Kua kala vimamuna via vingi ku tuala ha cimpande eci. Vunoni kati viose via cili. Ca ku muenako, halumo muntu a hasa ku mi leka ngecize ka mua pandele ku lila cipue ni ku solola vika muli na ku ivua. Vamo co va hasa ku mi leka nguavo mua pande ku muesa viose vi muli na ku ivua. Vunoni Mbimbiliya ya solola vusunga ku tuala ha cimpande eci, kaha mizimbu yaco ya litombola na vakua ku tondesesa va matangua ano.

Ku visemua vimo nguavo yala ka pandele ku lila. Vuno kuli viuma via pande ku lingisa muntu ku hona ku uisa masozi cipue ha mbunga ni? Vakua ku tala via cihindu ca mu visinganieka nguavo ku lila ka ca puile citanga. Kaha ku lila ci hasa ku kuasa muntu ku kolesa mu ku hita ca ntsimbu. Vunoni vusiua vua manene vu hasa ku vulumuna. Mbimbiliya ka ye ku hakuila vilongesa via ku linga nguavo muntu ka pandele ku uisa masozi nga ali mu vusiua. Aci singaniekenu hali Yesu. Vutuhu ua kele na ngolo ya ku sangula, kasi ua lilile ku-tsa ca kavusamba keni Lazalu!​—Yoano 11:33-35.

Vintsimbu vimo vantu ve ku linienga na vutenu, cikumakuma nga ku-tsa ca muntu ci na pu  ca ku tungumuna. Kua kala vusunga vua vuingi vue ku lingisa mukua ku tsisa ku tenuka, ngeci mua mezi a misende ni vihandeka via vamo vantu va tua singimika. Umo yala ua lizina Mike ua tsisile va ise ku Africa do Sul ua handekele ngueni: “Tata ua tsile tele nji li na miaka 14. Ha litangua lia ku tsinda Mukuluntu ua vulombelo ua handekele ngueni, Njambi ua tonda vantu va cili ngeci ue ku va tambula vua lumo. * Aa mezi a nji nienguesele cikuma muomu tua tondele tatetu. Mua hiti miaka 63, vunoni kasi vie ku nji vavala ha mutima.”

Vati co nga mu livua mulonga? Cikumakuma nga ku-tsa ca mponde, mukua ku tsisa ntsimbu yose ue ku liveya ngueni, ‘nga nja lingile viuma mu njila yeka halumo nga ka via lingikile.’ Ni halumo mua licokotele neni ntsimbu tele kanda a tse. Eci ci hasa ku mi lingisa ku livua mulonga mpundu.

Nga muli na ku lua na visinganieka via cifua eci na matoto, kati ca cili ku vi tulika ku mutima. Cili ku lutue, mu handeke na kavusamba uze a mi halakana, kaha a ka mi simpisa ngecize visinganieka via cifua eci uose ue ku tsisa ue ku kala navio. Mbimbiliya ya tu vuluisa nguayo: “Kavusamba a lema ntsimbu yose; na muanetu na semuuila mu ku kuasa ku lamba.”​—Visimo 17:17.

Kavusamba ua kama ya hasa ku kala neni muntu na tsisa ua pua Sakatanga uetu Yehova Njambi. Sokololenu mutima uenu kuli Yehova mu civundilo muomu “ikeye a mi lela.” (1 Petulu 5:7) Cikuavo naua, ua likuminia ngueni vose va lingamo va ke vua ku simpa mu ku tambula “ciyulo ca Njambi cize ca hiana mana ose.” (Filipu 4:6, 7) Tavenu vukuasi vua Njambi ku hitila mu Lizi Lieni Mbimbiliya, i mi lembezieke. Sonekenu imo mikanda ya ku kaniamesa. (Talenu mu  cikasa mikanda ye ku simpisa.) Citava mu patekeye imo mikanda yaco. Ku singanieka ha visoneka via cili ci hasa ku kaniamesa, cikuma vutsiki nga muli na cilavulavu.​—Isaya 57:15.

Umo yala ua miaka 40 u tu luka lizina lia Jack, ua tsisile mpueyeni ku cancer. Jack ngueni ntsimbu imo ue ku ivua vulika. Vunoni ue ku uana vukuasi mu civundilo. Ua handekele ngueni: “Hamo nje ku hinduka vutsiki muomu tulo tuahi. Vunoni nga nji vundila kuli Yehova, ka nje ku ivua naua vulika. Kaha mu nima ya ku tanda Mbimbiliya na ku hilula visoneka, na ku tumbula visoti via mutima uange mu civundilo, nje ku ivua ciyulo na ku lembama, nje ku tula mutima na ku kosa.”

Umo muana mpuevo ua lizina Vanessa ua tsisile va naye mu vuvezi. Neni ua vuile ngolo ya civundilo. Ua handekele ngueni: “Mu nje ku ivua vusiua vua nji lanena, nje ku tumbula lika ha lizina lia Njambi na ku lila. Yehova ua vuile vivundilo viange ntsimbu yose kaha ua njiku kaniamesele mu ntsimbu yaco.”

Vamo vakua ku lembezieka vakua ku lua na vusiua ve ku mamuna vakua ku tsisa ku lihaka mu ku kuasa vakuavo ni ku pangesa ntsimbu yavo mu ku linga vipanga via vuana mu membo. Ku lingamo ci hasa ku vuisa ndzolela na ku suvisa vusiua. (Vilinga 20:35) Cingi ca Vakua Kilistu va tsisa va na limuena ngecize, ku linga vipanga via ku kuasa vakuavo ce ku va kaniamesa na ku va simpisa.​—2 Kolintu 1:3,4.