Via Cili na Via Vipi: Vimamuna vi Hasa ku tu Kuasa
Mbimbiliya ya kuasa makulukazi a vantu mu vinjila viuana.
1. Vulo
Vantu va kala na visinganieka via ku liseza-seza ku tuala ha vulo na vika va tondeka va kale na ciyulo mu vulo.
MBIMBILIYA NGUAYO: “Vunoni enu naua, muntu ku muntu a leme mpuevo yeni ivene ngue ikeye ivene; kaha mpuevo a singimike yalieni.”—Efeso 5:33.
VI VIA LOMBOLOKA: Njambi ikeye ua tumbika vulo, ngeci mukemuo a tantekeya vika via tondeka linga va yala na mpuevo va yoye mu ndzolela. (Mako 10:6-9) Kaha vakevo ve ku hasa lika ku yoya mu ndzolela, nga va tuameka vizango via umo na mukuavo. Ca ku muenako, yala ua lema mpueyendi, ue ku muesa ngecize ua mu lema mu ku mu niunga vuino. Kaha mpuevo ue ku muesa ngecize ua singimika yaliendi, mu ku mu kuasa ku viteli na ku handeka na kasingimiko nendi.
MBIMBILIYA YE KU TU TUAMENENA: Quang na mpueyendi Thi, va kala ku Vietnã, va singaniekele nguavo na limo litangua liahi ve ku hasele ku kala na ndzolela mu vulo vuavo. Quang ua kele na ku muesa vukenia kuli mpueyendi. Ivene ua handekele nguendi: “Ku nja kele na ku tuala mana ku cifua ca kele na ku livuilamo mpueyange kaha vintsimbu via vingi nja kele na ku mu sahula ha kati ka mbunga. Ngeci Thi, ua tondele ku tsihia vulo.” Ivene nguendi: “Ku nja kele naua na ku kulahela kuli yaliange cipue vene ku mu singimika.”
Vunoni va Quang na Thi, va lilongesele vika ya handeka Mbimbiliya na ku lihakela kapandi ka ku ononoka citume ca ku Efeso 5:33 mu vulo vuavo. Quang nguendi: “Eci cinimbu ca nji kuasa ku muesa ngozi ku mpueyange, a pue na ku livua ngecize nja mu lema, mu ku mu hana vize via tondeka ku muvila na mu visinganieka. Kaha mu nje ku lihakela kapandi kaco, cilemo na kasingimiko ka mpueyange ce ku livuezelela.” Va Thi nguavo: “Nange mu nje ku lihakela kapandi ka ku ononoka citume ca ku Efeso 5:33, nje ku hasa ku muesa kasingimiko kuli yaliange. Kaha ku lingamo, yaliange ue ku nji lingisa ku livua ngecize ua nji lema, ku nji niunga kaha na ku yoya mu ciyulo.”
Linga mu tantekeye vikuavo, tandenu Vingelenu! No. 2 ya 2018, uli na mutue “Viuma 12 vi Hasa ku Kuasa Masoko ku Yoya Vuino” mu jw.org.
2. Mua ku Muesela Kasingimiko ku Vakuetu
Vantu ka ve ku singimika vakuavo omo lia cisemua cavo, cikanda, cifuti, vulombelo ni cifua ca muono u ve ku ambata.
MBIMBILIYA NGUAYO: “Singimikenu vose.”—1 Petulu 2:17.
VI VIA LOMBOLOKA: Mbimbiliya ka ya longesele ku zinda vantu omo lia cisemua cavo ni vakua vundeyi. Vunoni ya tu kaniamesa ku singmika vantu vose, cipue va mpite ni vihutu. (Vilinga 10:34) Ambe nga ka tua tavele vi va tsiliela ni vilinga viavo, tua pande ku va muesa ngozi na kasingimiko.—Mateo 7:12.
MBIMBILIYA YE KU TU TUAMENENA: Daniel ua kala ku Ásia, va mu longesele ku hona ku singimika vantu va mu cifuti cendi. Omo liaco, ua putukile ku zinda vantu va mu Ásia kaha vintsimbu via vingi ua kele na ku va sahula vene ha mbunga. Daniel nguendi: “Nja singaniekele nguange, nja kele na ku kuasa cifuti cange. Ka nja singaniekele ngecize cifua ci nja kele na ku singaniekelamo ni vilinga viange via puile via ku henga.”
Daniel ua lilongesele viya longesa Mbimbiliya. Ivene ngueni: “Nja muene ngecize nja pandele ku alulula visinganieka viange mu vutuntu. Nja lilongesele ku mona vantu ngue mue ku vamuenamo Njambi—ambe nga va ku vifuti vieka, tu vose tua pua vantu vamo lika.” Daniel ua lomboluele vati ue ku livuilamo mue ku litantekeya na vantu. Ivene naua ngueni: “Ka nje ku lisosomua naua nga muntu uaco ua ku cifuti cika. Nja lema honi vantu va vifua viose kaha nja kala na vavusamba va ku vifuti via ku liseza-seza mu mavu ose.”
Linga mu tantekeye vikuavo, tandenu Vingilenu! No. 3 ya 2020, uli na mutue “Vihemba vie ku Manusula Kahangu!” mu jw.org.
3. Vimbongo
Cingi ca vantu ve ku seteka ku pua vampite linga va hase ku yoya mu ndzolela mu ntsimbu ino na ku lutue.
MBIMBILIYA NGUAYO: “Mangana [e ku niunga], ngue zimbongo mu zie [e ku niunga]; Vunoni ku hiana cikuma ca mana cikeco eci, omo mangana a niunga muono uo uze a li nao.”—Ekelesiaste 7:12.
VI VIA LOMBOLOKA: Tua tondeka vimbongo, vunoni ka ce ku tu vuisa ndzolela ni ku tu hana lulavelelo lua ku lutue. (Visimo 18:11; 23:4, 5) Vunoni, ndzolela ya vusunga na lulavelelo lua ku lutue, lua hitukila ha ku kala na mangana a Njambi a kala mu Mbimbiliya.—1 Timoteo 6:17-19.
MBIMBILIYA YE KU TU TUAMENENA: Cardo, umo yala ua kala ku Indonésia, ua lingile cose a pue mpite. Ivene ngueni: “Nja kele na viuma viangi, vize vi ve ku singanieka vantu ku kala navio. Nja hasele kuya mangendzi, ku kala na viuma via ndando ya kama, makalu na vindzivo via cili cikuma.” Vunoni viuma viaco ka vie ku vuisa ndzolela ya vusunga. Ua vuezeleko naua nguandi: “Va njiongele, ngeci vimbonge viose vi nja fuitanganene mu miaka ya ingi via zimanganene mu ku kavuka ca liso. Mu miaka yose eyi, ntsimbu yange ya ile mu ngoco, nevi vi nja salele navio viahi, muomu via puile via ka ntsimbu lika.”
Vunoni va Cardo, va putukile ku pangesa vimamuna via mu Mbimbiliya ku tuala ha vimbongo. Mu cihela ca ku pangesa ntsimbu yendi mu ku lengeya vupite, ua hanguile ku ambata muono ua uasi. Ivene nguendi: “Nja nongonuene nguange ku kala na vupite vua cili, vua pua ku likuata vusamba vua cili na Njambi. Nje ku hasa ku kosa tulo tua cili kaha nja kala honi na ndzolela ya vusunga.”
Linga mu tantekeye viya handeka Mbimbiliya ku tuala ha vimbongo, tandenu cimpande “Vuno Muono ua Cili ku Lutue ua Hitukila ha ku Lilongesa Mua Kama na Vimbongo Ni?” mu Vutala vua Kaniungi No. 3 ya 2021, mu jw.org.
4. Ku limona ku mivila
Vantu va kala na visinganieka via ku liseza-seza ku tuala ha ku limona ku mivila, nga ca pua vupi ni kuahi.
MBIMBILIYA NGUAYO: “Mu zile ku vumpangala; Linga enu vose ku muntu ku muntu mu tantekeye ku kala na vampuevo venu mu ku lela na kasingimiko, Kati na ku-seta ca lisungu, ngue vakua vifuti vaze vantsa ka va tantekeya Njambi.”—1 Tesalonika 4:3-5.
VI VIA LOMBOLOKA: Mbimbiliya ya haka vinginga ku tuala ha vizango vietu via ku limona ku muvila. Kaha lizi “vupangala” lia ambatesela kumo na vikoyi, ku limona ku muvila na muntu ka mua liambatele nendi, vundeyi, ku limona ku muvila na tusitu. (1 Kolintu 6:9, 10) Ku limona ku muvila, vua pua vuana vua tunda kuli Njambi kaha vuana vuaco ua vu hana kuli vaze va liambata muaya masiko.—Visimo 5:18, 19.
MBIMBILIYA YE KU TU TUAMENENA: Kylie, umo mpuevo ua ku Australia, ua handekele nguendi: “Mu ku pua muzike, nja singaniekele nguange nga nji limona ku muvila ambe nga ka nja liambatele nendi, nje ku livuile vuino. Vunoni kati vikevio via solokele. Nja livuile ngue ku nja kele na seho kaha na ku vavala ca kama ku mutima.”
Mu nima yaco, Kylie ua lilongesele Mbimbiliya na ku lihakela kapandi ka ku ononoka vi ya longesa ku tuala ha ku limona ku muvila. Ivene ua handekele nguendi: “Nja muene ngecize vitume via Njambi, vie ku tu niunga ku ku vavala na vusiua. Nje ku livua honi vuino na kuli haka seho, muomu nje ku linga viuma ngue mua tonda Yehova. Ku ononoka vimamuna via mu Mbimbiliya, via nji ohiela ku masiua a engi!”
Linga mu tantekeye vikuavo, tandenu cimpande “O que a Bíblia diz sobre morar juntos sem se casar?” mu jw.org.
Sakatanga uetu ue ku tu kuasa ku nongonona via cili na via vipi. Vintsimbu vimo, ka ce ku pua ca casi ku ononoka vitume via Yehova, ngeci ce ku tondeka ku lihakela kapandi. Vunoni tu kalenu na vusunga ngecize ntsimbu yose i tu pua na ku mu ononoka, ndzolela yetu i ka livuezelela.
