MU VULUKA litangua li mua vuile ndzolela ya kama mu muono. Lia puile litangua lia vulo vuenu ni lia semukile muaneni ua mbangelo? Ni halumo litangua li va mi mbatiza? Mua vusunga lia puile litangua lia ndzolela ya kama. Kaha mu litangua lize, vamuanoko va viukilile cikuma ku mi mona mu muesa cilemo cenu kuli Njambi na mutima uenu uose na muono ueni uose na mana enu ose na ngolo yenu yose!—Mako 12:30.

Mua vusunga, mue vuaho laza ndzolela mu ku pangela Yehova fume ha va mi mbatizile. Vunoni, cingi ca vakua ku ambulula ka vesi na ndzolela iva kele nayo laza. Omo lia vika? Vusunga vuka vua pande ku tu lingisa ku tualelelaho ku pangela Yehova na ndzolela?

Muzimbu ua vuangana ue ku vuisa ndzolela ya kama. Omo lia vika? Muomu Yehova ua kulahesa ngueni Vuangana vueni vuovuno vu nongesa ano mavu a api na ku neha mavu a aha a Njambi. Zefania 1:14 nguauo: “Litangua lia kama lia Yehova li li ha hiehi, li li ha hiehi, li zangula cikuma!” Vunoni nga tu singanieka nguetu li li na ku kotokela cikuma, ndzolela yetu i hasa ku tepuluka. Kaha eci, ci hasa ku tu lingisa ku kokoloka mu vipanga via Njambi.—Visimo 13:12.

Ku kala hamo na vamuanetu ce ku tu kaniamesa, ku pangela Yehova na ndzolela. Halumo vilinga via cili via vantu va Yehova via tu kokele, tu kovele mu ku lemesa ca vusunga kaha tua putukile ku pangela Njambi na ndzolela. (1 Petulu. 2:12) Vuno vika vi hasa ku lingika, nga umo muanetu va mu sungamesa omo ku hona ku niunga amo masiko? Eci ci hasa ku zeyesa vamo mu cikungulukilo na ku va zima ndzolela.

Ku lema vufuko naco ci hasa ku zima ndzolela. Mu njila ika? Mavu a Satana eku seteka ku tu kokueya linga tu lande viuma vize ka tu tondo mpundu. Ngeci tua pande ku vuluka mezi a Yesu ngueni: “Na umo uahi a hasa ku pangela vasukulu vavali: muomu a ka zinda umo na ku lema mukuavo; cipue a ka pandama ku umo na ku yengula mukuavo. Ka mu hasa ku pangela Njambi na vufuko.” (Mateo 6:24) Ka tu hasa ku pangela Yehova na ndzolela oku tu tonda ku kala na viose vi tu tonda mu mavu ano.

Ku pangela Yehova ka ca puile ca cikalu kuli vaze va mu lema. (1 Yoano 5:3) Mu vuluka via handekele Yesu ngueni: “Tuayenu kuli ange, enu vose muli na ku fuitangana na ku lemuua, kaha nji ka mi huimisa. Lilemekienu mukambo uange, kaha lilongesienu kuli ange; muomu nja konkama, nji mukua ku likehesa mu mutima: kaha mu ka uana ku huima ku miono yenu. Muomu mukambo uange ua uasi, na citele cange ca cihehu.” (Mateo 11:28-30) Ku pua Mukua Kilistu ua vusunga, ce ku neha ndzolela. Cili vene, tuli na vusunga vua pande ku tu vuisa ndzolela mu  ku pangela Yehova. Tu ci talenu ha vusunga ovu vutatu.—Havakuke 3:18.

Tue ku pangela uze ua tu hana muono, Njambi ua ndzolela. (Vilinga 17:28; 1 Timoteo 1:11) Tua tantekeya nguetu Sakatanga ikeye ua tu hana muono. Ngeci mukemuo tu tualelelenuho ku mu pangela na ndzolela ya kama, ca ku hona ku tala ku miaka ya ingi ina hiti fume ha va tu mbatiza.

Tu ci talenu lungano lua Héctor, uze ua pangelele Yehova miaka ya ku pua 40 mu cipanga ca ku meneka vikungulukilo. “Ambe mu miaka ya vusinakazi,” ua kala na ndzolela mu ku pangela Yehova. (Visamo 92:12-14) Ku vavala ca mpueyeni ca tepulula ku vipanga vieni mu ku pangela Njambi, vunoni Héctor ka zimbalesele ndzolela ya kele nayo. Ua handekele ngueni: “Vutuhu ci vuisa vusiua ku mona cihindu ca mpueyange ci ya na ku tualelelaho ku pihia ntsimbu yose, kaha kati ca casi ku mu niunga vuino, ka nje ku tavesa evi visoti viaco ku nji tambula ndzolela ya ku pangela Njambi ua vusunga. Muomu nja tantekeya ngecize Yehova ua nji hana muono, uze ua tangele muntu na vutumbe, kaha ovu vusunga vuaco vue ku nji lingisa ku mu lema cikuma na ku mu pangela na mutima uange uose! Nja lihakela kapandi ka ku ambulula ntsimbu yose, na ku haka lulavelelo lua Vuangana mu visinganieka viange, linga kati nji zimbalese ndzolela yange.”

Yehova ua tu hana cikombelo, linga tu kale na ndzolela mu muono. Mua vusunga, “Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.” (Yoano 3:16) Aci singaniekenu, vipi vietu va hasa ku tu ecelavio, kaha tu hasa ku ka tambula muono ka ue ku hua nga tu muesa lutsilielo ku vuana vua Njambi vua cikombelo. Ovu vua pua vusunga vua kama vua pande ku tu lingisa ku santsela! Kaha ku santsela ku cikombelo ci ka tu lingisa ku pangela Yehova na ndzolela.

Umo muanetu ua lizina Jesús, ua kele ku Mexico, ua handekele ngueni: “Nja puile ndungo ua vipanga, vintsimbu vimo nja tavele vipanga via ku livueza, vutuhu ka via puile via ku nji sindiya ku vi linga. Nja kele na ku vi panga muomu nja tondele ku kala na vimbongo via vingi. Omo nja lilongesele via Yehova na vati ua hele muaneni umo lika kua ku tsila vantu. Nja kele na cizango ca kama ca ku mu pangela. Ngeci mukemuo nja lihanene kuli Yehova, mu nima ya ku panga miaka 28 ku cipanga cange, kaha ngeci nja hanguile ku seza cipanga na ku kovela mu cipanga ca ku ambulula ntsimbu yose.” Mukemuo mua putukilile Jesús ku pangela Yehova na ndzolela.

Tua yoya muono ua ku lela mu vilinga, kaha ce ku tu nehela ndzolela. Mu vuluka cifua ca muono uenu ku nima tele kanda mu tantekeye Yehova ni? Kapostolo Paulu ua vuluisile Vakua Kilistu ku Loma ngueni va puile “vakuamanda va vupi” kaha  vuovuno va na pu “vakuamanda va vuviuke.” Muomu va yoyele muono ua ku lela, kaha va kele na lulavelelo lua muono ka ue ku hua. (Loma 6:17-22) Netu tua pande ku kava masiko a Yehova, linga tu patuke ku vusiua vue ku iza mu vilinga via mazilo na vupi. Eci ci ka tu vuisa ndzolela ya kama!

Jaime, ua puile mukua ku viana Njambi ua tsiliele ngueni viuma via lizila vivene kaha ua puile mukua vueho vua ku litingula. Omo Jaime ua putukile ku kunguluka ku viuano via Vakua Kilistu ua komokele cilemo ca ka mueneko. Linga Jaime a seze cifua ca muono ueni ca tondekele ku vundila kuli Yehova na ku mu tsiliela. Jaime ngueni: “Kavundende kavundende, Nja tantekeyele ngecize kua kala Tata ua cilemo, Njambi ua ngozi. Ku niunga masiko a vuviuke a Yehova a na nji ohiela. Muomu nga ka nja alulukile, halumo nga va nji tsiha ku vavusamba vange va nja kele na ku litinguila navo. Miaka ya ndzolela ya kama mu muono uange ya pua i nji na pangela Yehova.”

Vati tua pandele ku livua omo tu vandamena ku kotoka ca ano mavu? Vulukenu ngecize, tuli na ku linga cizango ca Njambi kaha tu na lavelela muono ka ue ku hua ua ya-ye. Ngeci mukemuo “kati tu katale mu ku linga vize via viuka, muomu ku ntsimbu yaco tu ka tia, nga ka tu katala.” (Ngalata 6:8, 9) Na vukuasi vua Yehova, tu kolesenu, tu lihakelenu kapandi ka ku muesa vifua vize vi tondeka tu kovoke ku “lamba ya kama,” na ku tualelelaho ku pangela Yehova na ndzolela.—Ku-Solola 7:9, 13, 14; Tiango 1:2-4.

Tu hasa ku tsiliela nguetu Yehova tangua a ka tu hana fueto ya ku kolesa cetu, muomu a tantekeya cipanga ci tue ku linga na cilemo ci tue ku mu muesa na lizina lieni. Nga tu tualelelaho ku mu pangela na ndzolela, tu ke vua ngue mukua visamo Ndaviti, ua handekele ngueni: “Nji na hake Yehova ku meso ange ntsimbu yose: muomu ikeye ali ku livoko liange lia cilio, ka nji ka taliangela. Ngoco vene mutima uange u zolela, na vumpahu vuange vu viukilila: Na ntsitu yange i kala na ku lembama.”—Visamo 16:8, 9.