1-2. Vika vie ku lingisa vangamba va Njambi kupua vakua ndzolela? (Tiango 1:​22-25)

 YEHOVA na Yesu va tonda tupue vakua ndzolela. Kaha ku Visamo 119:2 Mbimbiliya nguayo: “Va vezika vaze va niunga vukaleho vueni, vaze va mu lengeya na mutima uose.” Kaha Yesu ua handekele naua nguendi: “Va vezika vaze vevua lizi lia Njambi na ku li niunga.”—Luka 11:28.

² Vangamba va Yehova va pua vantu va ndzolela. Omo lia vika? Muomu kua kala viuma via vingi vie ku tu lingisa ku yoya mu ndzolela, vimo viaco via pua ku tanda Lizi lia Njambi tangua na tangua, kaha na ku pangesa vi tue ku lilongesa.—Tandenu Tiango 1:​22-25.

3. Vivezikiso vika tue ku tambula mu tue ku puisamo vi tue ku tanda mu Lizi lia Njambi?

³ Tue ku tambula vivezikiso mu vinjila via vingi mu tue kupua vakua “ku linga lizi.” Ca ku muenako, tue ku vuisa Yehova ndzolela mu tue ku puisamo vi tue ku lilongesa mu Lizi lia Njambi, kaha vie ku tu vuisa ndzolela. (Ekel. 12:13) Cikuavo naua, tue ku yoya vuino na vavusoko vetu kaha na vamuanetu mu cikungulukilo. Halumo mua limuena vusunga vuaco mu muono uenu. Kaha naua tue ku liniunga ku visoti vi ve ku hita vaze ka ve kuononoka masiko a Yehova. Mua vusunga, netu tua tava via handekele Muangana Ndaviti munima ya ku tumbula lisiko na ku sompesa ca Yehova. Ua manusuile nguendi: “Mu ku vi niunga ku li cilunguiso ca kama.”—Visa. 19:​7-11.

4. Omo lia vika ka ce kupua ca casi ku pangesa vi tue ku lilongesa mu Lizi lia Njambi?

 ⁴ Mua vusunga, ka ce kupua ca casi ku tanda na ku pangesa vi tue ku tanda mu Lizi lia Njambi. Vutuhu tua kala na via vingi via ku linga, vunoni tua pande ku uana ntsimbu ya ku tanda na ku lilongesa Mbimbiliya linga tuivuisise via tonda Yehova tu vi linge. Tu hilulelu viuma vi tu kuasa ku tanda Mbimbiliya tangua na tangua. Kaha tu hilula naua vika vi tu kuasa ku singanieka ha viuma vi tue ku tanda na ku tonda vinjila mua ku vi pangeselamo mu muono uetu.

UANENU NTSIMBU YA KU TANDA LIZI LIA NJAMBI

5. Viteli vika vie ku tulia ntsimbu?

⁵ Cingi ca vangamba va Yehova va kala na via vingi via ku linga mu muono. Tue ku pangesa ntsimbu ya yingi mu ku puisamo viteli via mu lutsilielo. Ca ku muenako, cingi cetu tue ku panga linga tu uane via ku lisuka navio hamo lika na vusoko vuetu. (1 Tim. 5:8) Cingi ca Vakua Kilistu ve ku niunga visemi vavo va ku vavala ni vakulupe. Vunoni tu vose tua pande ku niunga cihindu cetu, kaha viose evi vie ku tondeka ntsimbu. Cikuavo naua, tua kala na viteli via seho vi tue ku linga mu cikungulukilo, ngeci mua kuambulula muzimbu ua cili. Vutuhu mua kala na viteli via vingi, vati mu hasa ku uana ntsimbu ya ku tanda Mbimbiliya matangua ose, ku hilula na ku pangesa vi mue ku lilongesa?

6. Vati mu hasa ku uana ntsimbu ya ku tanda Mbimbiliya? (Talenu naua cikupulo.)

⁶ Ku tanda Mbimbiliya via pua viuma vize “via hiana ku viuka,” ni nguetu via seho kuli yetu Vakua Kilistu, ngeci mukemuo tua pande ku uana ntsimbu ya ku i tanda. (Filp. 1:10) Ku tuala ha muntu ua ku vezika, mukua visamo ua handekele nguendi: “Vunoni a viukilila lisiko lia Yehova; kaha a yongola lisiko lieni mutana na vutsiki.” (Visa. 1:​1, 2) Eci ca muesa ha toma ngecize tua pande ku uana ntsimbu linga tu tande Mbimbiliya. Vuno ntsimbu ika ya pua ya cili ku tanda Mbimbiliya? Muntu ku muntu a hasa ku litumbikila ntsimbu. Vunoni ca  seho ku litumbikila ntsimbu i tu kuasa ku tanda Mbimbiliya tangua na tangua. Muanetu Victor nguendi: “Nja lema ku tanda Mbimbiliya ku cimene, muomu ha ntsimbu yaco ka kuesi via vingi via ku tanganesa. Vutuhu ka nja lemene ku livanga ku hinduka, vunoni mu nje ku lingamo, nje ku hasa ku tuala mana ku viuma vi nje ku lilongesa.” Vuno nenu vie ku mi solokela ni? Lihulenu nguenu: ‘Ntsimbu ika ya pua ya cili kuli yange ku tanda Mbimbiliya?’

PUENU NA KU HILULA VI MUE KU TANDA

7-8. Vika vi hasa ku tu lingisa ku hona ku uana vukuasi ku viuma vi tue ku tanda? Hanenu cimueso.

⁷ Mua vusunga, halumo tu hasa ku tanda mizimbu ya yingi ca ku hona ku ihilula mpundu. Vuno mua tandaho imo mizimbu kaha munima yaco ka mua hasele ku vuluka vi mua tandele ni? Mua vusunga, tu vose vie ku tu solokela. Ca vusiua, vi hasa ku soloka nga tu tanda Mbimbiliya. Ca ku muenako, tu hasa ku kala na vutumbe vua ku tanda vamo tupitulu tangua na tangua, kaha capua ca cili ku lingamo. Cili vene, tu vose tua pande ku litumbikila vizango kaha na ku lihakela kapandi ka ku vi puisamo. (1 Kol. 9:26) Vunoni nga tu tonda ku uana vukuasi vua vuingi mu Lizi lia Njambi, tua pande ku linga vikuavo naua kati ku tanda lika.

⁸ Aci singaniekenu cimueso ca niondzi, ye ku kuasa vintemo ku kola vuino. Vunoni nga niondzi i noka mua kama mu ntsimbu ya indende, livu lie ku zula vunoni mema ka e kuya kuintsi kaha vintemo ka vie ku kola vuino. Vunoni nga i noka kavundende mema e kuya kuintsi kaha eku kuasa vintemo ku kola vuino. Na vuno vene, nga tu tanda Mbimbiliya vuasi-vuasi, ka tu ka hasa ku uana vukuasi ku viuma vi tuli na ku tanda. Vunoni nga tu tanda na civando na ku hilulaho, mua vusunga tu ka uana vukuasi ku viuma vi tuli na ku lilongesa.—Tia. 1:24.

9. Vika tua pande ku linga, nga tu nongonona nguetu tue ku tanda Mbimbiliya mu vuasi-vuasi?

⁹ Vuno vintsimbu vimo mue ku tanda Mbimbiliya mu vuasi-vuasi ni? Nga mukemuo, vika mua pande ku linga? Tandenu na civando  linga mu hase ku hilula vi muli na ku tanda. Ni ku uana ntsimbu ya ku hilula munima ya ku tanda, kaha kati ca cikalu ku lingamo. Ni halumo mu hasa ku pangesa ntsimbu ya kama ya ku lilongesa linga mu hase ku hilula ha viuma vi muli na ku lilongesa. Cikuavo naua, mu hasa ku tanda vimo vinimbu kaha na ku pangesa ntsimbu ya lisupuko linga mu hilule ha vinimbu viaco. Muanetu Victor nguendi: “Nje ku tanda Mbimbiliya mu ntsimbu ya indende, halumo kapitulu umo lika. Mu ku linga nje ku tanda ku cimene, ngeci nje ku hasa ku hilula ha viuma vi nje ku tanda mu ku hita ca litangua.” Vunoni njila yose-oyo imu pangesa, capua ca seho ku tanda na civando linga mu hase ku hilula ha viuma vi muli na ku tanda.—Visa. 119:97; talenu cikasa “ Vihula vi mi Kuasa ku Hilula.”

10. Hanenu cimueso ca vati mu hasa ku hilula linga mu pangese vi mue ku lilongesa. (1 Tesalonika 5:​17, 18)

¹⁰ Omo mu tanda vinimbu via mu Mbimbiliya, singaniekenu vati mu hasa ku pangesa vinimbu viaco. Omo mu tanda, lihulenu nguenu: ‘Vati nji hasa ku pangesa ou muzimbu mu ntsimbu ino ni ku lutue?’ Ca ku muenako, singaniekenu nga mu tanda 1 Tesalonika 5:​17, 18. (Tandenu.) Kaha munima ya ku tanda vinimbu viaco, hilulenu ku lova ca vivundilo na lungahi mue ku vundila. Cikuavo naua, hilulenu ha viuma vi mu hasa ku muesa ku santsela. Halumo mu hasa ku hangula viuma vitatu vi mu hasa ku santsela Yehova. Ambe nga mu pangesa ntsimbu ya indende mu ku hilula ha viuma vi mua lilongesa mu Lizi lia Njambi, vunoni vi ka mi kuasa kuivuisisa na ku vi pangesa. Mua vusunga, nga tangua na tangua mu pua na ku pangesa vi mue ku tanda mu Mbimbiliya, mu ku hita ca ntsimbu mu ka pua ngamba ya Yehova ua kuhia mu lutsilielo. Vatico nga mu mona nguenu kuli via vingi vi mua pande ku pangelaho?

LIHAKELENU VIZANGO VI MU HASA KU PUISAMO

11. Omo lia vika mu hasa kuivua vusiua? Hanenu cimueso.

¹¹ Vintsimbu vimo halumo mu hasa kuivua vusiua mu ku tanda Mbimbiliya, muomu mu hasa ku nongonona nguenu kuli viuma via vingi vi mua pande ku pangaleho. Ca ku muenako, litangua lia ku livanga mu ku tanda Mbimbiliya mu uana cimamuna ca ku hona ku muesa kahungu. (Tia. 2:​1-8) Kaha mu mona nguenu mua kala na citanga caco, vunoni mu lihakela kapandi ka ku pangeleho. Mua vusunga, capua ca cili. Lia mu civali, mu tanda vimo vinimbu via muesa seho ya ku zangama na viuma vi mue ku handeka.  (Tia. 3:​1-12) Kaha mu nongonona nguenu, vintsimbu vimo mue ku handeka mezi eku zeyesa vakuenu, vunoni mu lihakela kapandi ka ku handeka mezi a kaniamesa vakuenu. Lia mu citatu, mu ku tanda Mbimbiliya mu uana vimamuna ku tuala ha ku hona ku likuata vusamba na mavu. (Tia. 4:​4-12) Kaha mu mona nguenu, mua pande ku zangama na viuma vi mue ku tanda, ku tala, kaha na ku halakana. Vunoni lia mu ciuana, halumo mu livua nguenu cili na ku mi kaluuila ku pangelaho.

12. Omo lia vika ka mua pandele ku hilukila munima nga kuli via vingi vi mua pande ku pangelaho? (Talenu naua litota.)

¹² Kati mu hilukile munima nga mu nongonona nguenu kuli viuma via vingi vi mua pande ku pangelaho. Muomu eci ca muesa ngecize mua pua ua ku likehesa kaha mua kala na vutumbe vua cili. Mukua ku likehesa ue ku tanda Mbimbiliya kaha na ku tonda vinjila via ku pangela ha viuma vi tondeka. a Vulukenu naua nguenu ku zala ‘vuntu vua vuha’ kasi ci ka tualelelaho. (Kolo. 3:10) Vika mi kuasa kupua vakua ku puisamo Lizi lia Njambi?

13. Vati mu hasa ku pangesa vi mue ku lilongesa? (Talenu naua cikupulo.)

¹³ Mu cihela ca ku puisamo viose vi mue ku lilongesa mu ntsimbu imo lika, mu hasa ku pangela ha cimo ni vivali. (Visi. 11:2) Setekenu ku linga evi: Sonekenu viuma vi mu tonda ku pangelaho, kaha hangulenuho cimo ni vivali vi mu tonda ku putuka navio, kaha vikuavo mu hasa ku pangelaho mu ntsimbu ikuavo. Haka mu hasa ku putukila?

14. Vizango vika mu hasa ku putuka navio?

 ¹⁴ Mu hasa ku putuka na vizango vi mu hasa ku puisamo. Ni ku pangela ha viuma vi tondeka mua kama. Kaha nga mua hangula vi mu tonda ku pangelaho, vi tondesesenu mu mikanda yetu, mu hasa ku pangesa Índice das Publicações ni Mukanda ua ku Tondesesa Nauo ua Vakaleho va Yehova. Munima yaco, vundilenu Yehova a mi hane ‘cizango na ngolo ya ku vilinga.’ (Filp. 2:13) Setekenu ku pangesa vi mua lilongesa. Kaha omo mu mona ngecize mu na hasa ku puisamo cizango ca katete, ci ka miasiuila ku puisamo vikuavo naua.

TAVESENU LIZI LIA NJAMBI ‘LI PANGE MULI YENU’

15. Vati vangamba va Yehova va litepa na cingi ca vantu ve ku tanda Mbimbiliya? (1 Tesalonika 2:13)

¹⁵ Vamo vantu va tandaho laza Mbimbiliya vintsimbu via vingi. Vuno va tsiliela vi ya handeka Mbimbiliya ni? Vuno ve ku pangesa vilongesa viayo mu muono uavo ni? Houe. Ca vusiua, vavengi ka ve kuononoka vimamuna via mu Mbimbiliya. Vunoni vangamba va Yehova ve ku mona Mbimbiliya mu cifua ceka. Ngeci mua Vakua Kilistu va ku laza, netu tua tsiliela nguetu Mbimbiliya ya pua “lizi lia Njambi.” Kaha tue ku lihakela kapandi ka kuononoka vimamuna viayo mu muono uetu.—Tandenu 1 Tesalonika 2:13.

16. Vika vi tu kuasa kupua vakua ku puisamo Lizi?

¹⁶ Mua vusunga, vintsimbu vimo kati ca casi ku tanda na ku pangesa vi tue ku lilongesa mu Lizi lia Njambi. Halumo ce ku tu kaluuila ku uana ntsimbu ya ku tanda Mbimbiliya, ni tu hasa ku i tanda mu vuasi-vuasi ca ku hona ku hilulaho. Ni halumo tu hasa kuivua vusiua ku mona viuma via vingi vi tua pande ku pangelaho. Vunoni na vukuasi vua Yehova tu ka hasa ku vula vitanga viose-ovio. Ngeci mukemuo, tu tavenu vukuasi vuendi na ku hona ku sembulula vi tue kuivua, vunoni kupua vakua ku puisamo Lizi. Mua vusunga, omo tu pua na ku tanda Lizi lia Njambi na ku pangesa vi tue ku lilongesa, tu kapua vantu va ndzolela.—Tia. 1:25.