Cingi cetu, tua tava ngecize vimo vilinga via pua via cili vikuavo co via ku vihia. Ca ku muenako, ku tsihia, vukenia, ku limona ku mivila ku ndzili na vanike, via pua mpundu via vipi. Kaha vifua ngeci mua, ku konkama, ngozi na ku lihaka mu cihela ca vakuenu, vikevio vie kuya ku mitima ya vantu. Vunoni vihangula ngeci mua, iya ua ku limona nendi ku muvila, ku handeka vusunga ni mua ku lelela vana, cingi ca vantu ve ku singanieka nguavo, ka hakele vupi na vumo vuahi. Kaha naua ve ku singanieka ngecize citava ku linga cihangula cose-oco. Vantu ve ku linga vihangula viavo kuliya na cifua ci ve ku livuilamo na vati vakuavo va livuilamo. Vuno eci cifua ca ku sianganiekelamo ca pua ca cili ndi?

Vintsimbu vimo, mutima uetu ue ku tu lingisa ku linga vihangula kuliya na cifua ci tue ku livuilamo ku tuala ku via cili na via vipi. (Loma 2:​14, 15) Ambe vene vanike, ve ku hasa ku nongonona ku liseza ca kala ha vilinga via cili na via vipi ni na ku livua mulonga. Kaha mu ku hita ca ntsimbu, mutima uetu ue ku sula na viuma vi tua lilongesa na vavusoko vetu, vakuetu ku sikola, valongisi, ku cihela ku tua kala, vulombelo ni na cisemua cetu. Mu tue ku linga vihangula, mutima uetu ue ku tu leka nga cihangula cetu capua ca cili ni kuahi.

Mutima ua ku longesa ku via cili na via vipi, u ka tu kuasa ku muesa ngozi, ku santsela, vuviuke na ku lihaka mu cihela ca vakuetu. Cikuavo naua, u hasa ku tu niunga ku ku linga viuma vi vavalesa mutima, ku va vuisa ntsoni ni ku livua mulonga.

Vuno cifua ci tue ku livuilamo ca pua ku tuamenena ca cili ndi? Garrick ha vukuendze vuendi, ua ambatele muono mu cifua ca ku linga, ua hetele ha ku handeka nguendi: “Nja hanguile ku linga viose vi nja tondele mu muono uange.” Vunoni ku linga viose-ovio via tondele, via mu kokelele visoti via vingi. Kaha omo lia cifua ca muono uaco, ivene ua handekele naua nguendi: “Nja hanguile muono ua ukalu cikuma.” Ni nguetu, ua hanguile muono ua vupangala, ku pangesa vidroga, ku penda na ku pua mukua vukenia.

Ku tuala ha cifua ci tue ku livuilamo, vintsimbu via vingi vihangula vietu vie ku hitukila ha vati vakuetu va ka livua. Kaha eci ce ku tu kuasa ku lilongesa kuli vakevo na ku mana avo. Cikuavo naua, mu tue ku linga via cili, kasingimiko ketu ku vavusoko, vavusamba na vantu va tua lihata navo, ce ku livuezelela.

Vuno ntsimbu yose cifua ci ve ku livuilamo vakuetu capua ku tuamenena ca cili ndi? Priscila ku vuhumbe vuendi, ua kele na ku linga viose vi va kele na ku linga vavusamba vendi ngeci mua, ku linga vupangala. Vunoni ua hetele ha ku nongonona ngecize ku linga vize vi ve ku mona vakuavo ku pua via cili, ku ca kele na ku mu vuisa ndzolela. Kaha ua handekele naua nguendi: “Ku linga viuma vi va kele na ku linga mbunga yose, ca nji lingisile ku linga viuma via ku vihia kaha via vusonde. Kaha omo liaco, mutima uange ua kele na ku nji paya.”

Capua ca seho ya kama ku tuala mana ku visinganieka via vakuetu, omo tu linga vihangula ku tuala ku via cili na via vipi. Vunoni ka ce ku pua ca casi ku lingamo, muomu vinstimbu vimo tue ku livuisa vusiua ni ku vavalesa mitima ya vakuetu omo lia ku hona ku mona ngecize vihangula vietu vi hasa ku vakuata. (Visimo 14:12) Ambe-nga yetu ni vakuetu va singanieka ngecize vilinga viavo via pua via cili, vunoni kati mukemuo, vi hasa ku pua vusonde. Ca vusiua ku handeka nguetu, vilinga vi tua muene ku pua via ku pihia, vantu va vipuisa ku pua via cili. Kaha vize via cili, va vipuisa ku pua via ku pihia.

Vuno kua kala masiko a hasa ku tu tuamenena ku via cili na via vipi ndi? Vuno kuli njila i tua pande ku kava, ca ku hona ku tu sezela vusiua mu ntsimbu ya kama ndi?

Mu ka viukilila ku tantekeya ngecize kua kala kumo ku tu hasa ku uana vimamuna vi hasa ku kuasa vose kaha na ku vi kulahela. Cilongesa ci na hatako, ci ka lombolola ku liko tu hasa ku uana vimamuna vi tua pande ku kulahela na ku tu kuasa ku nongonona vihangula via cili na via vipi.