1, 2. (a) Vati Vakaleho va Yehova ve ku muenamo Mbimbiliya? (b) Mutamba uka ua Mbimbiliya mua lema cikuma?

MU ku pua Vakaleho va Yehova, tua lema Mbimbiliya. Muomu ye ku tu lembezieka, na ku tu hana lulavelelo hamo na vimamuna vi tu hasa ku tsiliela. (Loma 15:4) Mbimbiliya ka ya puile livulu lia visinganieka via vantu, vunoni “lizi lia Njambi.”​—1 Tesalonika 2:13.

² Tu vose tua lema umo mutamba ua Mbimbiliya. Vamo va lema mikanda ya Muzimbu ua Cili ua handeka via Yesu, muomu ye ku solola vifua via cili via Yehova ku hitila muli Yesu. (Yoano 14:9) Vakuavo co va lema mavulu a vupolofeto ngeci mua Ku-Solola, livulu lia muesa “viuma vize vi na pande ku soloka ku ntsimbu ya indende.” (Ku-Solola 1:1) Kaha vamo ve ku uana ku va lembezieka mu ve ku tanda Visamo, kasi vamo ve ku uana vinguli na vukuasi mu ve ku tanda livulu lia Visimo. Mua vusunga, Mbimbiliya ya pua livulu lia vantu vose.

3, 4. (a) Vati tue ku muenamo mikanda yetu? (b) Mikanda ika tue ku tambula i ve ku viukisila vantu va cimo citso?

³ Mu ku linga tua lema Mbimbiliya, tua lema naua mikanda yetu muomu vilongesa viayo via tunda mu Lizi lia Njambi. Mavulu ose, mikanda na vikuavo vi tue ku tambula via pua vilongesa via ku tunda  kuli Yehova. Kaha vie ku tu kuasa ku suena mu hiehi neni na ku tu kolesa mu lutsilielo.​—Tito 2:2.

⁴ Cingi ca mikanda ve ku i sonekela yetu Vakaleho va Yehova. Vunoni, kuli mikanda i ve ku sonekela vantu va citso cimo ngeci mua visemi ni vana. Cingi ca vilongesa na vivideo via mu site ve ku vi viukisila cikuma vantu vaze ka va puile Vakaleho va Yehova. Vilongesa viaco vie ku muesa ngecize Yehova ue ku puisamo cikulaheso ceni ca ku longesa vantu vose.​—Isaya 25:6.

5. Tu hasa ku kala na vusunga nguetu Yehova ua lema vika?

⁵ Cingi cetu tue ku tonda ku uana ntsimbu ya ku puamo linga tu tande Mbimbiliya na mikanda yetu. Ngeci halumo ka tue ku hasa ku pangesa ntsimbu ya ku pua hamo mu ku lilongesa nkala mukanda u tue ku tambula. Tu hasa ku kala na vusunga nguetu, Yehova ue ku viukilila mu tue ku pangesa vuino ntsimbu yetu, mu ku tanda na ku lilongesa Mbimbiliya na mikanda yetu. (Efeso 5:15, 16) Vunoni kuli vimo visinganieka vi tua pande ku viana. Visinganieka vika?

6. Vika vi hasa ku tu tangula ku uana vukuasi mu vilongesa via Yehova?

⁶ Nga ka tu zangama, tu hasa ku singanieka ngecize imo mikanda ya mu Mbimbiliya ni umo ua mikanda yetu ka va u sonekele yetu. Ca ku muenako, vati co nga vimo vinimbu via mu Mbimbiliya ka via litombuele netu? Ni vati co nga ka tuesi ha citso ca vaze va va na sonekela mukanda uaco? Vuno tue ku tanda mizimbu yaco vuasi-vuasi ni ka tue ku i tanda yose? Nga tue ku singanieka ngoco, vilongesa via seho ya kama vize via pande ku tu kuasa vie ku tu hita. Vati tu hasa ku viana visinganieka viaco? Tua pande ku vuluka ngecize vilongesa viose vi tue ku tambula vie ku tunda kuli Yehova. Muomu Mbimbiliya nguayo: “Ange nji Yehova Njambi yove, Uze a ku longesa vize vi silivila.” (Isaya 48:17) Mu cilongesa cino tu ka lilongesa vimamuna vitatu vi ka tu kuasa ku tambula vilongesa viose vie ku tu hana Yehova.

7. Omo lia vika tua pande ku tanda Mbimbiliya na mutue ua ku sokolola?

⁷ Tandenu na mutue ua ku sokoloka. Mua vusunga mitamba imo ya mu Mbimbiliya va i sonekela ku muntu umo ni cimo civunga ca vantu. Vunoni Mbimbiliya ya muesa mpundu nguayo “visoneka viose via na tumbula Njambi na muku ueni, vi silivila ku longesa.” (2 Timoteo 3:16) Ngeci mukemuo tua pande ku kala na mutue ua ku sokoloka nga tu tanda Mbimbiliya. Umo muanetu a vuluka ngecize ngueni a hasa ku lilongesa viuma via vingi ha umo mukanda. Eci ca mu kuasele ku lilongesa viuma via vikalu ku vi ivuisisa. Ngeci mukemuo, ntsimbu kanda tu tande Mbimbiliya, tua pande ku vundila Yehova a tu hane mangana na ku kala na mutue ua ku sokoloka linga tu ivuisise vilongesa via tonda tu vi tantekeye.​—Ezela 7:10; tandenu Tiango 1:5.

8, 9. (a) Omo tu tanda Mbimbiliya vihula vika tua pande ku lihula? (b) Vifua via tondeka ku vakuluntu va cikungulukilo vi tu longesa vika hali Yehova?

⁸ Lingenu vihula. Omo mu tanda Mbimbiliya puenu na ku lihulenu nguenu: ‘Vika evi vi nji longesa hali Yehova? Vati nji hasa ku pangesa ou muzimbu mu muono uange? Vati nji hasa ku pangesa ou muzimbu linga nji kuase vakuetu?’ Nga tu hilula ha vihula evi, tu ka uana vukuasi vua vuingi mu ku tanda Mbimbiliya. Tu ci talenu ha lumo lungano. Mbimbiliya ya lekesa vifua vimo via tondeka ku vukuluntu va Vakua Kilistu. (Tandenu 1 Timoteo 3:2-7.) Cingi cetu ka tua puile vakuluntu mu cikungulukilo, halumo tu hasa ku singanieka ngecize mizimbu yaco ka i hasa ku tu kuasa. Vunoni tu pangesenu vihula vitatu vi tu na tumbula tu mone vati ou mukana ua vifua evi u hasa ku tu kuasa tu vose.

 ⁹ “Vika evi vi nji longesa hali Yehova?” Yehova ua tu hana mukana ua vifua vi tondeka ku vakuluntu va cikungulukilo. Ua tumbika viuma via seho ya kama vitondeka ku vamala ve ku tuamenena cikungulukilo. Eci ca muesa ngecize cikungulukilo ca kala na seho ya kama kuli Yehova. Mbimbiliya nguayo ua ci landele na “maninga” a Muaneni. (Vilinga 20:28) Ngeci Yehova a tonda vakuluntu va cikungulukilo va pue lungano lua cili, kaha tangua va ka litavela ha cifua ci ve ku niungilamo vose mu cikungulukilo. A tonda tu ivue ngecize tuli mu vuvando vuavo. (Isaya 32:1, 2) Nga tu tanda evi vifua, tu ka lilongesa vati Yehova ue ku tu niunga mpundu mu vusunga.

10, 11. (a) Nga tu tanda vifua vi tondeka ku vakuluntu, vati tu hasa ku pangesa muzimbu uaco mu muono uetu? (b) Vati tu hasa ku pangesa ou muzimbu uaco linga tu kuase vakuetu?

¹⁰ “Vati nji hasa ku pangesa ou muzimbu mu muono uange?” Nga mua pua laza mukuluntu mu cikungulukilo, mua pande ku hituluka ntsimbu yose mu mukana ua vifua evi na ku lihakela kapandi ka ku vi kava. Nga mu “lengeya vipanga via vukuluntu,” mua pande ku linga cose mu puisemo evi vifua. (1 Timoteo 3:1) Vunoni vose Vakua Kilistu va hasa ku lilongesa evi vifua viaco. Ca ku muenako, Yehova a tonda nkala muntu a pue ua ku konkama na ku kala na mana a cili. (Filipu 4:5; 1 Petulu 4:7) Nga vakuluntu va pua lungano ni nguetu “citambuluiso ku vutanga,” tu hasa ku lilongesa kuli vakevo na ku temunuina “ku-tsiliela cavo.”​—1 Petulu 5:3; VaHevelu 13:7.

¹¹ “Vati nji hasa ku pangesa ou muzimbu linga nji kuase vakuetu?” Tu hasa ku pangesa mukana ua vifua via tondeka ku vakuluntu va cikungulukilo, linga tu kuase vandongesi va Mbimbiliya na vaze ve ku muesa cizango, linga vevuisise ku litepa ca kala ha kati ka vakuluntu va cikungulukilo ca Vakua Kilistu na vakuluntu va malombelo a makuli. Ou mukana ua vifua u hasa naua ku tu kuasa ku vuluka ku fuitangana ca vakuluntu va cikungulukilo. Kaha eci ci ka tu kuasa ku singimika ava vamuanetu. (1 Tesalonika 5:12) Nga tu va singimika ntsimbu yose, va ka kala na ndzolela ya kama ku cipanga cavo.​—VaHevelu 13:17.

12, 13. (a) Mu ku pangesa vikuata vi tuli navio, ku tondesesa ca cifua cika tu hasa ku linga? (b) Muesenu vati mizimbu ya ku laza i hasa ku solola vilongesa vize ka via puile via viasi ku vi nongonona mu vuasi.

¹² Puenu na ku tondesesa. Omo tu pua na ku lilongesa Mbimbiliya, tu hasa ku tonda vikumbululo via vihula vino:

• Iya ua sonekele ou mutamba ua Mbimbiliya?

• Kuiko va u sonekele kaha ntsimbu ika?

• Viuma vika via seho via kele na ku soloka mu va sonekele eli livulu?

Mizimbu yaco i hasa ku tu kuasa ku mona vilongesa vize ka via puile via viasi kuli etu ku vi nongonona mu vuasi.

¹³ Ca ku muenako, mukanda ua Ezekiele 14:13, 14 nguauo: “Omo cifuti cimosi ci vulumuna kuli ange mu ku linga civulumuna cimosi, kaha ange nji ci oluela livoko liange, na ku vatula mulamu ua mbolo yaco, na ku ci tumisa ndzala, na ku ci vatuila muntu na kasitu; vutuhu vamala ava vatatu, Noa, Ndaniele, na Yombi, vakelemo, nga vohielele miono yavo lika na vuviuke vuavo, ngueni Sukulu Yehova.” Nga tu tondesesa vuino mizimbu yaco, tu ka mona ngecize Ezekiele ua sonekele aa mezi kampe miaka ya ku pua 612 tele Kilistu kanda a semuke. Vunoni Noa na Yombi tele va tsa laza vihita via miaka ku nima, kasi Yehova ua vulukile vuoloke vuavo. Ku ntsimbu ize Ndaniele tele a yoya. Kaha tele a lingila ku puisa miaka 20 Yehova mua handekele ngueni ua puile mukua vuoloke ngeci mua Noa na Yombi. Vika tu lilongesaho? Yehova ue ku mona na ku haka seho ku vangamba veni va vuoloke hamo lika na vanike vakuendze.​—Visamo 148:12-14.

14. Vukuasi vuka ve ku uana vakuendze mu mikanda iva va sonekela? Kaha vukuasi vuka va hasa ku uanamo vakua citso ceka? (Talenu cikupulo ca ku vuputukilo.)

¹⁴ Mikanda i va sonekela vakuendze. Tu na lilongesa ngecize tu hasa ku uana vukuasi mu mitamba yose ya Mbimbiliya. Na vuno vene, tu hasa ku uana vukuasi mu mikanda yetu yose i tue ku tambula. Tu ci talenu ha mizimbu imo. Mu miaka i na hiti ngeci, Yehova na hana mizimbu ya ingi ku vakuendze. ^[1] (Talenu mezi a ku ntsongo ya cilongesa.) Eyi mizimbu yaco ye ku va kuasa ku vula ntsindiye ya vakuavo ku sikola na vitanga vikuavo omo lia ku kola. Vunoni vati tu vose tu hasa ku uana vukuasi mu ku tanda evi vilongesa na mavulu aco? Nga tu tanda mizimbu yaco, tu ka tantekeya visoti vi ve ku lihita navio vakuendze, kaha ci ka pua ca cili ku va kuasa na ku va kaniamesa.

15. Omo lia vika vakuluntu Vakua Kilistu va pande ku haka seho ku mizimbu i va sonekela vakuendze?

¹⁵ Vakuluntu Vakua Kilistu ka va pandele ku sembulula mizimbu i va sonekela vakuendze omo va i tanda. Muomu cingi ca visoti vi va handeka mu vilongesa viaco viose via kuata ku Vakua Kilistu vose. Ca ku muenako, tu vose tua pande ku hakuila vi tua tsiliela, ku niunga vizango vietu, ku viana viuma via ntsindiye, ku viana vusamba vua vupi na vueho vua vupi. Vutuhu mikanda yaco va i sonekela vakuendze, mizimbu i limo ya tunda mu Mbimbiliya kaha i hasa ku kuasa Vakua Kilistu vose.

16. Mikanda yetu i hasa ku kuasa vakuendze ku linga viuma vika vikuavo?

¹⁶ Mikanda i va sonekela vakuendze i hasa ku va kuasa ku kaniamesa vusamba vuavo na Yehova. (Tandenu Ekelesiaste 12:1, 13.) Kaha na vakuluntu navo va hasa ku uanamo vukuasi. Ca ku muenako, mu Despetai! (Awake!) ya Abril ya 2009, mua kele cimo cilongesa ca “Os Jovens Pergutam (Young People Ask ). . .Vati nji hasa ku tovalesa ku tanda Mbimbiliya?” Cilongesa caco ca kala na vukuasi vua vimo vimamuna kaha na cikasa cize citava ku ci tavulamo na ku ci pangesa mu ku lilongesa. Vuno vakuluntu navo va na uana vukuasi mu cilongesa caco ni? Umo cisemi ua mpuevo ua handekele ngueni ku tanda Mbimbiliya ca mu kaluuilile ntsimbu yose. Ngeci ua kavele vimamuna via cilongesa caco, ntsimbu ino ua lema ku tanda Mbimbiliya, kaha ue ku viukilila ku mona vati mikanda ya mu Mbimbiliya ya litombola, eci ce ku mu lingisa ku ivuisisa vuino viuma. Ua handekele  naua ngueni, “Kanda nji ivue ndzolela mu ku tanda Mbimbiliya ngeci mua hano.”

17, 18. Vati tu hasa ku uana vukuasi mu ku tanda mikanda i va sonekela mbunga? Hanenu lungano.

¹⁷ Mikanda i va sonekela mbunga. Tunde mu muaka ua 2008 tue ku viukilila ku lilongesa Vutala vua Kaniungi. Mikanda yaco ve ku i sonekela cikuma etu Vakaleho va Yehova. Vunoni kuli naua ikuavo i va sonekela mbunga lika. Vukuasi vuka tu hasa ku uanamo? Aci singaniekenu ha lungano luno. Nga mu na laniene muntu kuiza ku Ndzivo ya Vuangana kaha neza. Mua vusunga mue ku kala na ndzolela. Kaha omo mukua ku ambulula ali na ku hana cimpande, mue ku singanieka ha ngendzi yenu. Halumo mu komoka vati ali na ku livua ku tuala ha viuma vi ali na ku halakana na vati muzimbu uaco u hasa ku alulula muono ueni. Kaha mu nima ya viose, mue ku ivua ndzolela mu mutima na ku muesa ku santsela ku cimpande caco.

¹⁸ Na vuno vene, netu vi hasa ku tu solokela nga tu tanda mikanda i ve ku sonekela mbunga. Ca ku muenako, Vutala vua Kaniungi vua ku mbunga na vilongesa via mu jw.org via lombolola Mbimbiliya mu ku pangesa mezi a asi ku evuisisa. Nga tu tanda eyi mizimbu, tu ka vueza ku ku ivuisisa cetu na ku lema vusunga vua Mbimbiliya vu tu tantekeya vuino. Kaha naua, tu hasa ku lilongesa vinjila via viha mua ku lomboluela vi tua tsiliela mu ku ambulula. Mukanda ua Despertai! (Awake!) nauo ue ku tu kaniamesa mu viuma vi tua tsiliela, ngecize kua kala Sakatanga. Cikuavo naua ue ku tu kuasa ku lilongesa ku hakuila vi tua tsiliela.​—Tandenu 1 Petulu 3:15.

19. Vati tu hasa ku muesa ku santsela cetu kuli Yehova omo lia vilongesa vie ku tu hana?

¹⁹ Mua vusunga, Yehova na tu hana vimamuna na vilongesa via vingi mu ku tu kuasa. (Mateo 5:3) Tu tualelelenuho ku tanda na ku pangesa mizimbu yose ya tu hana. Nga tu lingamo, vi ka tu kuasa kaha tu ka muesa Yehova ngecize tue ku santsela ku viose vie ku tu hana.—Isaya 48:17.