Via cili na Via Vipi: Mbimbiliya—Lia Pua Livulu li Tua Pande ku Kulahela
Ka tua pandele ku kala na vusunga ngecize vihangula vietu vi ka tu vuisa ndzolela, nga tu pua na ku hitukila ku cifua ci tue ku livuilamo ni vati va ka singanieka vakuetu ku tuala ha cihangula cetu. Mbimbiliya ya muesa omo lia vika ka tua pandele ku lingamo. Muomu, mua kala vimamuna vi tua pande ku kulahela kaha ya pua sapi ya ku kala na muono ua ndzolela.
TUA TONDEKA KU TUAMENENA CA NJAMBI
Mu Mbimbiliya, Yehova a Njambi ua lomboluelamo ngecize, ua tondele vantu va hitukile ku ku tuamenena cendi mu ku kava vimamuna viendi, kati va lituamenene vakevo vavene. (Yelemiya 10:23) Ngeci mukemuo, Yehova ua haka vimamuna viendi mu Mbimbiliya. Ikeye ua lema mua kama vantu kaha ka tondele tu yande omo lia ku linga vihangula via ku pihia. (Ndeutelonomi 5:29; 1 Yoano 4:8) Ku tundisako ovio, Sakatanga uetu ua kala na mana a ku hiana linga a tu hane vimamuna vi tondeka. (Visamo 100:3; 104:24) Vunoni, Njambi na limo litangua liahi a ka tu sindiya ku kava vitume via tumbika.
Yehova ua tangele Andama na Eva, na ku va hana viose vi va tondekele linga va yoye mu ndzolela. (Njenisisi 1:28, 29; 2:8, 15) Cikuavo naua, ua va hanene cimo cimamuna ca casi ku ci ononoka. Vunoni ua va hanene mpoko ya ku lihanguila nga va ononoka ni kuahi. (Njenisisi 2:9, 16, 17) Ca vusiua ku handeka nguetu, Andama na Eva va hanguile ku yoya muaya vitume viavo ku hiana vitume via Njambi. (Njenisisi 3:6) Vika viezilemo? Vuno capua ca cili vantu va lihanguile via cili na via vipi ndi? Mua vusunga kuahi. Mizimbu ya muesa ngecize ku sembulula vitume via Njambi ka ce ku neha ndzolela na ciyulo.—Ekelesiaste 8:9.
Mbimbiliya ya tu hana vimamuna vi tua tondeka tu hase ku linga vihangula via cili, ambe nga tua yoyele muono ua cifua ceka. (2 Timoteo 3:16, 17; talenu cikasa “ Limo Livulu lia Vantu Vose.”) Tu talenu vati Mbimbiliya ya lingamo.
Linga mu tantekeye omo lia vika Mbimbiliya va itumbula Lizi lia Njambi.”—1 Tesalonika 2:13. Talenu video “Iya Ivene Mbimbiliya? mu jw.org.
MBIMBILIYA YE KU SOLOLA KU TUAMENENA CA NJAMBI
Tundeko, Mbimbiliya ya tu leka ku likata ca kala hakati ka Njambi na vantu. Kaha muzimbu ua kalamo ue ku tu kuasa ku nongonona via cili na via vipi, ni nguetu vize vi hasa ku tu kuasa ni ku tu kokela visoti. (Visamo 19:7, 11) Vi tue ku lilongesamo, via pua via vusunga kaha vie ku tu kuasa ku linga vi hangula via cili mu muono uetu ua tangua na tangua.
Ca ku muenako, tu talenu citume ca ku Visimo 13:20: “Liendele na vakua mangana, kaha u ka pua mukua mangana; vunoni mukua ku liendela na viheve a ka ci yandela.” Eci citume naco ca pua ca seho na ku matangua etu. Mbimbiliya ya sula na vitume vie ku tu kuasa.—Talenu cikasa “ Vilongesa Via Mbimbiliya—Mana ka e ku Hua.”
Vunoni halumo mu hasa ku lihula nguenu: “Vati nji hasa ku kala na vusunga ngecize Mbimbiliya i hasa ku nji tuamenena lelo lino? Mu cilongesa ci na hatako, tu ka hilula ha malungano amo.
a Yehova lia pua lizina lia Njambi.—Visamo 83:18.
