1. Tumbulenu masiko amo a mu Mbimbiliya kaha ku vezika cika tu hasa ku uana mu ku ononoka?

YEHOVA ua tu hana masiko mu Mbimbiliya eku tu vindika mpundu vize ka tua pandele ku linga. Ca ku muenako, ua tu vindika ku lemesa tumponia, ku punda, ku penda, ni ku linga viuma via likuata ku vupangala. (1 Kolintu 6:9, 10) Kaha Yesu Muana Yehova ua hele lisiko ku vakua ku mu kava ngueni: “Puisenu vantu vose vandongesi vange na ku va mbatiza mu lizina lia Ise na Muana na sipilitu santu: na ku va longesa ku niunga viuma viose vi nja mi sikile: kaha talenu, yange nji li nenu matangua ose, na ha ku-kotoka ca miaka.” (Mateo 28:19, 20) Viose vie ku tu leka Yehova na Yesu nguavo tu vi linge, vie ku tu kuasa. Masiko a Yehova eku tu longesa vati tu hasa ku litala etu vavene na vakua ndzivo yetu, kaha eku tu kuasa ku kala na cihindu ca cili na ndzolela. Cikuavo ca seho ya kama, ca pua ku ononoka masiko a Yehova aze ambatela kumo na lisiko lia ku ambulula, kaha ue ku viukilila na ku tu vezikisa.

2, 3. (a) Omo lia vika Mbimbiliya ka ya kele na masiko a viose vi tue ku lihita navio mu muono? (b) Vihula vika tu ka lilongesa mu cilongesa cino? (Talenu cikupulo ca ku vuputukilo)

² Ha ntsimbu yaco naua, Mbimbiliya ka ya tu hele masiko ku tuala  ha nkala cisoti ca mu muono. Ca ku muenako, mu Mbimbiliya ka tu hasa ku uanamo cimamuna cimo ca muesa mpundu vuzalo vuka tua pande ku zala. Eci ca solola mana a kala nao Yehova. Vutuhu cifua ca vuzalo ce ku aluluka ntsimbu yose kaha vantu mu mavu ose ve ku zala vuzalo mua ku liseza-seza, Mbimbiliya ka ye ku aluluka. Cikuavo naua, ka ya kele na masiko a engi ku tuala ha cipanga ni vueho vu tua pande ku hangula, ni vi tua pande ku linga mangana tu kale na cihindu ca cili. Vunoni Yehova ua tavesa nkala muntu na mitue ya vindzivo ku linga vutumbe ku tuala ha viuma evi.

³ Ngeci mukemuo nga tu hangula viuma via seho ya kama vize vi hasa ku alulula muono uetu, kaha ka kuesi lisiko mu Mbimbiliya ku tuala ha vutumbe vuaco, halumo tu hasa ku lihula nguetu: ‘Vuno Yehova na leme vutumbe vu nji na lingi ni? Vuno a kevua ndzolela ku viose vi nji hangula ku linga ambe ka nja pokuele lisiko lia mu Mbimbiliya ni? Vati nji hasa ku kala na vusunga ngecize a kevua ndzolela ku nkala vutumbe vu nji ka linga?’

4, 5. Vati vihangula vietu vi hasa ku kuata ku muono uetu na ku vakuetu?

⁴ Vantu vamo ve ku singanieka nguavo va hasa ku linga viose vi va tonda. Vunoni etu tu tonda ku vuisa Yehova ndzolela. Ngeci mukemuo ntsimbu kanda tu hangule vimo, tua pande ku singanieka ha viuma vi ya handeka Mbimbiliya na ku vi ononoka. Ca ku muenako, Mbimbiliya ya tu leka vati Njambi ue ku ivua ku tuala ha ku pangesa maninga, ngeci tue ku kava vi ya handeka. (Njenisisi 9:4; Vilinga 15:28, 29) Tu hasa ku vundila Yehova a tu kuase ku hangula viuma vize vi ka mu vuisa ndzolela.

⁵ Vi tue ku hangula vie ku kuata ku muono uetu. Vutumbe vua cili vu hasa ku tu kuasa ku suena mu hiehi na Yehova. Kaha vutumbe vua ku pihia vu hasa ku pihisa vusamba vuetu neni. Cikuavo naua vi tue ku hangula vi hasa ku kuata vantu veka. Ngeci ka tu tondo ku linga viuma vi hasa ku luvalesa vamuanetu ni ku va zeyesa mu lutsilielo, kaha naua ka tu tondo ku koka visoti ha kati ka vamuanetu mu cikungulukilo. Ngeci ca pua ca seho ya kama kuli etu ku linga mavutumbe a cili.​—Tandenu Loma 14:19; Ngalata 6:7.

6. Vika via pande ku tuamenena vi hangula vietu?

⁶ Nga Mbimbiliya ka i tu leke vi tua pande ku linga mpundu, vati tu hasa ku hangula ku linga via cili? Mu cihela ca ku lihanguila ku linga viose ovio vi tu tonda, tua pande ku singanieka vuino ha citanga cetu na ku hangula ku panga viuma mu njila ika ya Yehova ku mutima. Kaha tu ka kala na vusunga nguetu a ka tu kuasa ku hangula via cili.​—Tandenu Visamo 37:5.

7. Vati tu hasa ku tantekeya via tonda Yehova tu vi linge ha viuma ka viesi na lisiko mu Mbimbiliya?

⁷ Vati tu hasa ku tantekeya vi ka vuisa Yehova ndzolela? Mukanda ua Efeso 5:17 ua tu leka nguauo: “Tantekeyenu cizango ca Muangana [Yehova].” Nga ka kuesi lisiko mpundu mu Mbimbiliya, tua pande ku tantekeya ni ku ivuisisa via tonda Yehova tu vi linge, nga kua soloka vimo. Vati tu hasa ku lingamo? Tua pande ku mu vundila na ku tava sipilitu santu yeni i tu tuamene.

8. Vati Yesu ua tantekeyele via tondele Yehova a vi linge? Tumbulenu lungano.

⁸ Yesu ntsimbu yose ua tantekeyele via tondele Yehova ngueni a vi linge. Ca ku muenako, mu vintsimbu via ku pua vivali omo vivunga via kele na ndzala, Yesu ua vundilile, kaha ua va lisile ku hitila mu cikomoueso. (Mateo 14:17-20; 15:34-37) Kaha omo ua vuile ndzala mu vindinda, Satana ua tondele linga alulule mavue ku pua mbolo, vunoni Yesu ua vianene. (Tandenu Mateo 4:2-4.) Ua tantekeyele mua cili Ise, ngeci ua tantekeyele ngecize Yehova ka tondele linga a pangese sipilitu santu ku viuma via tondele. Ua kele na  vusunga ngecize Ise a ka mu niunga na ku mu hana via-ku-lia ha ntsimbu i via tondekele.

9, 10. Vika vi ka tu kuasa ku linga mavutumbe a ku zangama? Hanenu cimueso.

⁹ Ngeci mua Yesu, netu tu hasa ku hangula via cili nga tu tsiliela muli Yehova a tu niunge. Mbimbiliya nguayo: “Tsiliela Yehova na mutima uove uose, kaha kati u zendamene ku mana ove ivene: Mu zinjila ziove ziose mu tave ikeye, kaha ikeye a ka ku inikila zinjila ziove. Kati u zangame ku meso ove ivene; zuzukila Yehova, kaha fuma ku vupi.” (Visimo 3:5-7) Nga tu lilongesa Mbimbiliya na cifua ce ku singanieka Yehova, tu kevuisisa via tonda tu vi linge mu cimo citanga. Kaha omo tu lilongesa via vingi ku tuala ha vati ue ku singanieka Yehova, ci ka tu puila ca casi ku hangula ku linga vize vi ka mu vuisa ndzolela. Nga tu lingamo, tu ka pua va ku ‘ononoka ku vimamuna via Njambi.’​—Ezekiele 11:19.

¹⁰ Aci singaniekenu, nga ndumbuetu ua ku somboka ali mu ku landa, kaha a mona visapato via cili via lema. Vunoni via ndando ya kama. Vutuhu yalieni kesi neni, a tantekeya visinganieka via yala nga a pangesa vimbongo via ku pua haze. Vati na tantekeyamo? Muomu mua hiti ntsimbu tunde ha va liambatela, a tantekeya vati yalieni ua tonda va pangese vimbongo vi vali navio. Na vuno vene, omo tu lilongesa ha cifua ce ku singanieka Yehova ha viuma via lingile ku nima, tu ka tantekeya via tonda tu vi linge mu visoti via ku liseza-seza.

11. Vihula vika tu hasa ku lihula omo tu tanda ni ku lilongesa Mbimbiliya? (Talenu cikasa “ Omo mu Lilongesa Mbimbiliya, Lihulenu.”)

¹¹ Vati tu hasa ku tantekeya vuino visinganieka via Yehova? Cuma ca seho ya kama ci tua pande ku linga ca pua ku tanda na ku lilongesa Mbimbiliya ntsimbu yose. Omo tu lingamo tu hasa ku lihula nguetu: ‘Vika evi vi nji longesa ku tuala hali Yehova? Omo lia vika ua muesele eci  cifua?’ Ngeci mua Ndaviti, netu tua pande ku vundila kuli Yehova linga tu mu tantekeye vuino. Ndaviti ua sonekele ngueni: “Nji lekese matapalo ove, A Yehova; Nji longese zinjila ziove. Nji tuamene mu vusunga vuove, na ku nji longesa; Muomu ove u Njambi ya vuovoke vuange; Nja ku tumamena litangua liose.” (Visamo 25:4, 5) Omo tu lilongesa vimo hali Yehova, tua pande ku singanieka ha vitanga vi ka tu hasa ku ka pangesa mizimbu yaco. Citava tu i pangese mu vusoko, ku vipanga, ku sikola ni mu ku ambulula. Nga tu singanieka ha cimo citanga, ci ka pua ca casi ku tantekeya vati Yehova a tonda tu pangese mizimbu yaco.

12. Vati mikanda yetu na viuano vi hasa ku tu kuasa ku tantekeya vuino visinganieka via Yehova ha viuma via ku liseza-seza?

¹² Njila ikuavo ya ku tantekeya vati ue ku singanieka Yehova ya pua ku kava vuino vi lue ku longesa lukungulukilo lueni ku hitila mu Mbimbiliya. Ca ku muenako, nga tu tonda ku tumba vumo vutumbe, tu hasa ku tondesesa mu Índice das Publicações da Torre de Vigia (Watch Tower Publications Index) na Guia de Pesquisa para Testemunhas de Jeová (Research Guide for Jehovah’s Witnesses) i hasa ku tu kuasa ku tantekeya visinganieka via Yehova. Tu hasa naua ku tantekeya via vingi mu ku halakana vuino na ku kumbulula ku viuano ku viuano vietu Vakua Kilistu, kaha na ku hilula ha viuma vi va tu longesa. Eci ci ka tu kuasa ku singanieka ngue Yehova. Kaha nga tu lingamo, tu ka hasa ku linga mavutumbe a ka vuisa Yehova ndzolela.

13. Tumbulenu lungano lua muesa vati tu hasa ku hangula viuma via cili nga tu hilula ha visinganieka via Yehova.

¹³ Tu ci talenu ha lumo lungano lua vati tu hasa ku tumba vutumbe vua cili nga tu hilula ha visinganieka via Yehova. Halumo mu tonda ku pua pioneiro. Citava mu na alulula vimo mu muono linga mu hase ku panga ntsimbu ya ingi mu ku ambulula. Vunoni ka muesi na vusunga nga mu kevua ndzolela mu ku yoya na vimbongo via vindende na viuma via vindende. Mua vusunga, Mbimbiliya ka ya handekele nguayo tua pande ku pua pioneiro linga tu pangele Yehova. Vunoni tu hasa ku tualelelaho ku mu pangela mu vuoloke mu ku pua mukua ku ambulula. Kaha cikuavo naua, Yesu ua handekele ngueni Yehova ue ku vezikisa vaze ve ku linga cose mu ku tuameka Vuangana. (Tandenu Luka 18:29, 30.) Mbimbiliya naua nguayo Yehova ue ku ivua ndzolela nga tu linga cose mu ku mu sangaziala, kaha a tonda tu kale na ndzolela ya ku mu pangela. (Visamo 119:108; 2 Kolintu 9:7) Nga tu vundila ha viuma evi na ku vi hilula vuino, tu hasa ku tumba vutumbe vuze vu ka tu kuasa mu visoti vietu kaha Yehova a ka tu vezikisa.

14. Vati mu hasa ku nongonona nga cifua ca imo zalesi ka ce ku ya Yehova ku mutima?

¹⁴ Lungano lukuavo olu: Halumo mua lema mpundu ku zala vuzalo vua cifua cimo, vunoni mua tantekeya nguenu nga mu zala vuzalo vuaco vamo mu cikungulukilo va kevua ku pihia cikuma. Mbimbiliya co ka ya handekele na vimo viahi ku tuala ha cifua ca vuzalo vu mua lema ku zala. Kaha vati mu hasa ku tantekeya visinganieka via Yehova? Mbimbiliya nguayo: “Vampuevo va lilenge na vuzalo vua va pande, na ntsoni na ku lipokuesa; kati na zinkambu zia ku vinda, na olu cipue na zimpota cipue na vuzalo vua ndando ya kama; vunoni (ngue mua pande vampuevo va litumbula vakua ku lemesa Njambi) na vilinga via cili.” (1 Timoteo 2:9, 10) Mua vusunga, eci cimamuna ca pua ca vangamba va Yehova vose na vamala navo va hasa ku lilongesa ku mezi aa. Nga tu pua vakua ku konkama, tu ka singanieka vati vakuetu va ka livua ku tuala ha vuzalo vu tue ku hangula ku zala. Kaha mu ku linga tua lema vamuanetu, ka tu ka tondo ku va luvalesa ni ku va vuisa ku pihia. (1 Kolintu 10:23, 24; Filipu 3:17) Nga tu kava vi ya handeka  Mbimbiliya na vati Yehova ue ku singanieka, tu ka hangula viuma vi ka va vuisa ndzolela.

15, 16. Vati ue ku ivua Yehova nga tu singanieka via vupangala ntsimbu yose (a) Vati tu hasa ku tantekeya via lema Yehova nga tu hangula vueho? (b) Vati tua pande ku tumba vutumbe vua seho ya kama?

¹⁵ Mu Mbimbiliya, tue ku lilongesa ngecize Yehova ue ku ivua ku vavala na ku luvala nga vantu va linga viuma via vipi na ku singanieka lika via vipi. (Tandenu Njenisisi 6:5, 6.) Mua vusunga Yehova ka tondo tu pue na ku singanieka via vupangala. Muomu, nga tu singanieka ha viuma evi, vi ka tu kokueya ku ka vi linga. Ngeci Yehova a tonda tu singanieke viuma via ku lela na vize via cili. Ndongesi Tiango ua sonekele ngueni mangana a Yehova “ha katete a lela, kaha a ciyulo, a nkeke, a asiua ku a vundila, a sula na cikeketima na mihako ya cili, ka esi na zimpata, ka esi na civembulu.” (Tiango 3:17) Ngeci Mbimbiliya ye ku tu longesa ngecize tua pande ku viana nkala vueho vu hasa ku tu lingisa ku singanieka viuma via ku pihia ni ku tu sangumuna cizango ca panga via mazilo. Nga tu ivuisisa vuino via lema Yehova na ku zinda via zinda, ci ka pua ca casi kuli etu ku tantekeya mavulu, vifilme vi tu ka hangula, cipue vueho vu tu ka hangula. Kaha naua ka tu kehula vakuetu vi tua pande ku linga.

¹⁶ Nga tu tonda ku tumba vumo vutumbe, kuli vinjila vimo vi tu hasa ku hangula vize vi ka vuisa Yehova ndzolela. Vunoni nga tu linga vutumbe vua seho ya kama, ci ka pua ca cili ku tonda vukuasi ku umo mukuluntu ua cikungulukilo ni umo muanetu ua yala ua ku hia mu lutsilielo ni ndumbuetu a tu kuase. (Tito 2:3-5; Tiango 5:13-15) Mua vusuanga ka tua pandele ku lomba muntu uaco a tu hanguile. Vunoni tua pande ku singanieka vuino ha viuma vi tu tantekeya via mu Mbimbiliya, kaha na ku lihanguila vi tu linga. (VaHevelu 5:14) Kapostolo Paulu ua handekele ngueni: “Muntu uose a ka ambata citeli ceni.”​—Ngalata 6:5.

17. Ku vezika cika tue ku uana mu ku hangula viuma via lema Yehova?

¹⁷ Nga tu hangula viuma vi vuisa Yehova ndzolela, tu ka suena mu hiehi neni kaha a ka tu vezikisa. (Tiango 4:8) Kaha lutsilielo luetu muli Yehova lu ka kaniama. Ngeci mukemuo tu puenu na ku hilula ha viuma vi tue ku tanda mu Mbimbiliya linga tu ivuisise visinganieka vieni. Mua vusunga, ntsimbu yose tue ku lilongesa via viha ku tuala hali Yehova. (Yombi 26:14) Vunoni nga tu linga cose tu lilongese vieni ntsimbu ino, tu ka pua va ku zangama, kaha tu ka hasa ku tumba mavutumbe a cili. (Visimo 2:1-5) Visinganieka na mavutumbe a vantu eku aluluka, vunoni Yehova ke ku aluluka. Mukua visamo ngueni: “Zinguli zia Yehova zia kolo ku miaka yose ya ya-ye, visinganieka via mutima ueni ku mazimo ose.” (Visamo 33:11) Mua vusunga, tu hasa ku tumba mavutumbe a cili cikuma nga tu lilongesa ku singanieka mu cifua ce ku singanieka Yehova na ku linga vize vi ka mu vuisa ndzolela.