Yehova, ‘mazina etu va ka a soneka mu livulu lia muono.’—Ndan. 12:1; Ku-So. 3:5.