Halumo mu vuluka Gail, uze ali mu cimpande ca katete ngueni, kesi na vusunga nga tangua a ka suva ku-tsa ca yalieni, Robert. Ali na lulavelelo lua ku ka mona Robert mu mavu a aha a kulahesa Njambi. Ue ku handeka ngueni, “mukanda ue ku nji lembezieka ua pua Ku-Solola 21:3, 4.” Ua handeka nguauo: “Kaha Njambi ivene a ka kala hamo navo . . . Kaha a ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti.”

Gail ngueni: “Aa mezi eku nji simpisa mpundu. Nje ku vuila ngozi vose vatsisa vantu va ha mutima, vunoni ka va tantekeya via muzimbu ou ua ku ka mona vantu va va lema va tsa.” Gail lelo lino ue ku linga vize via tsiliela, ua lihana mu cipanga ca ku longesa vantu ntsimbu yose, ue ku lekako va tunga navo vikulaheso via Njambi via ku lutue omo “ku tsa ka ci kalako naua.”

Halumo mu hasa ku handeka nguenu, ‘visimo via ngoco ovio!’ Vunoni tu ci talenu lungano lua Yombi. Ua kele na vuvezi vua ku pihia cikuma. (Yombi 2:7) Vutuhu Yombi ua tondele a tse, kasi ua tsilielele mu ngolo ya Njambi ya ku ka mu sangula a ku yoye lueka ha mavu. Ua handekele na vusunga ngueni: “Aa nga ua tavele ku nji vandesa mu Vukalo vua Vatsi, . . . Nga ua sana nga nja ku tava: nga ua kala na cizango ku cipanga ca mavoko ove.” (Yombi 14:13, 15) Yombi ua kele na vusunga ngecize Njambi yeni a kevua vusona vueni, kaha a ka tonda ku mu sangula.

Vuovuno Njambi a ka vi puisamo kuli Yombi na vakuavo va vengi omo mavu va ka alulula ku pua citungu. (Luka 23:42, 43) Mbimbiliya ya muesa vusunga vuaco ku Vilinga 24:15 nguayo: “Ku ka kala cisangukilo ca vakua vuviuke na vakua vuhenge.” Yesu ua handekele ngueni: “Kati mu komoke eci: muomu ola i ku iza, omo vose va li mu vihilo va kevua lizi lieni, kaha va ka tuhukamo.” (Yoano 5:28, 29) Yombi a ka mona ku lipuisamo ca mezi aa. Omo “a hiluka ku matangua a vukuendze” kaha ntsitu ya muvila ueni “i ka viuka ku hiana ize ya kanike.” (Yombi 33:24, 25) Evi tangua vi ka lipuisamo naua ku vose va tsiliela mu cikulaheso ca Njambi, ca ku ka sangula vantu linga va ka yoye ha mavu.

Nga mua tsisaho laza muntu u mua lema cikuma, citava halumo eyi mizimbu i mu na tanda ka i mi fumisa vusiua vueni vuose. Vunoni nga mu singanieka ha vikulaheso via Njambi vili mu Mbimbiliya, mu ka kala na lulavelelo lu ka mi kaniamesa.​—1 Tesalonika 4:13.

Mu tonda ku tantekeya vikuavo, ku tuala ha vati mu hasa ku lua na vusiua ni? Ni mue ku tonda ku tantekeya “Omo lia vika Njambi necelela vupi na tuyando?” Tua mi lania kovelenu mu site, jw.org, mu tantekeye vikumbululo via mu Mbimbiliya vi kaniamesa na ku simpisa.