1-3. (a) Viuma vika vi hasa ku tu kaluuila ku alulula cipue mu nima ya mbatizimu? (b) Vihula vika tu hasa ku lihula nga tu mona ku kaluua ca kala ha ku vula vuzeye vuetu? (Talenu vikupulu via ku vuputukilo.)

VA KEVIN va puile vakua ku ta vuela vua ku lipunda vimbongo na ku sipa na ku nua cikuma na ku fuenia vidroga miaka ya yingi. ^[1] (Talenu mezi a ku ntsongo ya cilongesa.) Kaha mu va lilongesa vusunga va tondele ku pua kavusamba ka Yehova. Vunoni ha ku vi puisamo ca tondekele va alulule muono uavo. Va hasele ku aluluka na vukuasi vua Yehova na ngolo ya Lizi Lieni, Mbimbiliya.​—VaHevelu 4:12.

² Mu nima ya ku limbatiza vaKevin kasi va tondekele ku alulula cifua cavo va pue Mukua Kilistu ua cili. (Efeso 4:31, 32) Ca ku muenako va kele na ku niengua vuasi cikuma. Vunoni va komokele cikuma mu va muene ku kaluua ca kele ha ku niunga vutenu vuavo. VaKevin va handekele nguavo ku lilongesa ku kuata vutenu vuavo ca va kaluuilile ku hiana ku likela viuma via ku pihia vi va kele na ku linga tele kanda va ci va mbatize! Vunoni va hasele ku alulula vifua  viavo mu ku vundila vukuasi kuli Yehova na ku lilongesa vuino Mbimbiliya.

³ Cingi cetu tua tondekele ku alulula viuma via vingi mu miono yetu ntsimbu kanda va tu mbatize, linga tu hase ku yoya mu ye ku tu longesa Mbimbiliya. Vunoni cipue ntsimbu ino, kasi tue ku mona ngecize kuli vimo viuma via vindende vi tua pande ku alulula linga tu kale na vifua via Njambi na via Kilistu. (Efeso 5:1, 2; 1 Petulu 2:21) Ca ku muenako, halumo tue ku linienieta cikuma ni tue ku fueya na ku handeka mua ku pihia vakuetu. Ni vintsimbu vimo tu hasa ku ivua vuoma vua ku linga via cili, omo lia viuma vi va hasa ku tu singaniekela ni ku tu handeka. Halumo laza tua sua ku lua na vuzeye vuaco miaka ya ingi vunoni kasi tue ku hitaho. Ngeci mukemuo halumo tu hasa ku lihula nguetu: ‘Vika ca kaluuila ngeci ku vula ovu vuzeye vua vundende? Vika nja pande ku linga mangana nji kave vi ya handeka Mbimbiliya linga nji tualeleleho ku alulula vuntu vuange?’

4. Omo lia vika ka tu hasa ku vuisa ndzolela Yehova mu viose vi tue ku linga?

⁴ Tua lema Yehova, ngeci cizango cetu ca pua ku mu vuisa ndzolela. Vunoni ce ku tu vuisa vusiua, ku tantekeya ngecize ka tu hasa ku mu vuisa ndzolela ntsimbu yose, muomu ka tua tantulukile. Tue ku livua ngue mua vuile kapostolo Paulu, ua handekele ngueni: “Muomu ku-zanga nji li naco, vunoni ku ci linga cize ca cili cahiko.”​—Loma 7:18; Tiango 3:2.

5. Viuma vika tua likela laza ntsimbu tele kanda va tu mbatize vunoni vuzeye vuka kasi tue ku lua navuo?

⁵ Ntsimbu tele kanda tu kovele mu cikungulukilo, tua lihakelele kapandi ka ku likela viuma via zinda Yehova. (1 Kolintu 6:9, 10) Vunoni kasi ka tua tantulukile. (Kolose 3:9, 10) Ngeci mukemuo kasi tue ku sevuka cipue nga mua hita miaka ya yingi fume ha va tu mbatizila. Vintsimbu vimo, tue ku kala na vizango via ku pihia ni halumo ci hasa ku tu kaluuila ku vula vumo vuhenge vu tua kala navuo. Halumo tu hasa ku lua na vuhenge vuaco miaka ya yingi.

6, 7. (a) Vika vie ku tu asiuisa ku pua vavusamba va Yehova vutuhu ka tua tantulukile? (b) Omo lia vika tua pande kuli ivua ku zituka mu ku vundila Yehova a tu konekele?

⁶ Vutuhu ka tua tantulukile, kasi tu hasa ku pua va vusamba va Yehova na ku mu pangela. Ntsimbu yose puenu na ku vuluka vati mua likuatele vusamba na Yehova. Ikeye ua muene vucili vua kele muli enu ngeci ua tondele mu mu tantekeye. (Yoano 6:44) Ikeye ua tantekeyele naua ngecize mua kala na tupenga na vuzeye, kaha naua mu ka pua na ku sevuka. Vunoni kasi Yehova ua mi tondele mu pue kavusamba keni.

⁷ Yehova ua tu lemene cikuma ngeci ua tu hele vuana vua seho ya kama. Ua tumine Muaneni Yesu ha mavu linga a ku tu hane muono ueni mu ku tu kula ku vupi vuetu. (Yoano 3:16) Nga tu sevuka, tu hasa ku vundila Yehova a tu ecele. Kaha omo lia nkombelo, tu hasa ku kala na vusunga nguetu a ka tu ecela na ku pua vavusamba veni. (Loma 7:24, 25; 1 Yoano 2:1, 2) Vulukenu ngecize Yesu ua tsilile vaze vakua ku aluluka ku vupi vuavo. Ngeci mukemuo, ambe nga tu mona nguetu tua lingi viuma via ku pihia cikuma, ka tua pandele ku likela ku vundila kuli Yehova a tu konekele. Nga ka tu mu lombo a tu konekele, ci ka pua ngue ku viana ku tana ku mavoko kua ku sula mazilo. Tue ku santsela cikuma ku tantekeya ngecize Yehova na asiuisa viuma linga tu pue vavusamba veni, vutuhu ka tua tantulukile!​—Tandenu 1 Timoteo 1:15.

8. Omo lia vika ka tua pandele ku sembulula vuzeye vuetu?

⁸ Tua tantekeya ngecize ka tua pandele ku sembulula vuzeye vuetu ni ku pua na kuli sambuesa ntsimbu yose. Yehova ua tu leka laza cifua ca vantu va a tonda va pue vavusamba veni. (Visamo 15:1-5) Ngeci mukemuo nga tu tonda ku suena mu hiehi neni, tua pande ku tualelelaho ku  temunuina vifua vieni na via Muaneni. Tua pande naua ku lihakela kapandi ka ku lua na visinganieka via ku pihia, cipue nga ka tu hasa ku vi vula. Tua pande ku tualelelaho ku alulula vuntu vuetu, cipue nga laza va tu mbatiza.​—2 Kolintu 13:11.

9. Vati tua tantekeya nguetu tu hasa ku tualelelaho ku zala vuntu vua vuha?

⁹ Kapostolo Paulu ua lekele Vakua Kilistu ngueni: “Ngecize zulenu muntu ua laza na vifua via muono ua laza, uze u kuana ku pihia na masungu a ku onga; kaha puenu vantu va vaha mu cimbembesi ca mitima yenu, Zalenu muntu uze ua muha, i va na tanga na cifua ca Njambi mu vuviuke na ku-lela ca vusunga.” (Efeso 4:22-24) Eci ca lomboloka ngecize tua pande ku tualelelaho ku lihakela kapandi ka ku aluluka na ku zala “muntu uze ua muha.” Kaha cipue nga laza tua sua ku pangela Yehova kasi tu hasa ku lilongesa via vingi ha vifua vieni. Mbimbiliya i hasa ku tu kuasa ku alulula cifua ca vuntu vuetu linga tu lifue neni.

10. Vika tua pande ku linga tu tualeleleho ku aluluka na vukuasi vua Mbimbiliya kaha vihula vika tu hasa ku linga?

¹⁰ Tu vose tua tonda ku kava vi ya handeka Mbimbiliya. Vunoni tua pande ku lihakela kapandi kaco nga tu tonda ku aluluka. Omo lia vika tua pande ku lihakela kapandi kaco? Kati Yehova nga na asiuisile lika viuma linga tu linge via cili ni?

11-13. Omo lia vika Yehova ua lavelela tu lihakele kapandi ka ku vula vuzeye vuetu?

¹¹ Nga tu singanieka ha melu na mavu na viose via kalamo, tuli na vusunga ngecize Yehova ali na ngolo ya ku linga viose. Ca ku muenako, ua tangele litangua, lia kala na ngolo ya kama cikuma. Linga ha mavu ha kale muono kue ku tondeka ceke ca cindende lika, vunoni litangua lie ku tua ceke na ntuima ya ngolo ya kama mu nkala segundu. (Visamo 74:16; Isaya 40:26)  Yehova ue ku hana naua ngolo ku vangamba veni ha mavu nga va i tonda. (Isaya 40:29) Mua vusunga, nga Yehova ua tondele nga na asiuisa viuma linga tu hase ku vula vuzeye vuetu na ku likela visinganieka via ku pihia. Vika honi ke ku lingilamo?

¹² Yehova ua tu hana vuana vua ku lihanguila. Ua tu tavesa ku lihanguila nga tu mu ononoka ni kuahi. Nga tu hangula ku mu ononoka na ku linga cose mu ku puisamo cizango ceni, tu ka muesa ngecize tua mu lema kaha tu tonda ku mu vuisa ndzolela. Satana ua handekele ngueni Yehova ka puile muangana ua cili mu ku sika. Vunoni mu tue ku ononoka Yehova, tue ku muesa ngecize tu tonda a pue Muangana uetu. Kaha tu hasa ku kala na vusunga ngecize Tatetu ua cilemo ua haka seho ku kapandi ka tue ku lihakela ka ku mu ononoka. (Yombi 2:3-5; Visimo 27:11) Mu tue ku lihakela kapandi ka ku lua na vuzeye vuetu ambe kati ca casi ku ci linga, tue ku pua vakua vusunga kuli Yehova, kaha tue ku muesa ngecize tu tonda a pue Muangana uetu.

¹³ Yehova ua tu leka ngecize tua pande ku lihakela kapandi ka ku temunuina vifua vieni. (Kolose 3:12; tandenu 2 Petulu 1:5-7.) Kaha naua ua tonda tu linge cose linga tu niunge visinganieka vietu na viuma vi tue ku ivua. (Loma 8:5; 12:9) Nga tu linga cose mu ku aluluka tu ka vezika, kaha tu ka kala na ndzolela.

14, 15. Vika tu hasa ku linga tu kale na vifua via lema Yehova? (Talenu cikasa “ Mbibiliya na vivundilo via Alulula Miono yavo”)

¹⁴ Vika tua pande ku linga tu vuezelele ku vifua via lema Yehova? Ca ku hona ku lihanguila etu vavene vi tua pande ku alulula, tua pande ku tava Njambi a tu tuamenene. Loma 12:2 nguayo: “Kaha kati mu lifuise na viuma via ntsimbu ino: vunoni lialuluisienu na mitima ya iha, linga mu eseke ngue omo mua kala na cizango ca Njambi, cikeco ca cili, ca mu leme, ca ku tantuluka.” Ngeci tua pande ku tsiliela ha vukuasi vua tu hana Yehova linga tu tantekeye vika ua tonda. Tua pande ku tanda Mbimbiliya nkala litangua, na ku hilula ha viuma vi tue ku tanda, kaha na ku vundila Yehova a tu hane sipilitu santu. (Luka 11:13; Ngalata 5:22, 23) Nga tu lingamo Yehova a ka tu kuasa ku tantekeya via mu ya ku mutima, kaha tu ka lilongesa ku singanieka ngue ikeye. Visinganieka vietu, vi handeka vietu na viuma vi tu ka linga vi ka vuisa Yehova ndzolela, muomu tu ka lilongesa naua ku vula vuzeye vuetu. Vunoni cipue ngoco, kasi tua pande ku tualelelaho ku luisa vuzeye vuaco.​—Visimo 4:23.

¹⁵ Ku vueza ku ku tanda Mbimbiliya nkala litangua, tua pande ku lilongesayo na vukuasi vua mikanda yetu, ngeci mua Vutala vua Kaniungi na Despertai! (Awake!) Eyi mikanda ye ku kala na vimpande via vingi vie ku tu longesa vati tu hasa  ku temunuina vifua via Yehova na mua ku luila na vuzeye vuetu. Tu hasa ku uana vimo vilongesa na mikanda ya mu Mbimbiliya i hasa ku tu kuasa mpundu. Tu hasa ku kunguiya eyi mikanda yaco na vilongesa viaco linga tu pue na ku vi tanda ntsimbu na ntsimbu.

16. Omo lia vika ka tua pandele ku hilukila mu nima nga ka tuesi na ku aluluka vuasi?

¹⁶ Ce ku ambata ntsimbu linga tu lilongese ku temunuina vifua via Yehova. Kaha nga mue ku ivua ngue kanda mu alulule vifua via vingi ngue mu mu tonda, kalenu na lukakatela. Ha katete, ci tondeka kuli sindiya enu vavene ku linga vi ya handeka Mbimbiliya. Vunoni omo mu ka lihakela kapandi ka ku yoya mu cifua ca tonda Yehova ngueni mu lingemo, ci ka mi puila ca casi ku singanieka ngue mue ku singanieka ikeye na ku linga viuma via cili.​—Visamo 37:31; Visimo 23:12; Ngalata 5:16, 17.

17. Ndzolela ika tua lavelela ku lutue nga tu ononoka Yehova?

¹⁷ Tua lavelela ntsimbu ize omo tu ka pua va ku tantuluka na ku pangela Yehova miaka yose. Ku ntsimbu yaco, ka tu ka tondo naua ku lua na vuzeye, kaha ci ka tu puila ca casi cikuma ku temunuina Yehova. Vunoni cipue ntsimbu ino tu hasa ku lemesa Yehova muomu ua tu hana vuana vua cikombelo. Vutuhu ka tua tantulukile, tu hasa ku mu ya ku mutima nga tu tualelelaho ku lihakela kapandi ka aluluka na ku kava vi ye ku tu longesa Mbimbiliya.

18, 19. Vati tu hasa ku kala na vusunga nguetu Mbimbiliya ya kala na ngolo ya ku tualelelaho ku alulula muono uetu?

¹⁸ VaKevin va lihakelele kapandi ka ku niunga vutenu vuavo. Va kele na ku hilula ha viuma vi va kele na ku lilongesa mu Mbimbiliya kaha va lihakelele kapandi ka ku alulula muono uavo. Kaha va niungile vimamuna vi va va hele vakuavo Vakua Kilistu. Vutuhu mua hitile miaka linga vaKevin va hase ku aluluka, mu ku hita ca ntsimbu va puile mukua ku kuasa vipanga. Kaha mu miaka 20 ina hiti ngeci va pua mukuluntu mu cikungulukilo. Vunoni cipue ntsimbu ino, va tantekeya ngecize va pande ku tualelelaho ku lua na vuzeye vuavo.

¹⁹ Netu tu hasa ku alulula vuntu vuetu ngeci mua vaKevin. Nga tu lingamo tu ka tualelelaho ku suena mu hiehi na Yehova. (Visamo 25:14) Kaha nga tu likoleselako ku aluluka linga tu mu vuise ndzolela, a ka tu kuasa tu vi puisemo. Tu ka kala na vusunga ngecize nkuma tu hasa ku tualelelaho ku alulula vimo mu muono uetu na vukuasi vua Mbimbiliya.​—Visamo 34:8.