1, 2. Vihula vika via kalako ku tuala ha mezi a Yesu a va soneka ku Mateo 24:14?

YESU ua handekele laza ngueni, ku matangua a ku kotokela muzimbu ua cili ua Vuangana va ka u ambulula ku vantu vose. (Mateo 24:14) Mu ku pua Vakaleho va Yehova, va tu tantekeya mu mavu ose omo lia cipanga cetu ca ku ambulula. Vantu vamo va lema muzimbu u tue ku ambulula vamo co kuahi. Vunoni cipue vaze ka lemene muzimbu uetu kasi ve ku tu singimika omo lia cipanga cetu. Tue ku lisolola ngecize yetu tue ku linga cipanga ca handekele Yesu. Vuno tuli na vusunga vua ku handeka mo ni? Vati tu hasa ku kala na vusunga ngecize ku ambulula cetu cikeco vene cize ca handekele Yesu?

² Cingi ca vakua malombelo ve ku litumbula nguavo ve ku ambulula muzimbu ua Yesu. Vunoni ku ambulula cavo ca pua lika ku tembele, ha TV na ha Internete ni halumo ku lekako lika vakuavo vi va lilongesa hali Yesu. Vamo co ve ku singanieka nguavo ku kuasa vakua ku yanda ni ku linga vipanga ngeci mua ku pua vakua ku saka ni valongesi ya pua njila i ve ku ambuluilamo. Vuno ku linga evi cikeco ku ambulula ca sikile Yesu ni?

3. Kuli ya na Mateo 28:19, 20, Yesu ua tumine vakua ku mu kava ku linga viuma vika viuana?

 ³ Vuno Yesu ua tondele vandongesi veni va pue na ku tumamena vantu va lizile vavene ni? Houe! Mu nima ya ku sanguka ceni, Yesu ua lekele vihita via vakua ku mu kava ngueni: “Hamenu, [yeni] puisenu vantu vose vandongesi vange na ku va mbatiza . . . , na ku va longesa ku niunga viuma viose vi nja mi sikile.” (Mateo 28:19, 20) Ngeci mu ku pua vandongesi va Yesu tua pande ku linga viuma viuana. Tua pande ku puisa vandongesi, ku va mbatiza, na ku va longesa. Vunoni ha katete tua pande ku ya ku vantu. Umo mukua tondesesa via Mbimbiliya ua lomboluele ngueni: “‘Ku ya’ ca pua cipanga ca uose mukua ku tsiliela, cipue mu vi tapalo ni muaya kalunga ndonga.”​—Mateo 10:7; Luka 10:3.

4. Ku pua vakua “ku tela vantu” ca ambatela kumo na vika?

⁴ Yesu ua tondele vandongesi veni ku linga vika? Vuno ua tondele va ambulule nkala muntu ha lika lieni ni ua tondele va ambulule mu civunga? Mu ku linga ka citava muntu umo ku ambuluila ku “vantu vose,” vandongesi veni va tondekele ku va kungulula va pue civunga. Evi vikevio via lomboluele Yesu mua laniene vandongesi veni va pue “vakua ku tela vantu.” (Tandenu Mateo 4:18-22.) Yesu ka tumbuile muntu umo lika a lovela na kalovo keni. Ku tela ca tumbuile ca ambatela kumo na ku pangesa manda. Eci cifua ca ku ta naco vantsi ca puile cipanga ca kama ca tondekele ku cendesa vuino, kaha vantu vavengi va kele na ku pangela hamo.​—Luka 5:1-11.

5. Vihula vika viuana vi tua pande ku tantekeya vikumbululo, kaha omo lia vika?

⁵ Nga tu tonda ku tantekeya veya vali na ku ambulula muzimbu ua cili matangua ano, tua pande ku tantekeya vikumbululo via vihula evi viuana:

• Muzimbu uka va na pande ku ambulula vakua ku kava Yesu?

• Vutumbe vuka va na pande ku kala navuo?

• Vinjila vika va na pande ku kavangeya?

• Haka ca pande ku endela cipanga cavo, kaha ntsimbu ya ku pua kuli ca pandele ku ka tualelelaho?

Vikumbululo via vihula evi vi ka tu kuasa ku tantekeya veya vali na ku linga eci cipanga ce ku ovola miono, kaha ci ka kaniamesa cizango cetu ka ku tualelelaho ku ambulula.—1 Timoteo 4:16.

6. Omo lia vika tu hasa ku kala na vusunga nguetu Vakaleho va Yehova ve ku ambulula muzimbu u tondeka?

⁶ Tandenu Luka 4:43. Yesu ua ambuluile “zimpande zia cili zia vuangana,” kaha a tonda vandongesi veni va lingemo. Civunga ca vantu cika ce ku ambulula ou muzimbu ku vantu vose? Vakaleho va Yehova lika! Cipue vaze va tu zinda va tantekeya ngoco. Ca ku muenako, talenu via handekele umo misionaliu ua pua sasendote ua Katolika ua yoyele ku vifuti via ku liseza-seza, ua lekele Mukaleho ua Yehova ngueni mu nkala cifuti ca ile ua kele na ku hula Vakaleho va Yehova muzimbu u va kele na ku ambulula. Sasendote ua handekele ngueni, “Vose va pua viheve, va nji kumbuluile lika mezi amo: ‘Muzimbu ua cili ua Vuangana.’” Via handekele Sasendote ka via muesele ngecize tu viheve houe, vunoni tua likuata kumo mu ku pua Vakua Kilistu va vusunga. (1 Kolintu 1:10) Vuangana vua Njambi vukevuo vua pua muzimbu ua ntsindo ua mu Vutala vua Kaniungi Vuli na Ku Ambulula Vuangana vua Yehova. Ou mukanda uaco ue ku tuhuka mu malimi 254, ve ku u tuhula kampe 59,000,000 ya vilongesa, eci ca lingisa ou mukanda uaco ku hiana nkala mikanda i ve ku soneka mu mavu ose!

7. Vati tu tantekeya nguetu vakuluntu va malombelo ka ve ku ambulula muzimbu u tondeka?

 ⁷ Vakuluntu va malombelo ka ve ku ambulula via Vuangana vua Njambi. Cingi cavo mu ve ku handeka via Vuangana ve ku longesa nguavo, ca pua cuma ca kala mu mutima ua muntu. (Luka 17:21) Ka ve ku longesa vantu ngecize Vuangana vua pua nguvulu ya muilu ye ku sika Yesu. Va lema lika ku longesa via Yesu ha Natale na ha Pasovala. Ka ve ku lombolola ngecize Vuangana vukevuo vu ka manusula tuyando tua vantu, kaha vuovuno vu ka fumisako vupi vuose ha mavu. (Ku-Solola 19:11-21) Mua vusunga vakuluntu va malombelo ka va tantekeya viuma via ka linga Yesu mu ku pua Muangana ua Vuangana vua Njambi. Kaha mu ku linga ka ve ku ivuisisa muzimbu ua Yesu, ka ve ku ivuisisa naua omo lia vika va pandele ku ambulula.

8. Viuma vika via vuhenge via kalako ku tuala ha cipanga ca ku ambulula?

⁸ Vandongesi va Yesu ka va pandele ku ambulula mu ku tambula vimbongo ni ku tunga vindzivo via ku komouesa. Yesu ua ambele ngueni: “Vuana mu na tambula ngoco, vu hanienu ngoco.” (Mateo 10:8) Ngeci mukemuo cipanga ca ku ambulula ka ca pandele ku pua mingoso. (2 Kolintu 2:17) Vandongesi va Yesu ka va pandele ku pinga vimbongo mu ku va fueta omo lia cipanga ca ku ambulula. (Tandenu Vilinga 20:33-35.) Vutuhu Yesu ua hele vimamuna via viasi, cingi ca malombelo a tanguka mu ku lomba vimbongo ku vantu linga va niunge vitembele viavo na ku fueta valongesi na vakuavo ve ku pangelako. Ngeci valongesi va malombelo a makuli va pua vampite va kama.​—Ku-Solola 17:4, 5.

9. Vati Vakaleho va Yehova va muesa ngecize ve ku linga cipanga ca ku ambulula na vutumbe vua cili?

⁹ Vuno Vakaleho va Yehova ve ku lomba vimbongo ku vantu ku Vindzivo viavo via Vuangana, na ku viuano via muhato ni? Houe! Vipanga viavo ve ku vi linga ku hitila mu milambu ya vuana. (2 Kolintu 9:7) Muaka uali, Vakaleho va Yehova va na pangele kampe 2 bilhões (billion) ya vi ola mu ku ambulula muzimbu ua cili, kaha na ku endesa vilongesa via Mbimbiliya vi tuvakana 9 milhões (million) mu ngonde. Ka ve ku va fueta omo lia ku ambulula cavo, vunoni va kala na ndzolela ya ku pangesa vimbongo viavo vavene mu ku linga eci cipanga. Umo mukua ku tondesesa mizimbu ua handekele ha cipanga ca Vakaleho va Yehova ngueni: “Vutumbe vuavo vua pua ku ambulula na ku longesa.” Kaha naua ua handekele ngueni Vakaleho  va Yehova ka va kele na ntuamalutue u ve ku fueta vimbongo. Nga ka tue ku ambulula omo lia vimbongo, kaha vika tue ku ambuluila? Tua lema ku linga eci cipanga ku cizango muomu tua lema Yehova kaha tua lema vantu. Eci cizango ce ku puisamo vupolofeto vuli ku Visamo 110:3. (Tandenu.)

10. Vinjila vika Yesu na vandongesi veni va pangesele mu ku ambulula?

¹⁰ Vinjila vika Yesu na vandongesi veni va pangesele mu ku ambulula? Va kele na ku ya kuose ku va kele na ku uana vantu. Ca ku muenako, va kele na ku ambuluila mu vitapalo na ku vitanda. Kaha naua va tondele vantu ku vindzivo viavo. (Mateo 10:11; Luka 8:1; Vilinga 5:42; 20:20) Ku ambulula ku ndzivo na ndzivo ya puile njila ya cili ya ku heta ku vantu va vifua viose.

11, 12. Ku tuala ku via ku ambulula muzimbu ua cili, haka viendele vipanga via vakua Malombelo ku vi seteka na via vantu va Yehova?

¹¹ Vuno Malombelo eku litumbula ku pua Vakua Kilistu eku ambulula muzimbu ua cili ngue mua lingile Yesu ni? Houe, muomu akeo eku fueta valongesi vavo. Valongesi vavo ka ve ku linga vandongesi va vaha, ve ku longesa lika vaze va liko laza. Vintsimbu vimo ve ku seteka ku leka vantu vavo linga va ambulule. Ca ku muenako, mu muaka ua 2001, Papa João Paulo II ua sonekele mu mukanda ngueni vantu vose mu tembele va pande ku ambulula na ku muesa ntuima ngue ya kapostolo Paulu mua handekele ngueni: “Ngongo yange nga ka nja ambulula muzimbu ua cili.” Papa ua vuezeleko naua ngueni kati vamo lika va na pande ku ambulula vunoni vantu vose vakua ku tava. Vunoni va vandende lika va tavele cimamuna ceni.

¹² Amba Vakaleho va Yehova co? Vakevo lika ve ku ambulula nguavo Yesu va mu vialeka ha Vuangana, kaha ali na ku sika muilu tunde mu 1914. Ve ku ononoka Yesu, kaha va tuameka ku lutue cipanga ca ku ambulula mu miono yavo. (Mako 13:10) Limo livulu ngualio ku ambulula ca pua cipanga ca seho ya kama ku Vakaleho va Yehova. Lia handekele naua ngualio mu ve ku uana vantu vali mu ndzala, vulika, na ku vavala ve ku seteka ku kuasa, vunoni ka ve ku suva ngecize kapandi kavo ka pua ku ambulula via ku kotoka ca mavu ano na ku longesa vantu via ku ovoka. Vakaleho va Yehova kasi ve ku ambulula ou muzimbu uaco na ku kava vinjila via kele na ku ambuluilamo Yesu na vandongesi veni.

13. Cipanga ca ku ambulula ca pande ku ka heta na kulihi?

¹³ Yesu ua handekele ngueni vandongesi veni va ka ambulula na ku longesa muzimbu ua cili “mu mavu ose.” Ua va tumine ku puisa vantu vandongesi mu “vifuti viose” (Mateo 24:14; 28:19, 20) Eci ca lomboloka ngecize muzimbu ua cili u tondeka ku u ambulula mu mavu ose.

14, 15. Vusunga vuka vu muesa ngecize Vakaleho va Yehova vali na ku puisamo vupolofeto vua Yesu ku tuala hendela cipanga cavo? (Talenu cikupulo ku vuputukilo)

¹⁴ Vakaleho va Yehova lika vali na ku puisamo vupolofeto vua Yesu vua ku ambulula muzimbu ua cili mu mavu ose. Vika tu handekela ngoco? Mu Estados Unidos, mua kala valongesi va malombelo va heta ku 600,000 vunoni mua kala Vakaleho va Yehova va heta ku 1,200, 000 ve ku ambulula. Kaha mu mavu ose mua kala va sasendote va Katolika 400,000, vunoni kua kala Vakaleho va Yehova va ku pua 8 milhões (million) vali na ku ambulula muzimbu ua cili mu vifuti 240. Mua vusunga eci ce ku hana kasingimiko na ku sangaziala Yehova!​—Visamo 34:1; 51:15.

¹⁵ Mu ku pua Vakaleho va Yehova, vutumbe vuetu vua pua ku ambulula muzimbu ua cili ku vantu va vengi ntsimbu kanda ku kotoka ca  mavu ci hete. Linga tu puisemo eci cipanga tu na langulula makulukazi na makulukazi a mavulu, mikanda, tumikanda na vilanio via ciuano ca muhato hamo na vilanio via Mulalelo mu malimi a tuvakana 700. Tue ku hana vilanio via vuana ku vantu. Muaka u na hiti ngeci, tua tuhuile kampe 4.5 bilhões (billion) ya mikanda ya handeka via Mbimbiliya. Tu na hasa ku tuhula vi Mbimbiliya via tuvakana 200 milhões (million) ya Tradução do Novo Mundo da Biblia Sagrada (NW) mu malimi a tuvakana 130. Kaha site yetu iva tavesa ku masiko ya kala na vilongesa, ili mu malimi a tuvakana 750. Mua vusunga, Vakaleho va Yehova lika va li na ku linga eci cipanga ca ku komouesa ngeci.

16. Vati tua tantekeya nguetu Vakaleho va Yehova va kala na sipilitu ya Njambi?

¹⁶ Ku ambulula ca pande ku kalako noho ntsimbu ika? Yesu ua handekele ngueni muzimbu ua cili va ka u ambulula noho ku kotoka ca mavu ci hete. Mu ku pua Vakaleho va Yehova, tua kolesa mu cipanga eci ca ku ambulula mu matangua ano a ku kotokela muomu tua kala na sipilitu santu ya Yehova. (Vilinga 1:8; 1 Petulu 4:14) Vamo vakua malombelo va hasa ku lipamba nguavo: “Tua kala na sipilitu santu.” Vuno vali na ku hasa ku linga cipanga ci ve ku linga Vakaleho va Yehova mu matangua ano a ku kotokela ni? Vimo vivunga via malombelo via seteka ku temunuina ku ambulula cetu, vunoni va na honoua. Vamo co va kala na cizango ca ku ambulula vunoni mu ntsimbu ya indende lika. Kasi vamo va hasa ku ambulula ku ndzivo na ndzivo, vunoni ka ve ku ambulula muzimbu ua cili ua Vuangana. Ngeci mukemuo ka va hasa ku linga cipanga ca putukile Yesu.

17, 18. (a) Vati tua tantekeya nguetu Vakaleho va Yehova lika vali na ku ambulula muzimbu ua cili ua vuangana matangua ano? (b) Vati tuli na ku hasa ku puisamo ku tualelelaho ku ambulula?

¹⁷ Veya mpundu vali na ku ambulula muzimbu ua cili ua Vuangana matangua ano? Vakaleho va Yehova lika ku nahu! Vati tua tantekeyamo? Muomu tuli na ku ambulula muzimbu u tondeka, muzimbu ua cili ua Vuangana. Tue ku ya na ku tonda vantu, ngeci tue ku ambulula mu njila ya cili. Tua kala na vutumbe vua cili, muomu tua lema Yehova na vakuetu. Cipanga cetu ca ku ambulula ca hete ku vihela via vingi, muomu tue ku ambuluila ku vantu va vifuti viose na malimi ose. Kaha tu ka tualelelaho ku ambulula muzimbu ua cili ua Vuangana noho ku kotoka ci keza!

¹⁸ Mua vusunga ce ku tu komouesa cikuma ku mona cipanga ci vali na ku puisamo vantu va Yehova ca ku ambulula muzimbu ua cili mu matangua ano a ku kotokela. Vuno vati tue ku puisamo eci cipanga? Kapostolo Paulu ua lomboluele ngueni, Njambi ikeye ali na ku panga muli etu kaha ue ku tu hana cizango na ngolo ya ku vi puisamo. (Filipu 2:13) Nguetu Yehova a tualeleleho ku tu hana ngolo i tondeka linga tu pange na ngolo yetu tu tualeleleho ku ambulula muzimbu ua cili!​—2 Timoteo 4:5.