Tunde ku vunike mueka nja lemene viuma via mu musenge. Muomu vusoko vuetu vua lemene cikuma kuya na ku endangana mu misenge na visali via cili via kala mu mbonge yetu ya Jyväskylä mu Finlândia. Kaha nja lema naua tusitu. Mu nja puile nji kanike, nja kele na ku tonda ku vumbatela nkala kambishi ni katali u nja muene! Mu nja putukile ku kola, nja putukile ku zinda cifua ci va kele na ku yandeselamo vantu tusitu. Ngeci mu nima ya ntsimbu, nja kovelele mu cimo civunga ca vakua ku hakuila tusitu.

Tua putukile cipanga ca kuya na ku hakuila tusitu. Tua putukile ku tepela vantu mizimbu ya ku niunga tusitu na ku caula muaya vitapalo, linga tu vindike vivenda via mangona a tusitu na vakua ku setekela vihemba ha tusitu. Kaha tua pangele naua civunga ceka ca ciha, ca ku niunga tusitu. Kaha mu ku linga tua kele na ku tsiha amo masiko mu ku hakuila tusitu, vintsimbu via vingi vakua nguvulu va putukile ku tu kuata na ku tu tuala muaya vindzango via ku sompesa.

Ku tundisako ku lisosomua cange na tusitu, kua kele naua visoti vieka hano ha mavu ka nja lemene ku mona. Mu nima ya ntsimbu, nja kovelele ku vivunga via vingi via ku liseza-seza, ngeci mua ku hakuila mpoko i va kala nayo vantu, na ku sambeya ciyulo mu mavu ose. Nja kele na ku pangesa ndzili yange yose mu ku hakuila vivunga via co. Nja kele na ku hakuila vihutu, vakua ku landuka ku ndzala kaha na vantu vakuavo va kele mu visoti via ku liseza-seza.

Vunoni mu nima ya ntsimbu, nja putukile ku nongonona ngecize ka nji hasa ku alulula mavu. Kaha vutuhu vize vivunga ku nja kovelele, via hasele ku sungamesako vimo visoti via vindende, vunoni visoti via kama hano ha mavu via kele na ku livuezelela lika. Ca puile ngue mavu ose a na kovela mu vupi vua ku linga na umo uahi naua ue ku haka seho ku viuma. Ngeci nja livuile vene nguange, visoti via mavu ka nji vi hasa ku vi sungamesa.

Ku tantekeya ngecize ka nja hasele ku alulula mavu, ca nji vuisile vusiua, ngeci nja putukile ku singanieka hali Njambi na Mbimbiliya. Laza nja kele na ku lilongesa Mbimbiliya na Vakaleho va Yehova. Vunoni vutuhu nja muene ngecize Vakaleho va Yehova va pua vantu va cili kaha va nji muesele seho, vutuhu ngoco ka nja kele na visinganieka via ca ku alulula cifua ca muono uange. Vunoni ha ntsimbu yaco, cifua ci nja kele na ku muenamo viuma ca alulukile.

Ngeci nja fuatokele mu ku tonda Mbimbiliya yange na ku putuka ku i tanda. Mbimbiliya ya puile mpundu vihemba via ha vimbandu viange via mu visinganieka. Kaha nja uanenemo vinimbu via vingi, vize via tu longesa mua ku niungila vuino tusitu. Ca ku muenako, Visimo 12:10 nguayo, “Mukua vuviuke a singanieka muono ua cimuna ceni.” Kaha nja nongonuene naua ngecize Njambi kati ikeye ue ku koka visoti ha mavu. Vunoni visoti ha mavu via livuezelela, muomu cingi ca vantu ka ve ku kava ku tuamenena ceni. Ku lilongea via cilemo na lukakatela lua Yehova, via nji kuatele cikuma ku mutima.—Visamo 103:8-14.

Kaha nja uanene hamo ha va lombolola vati nji hasa ku pinga livulu Vika Mpundu Vi i Longesa Mbimbiliya? ngeci nja lingilemo. Mu nima ya ntsimbu ya indende, vamo vampuevo na yala va pua Vakaleho va Yehova, vezile ha ndzivo yange na ku nji ihula nga nji tonda ku lilongesa Mbimbiliya, ngeci nja tavele. Kaha nja putukile ku kunguluka ku Ndzivo ya Vuangana. Ngeci mukemuo, vusunga vua putukile ku kola mu mutima uange.

Na vukuasi vua Mbimbiliya, nja hasele ku alulula viuma via vingi mu muono. Nja likelele ku sipa na ku penda. Nja sungamesele cifua ci nja kele na ku solokelamo na handekesi yange. Nja sungamesele naua cifua ci nja kele na ku muenamo vakua ku suana. (Loma 13:1) Kaha nja likelele naua muono ua vupangala, muomu namuo tele nji na kovelamo na mikono ivali.

Vunoni ku aluluka ca nji kaluuilile ku ci linga ca puile ku tuala ha vivunga via kele na ku hakuila vantu na tusitu. Ka nja hasele ku ci linga mu litangua lia ngongo. Ha katete, nja kele na ku livua ngecize nga nji tunda ku vivunga viaco, kaha njili na ku vienda vungungu. Vunoni, nja hetele ha ku nongonona ngecize Vuangana vua Njambi, vukevuo lika vu hasa ku sungamesa ano mavu. Ngeci nja hanguile ku pangesa muono uange uose, mu ku kuasa Vuangana vaco na ku kuasa vakuetu linga va vu tantekeye.—Mateo 6:33.

Mu nja puile mukua ku hakuila ku sungama ca viuma ha mavu, nja kele na ku tepesa vantu mu vivunga vivali lika: Vakua ku linga via cili na vakua ku linga via ku vihia. Kaha nja kele na ku kanieka vose va nja muene ngecize va puile vakua ku linga via ku vihia. Vunoni Mbimbiliya ya nji kuasa ku likela ku zinda vantu. Lelo lino, nje ku lihakela honi kapandi ka ku lema vantu vose. (Mateo 5:44) Kaha imo ya vinjila vi nje ku pangesa mu ku muesa cilemo caco, ya pua mu ku ambulula muzimbu ua cili ua Vuangana vua Njambi. Nje ku ivua ndzolela ya kama mu ku mona ngecize eci cipanga ce ku sambeya ciyulo, ndzolela kaha na ku hana vantu lulavelelo lua cili.

Ku haka viuma viose mu mavoko a Yehova, ca nji lingisa ku yoya mu ciyulo. Muomu nja kulahela ngecize mu ku pua Sakatanga, Yehova ka ka tavesa tusitu na vantu va ka vayandese ku miaka yose ni ano mavu va ka a nongese ku vakua vupi. Vunoni, vuovuno a ka sungamesa vupi vuose vu va koka vantu, ku hitila mu Vuangana vueni. (Isaya 11:1-9) Nje ku ivua ndzolela ya kama, kati lika mu ku tantekeya ovu vusunga, vunoni na mu ku kuasa vakuetu linga va vu tantekeye na ku vu tsiliela. Ka nje ku livua naua ngecize nja pande ku alulula mavu.