Nja semukile ku Paddington, lia pua limo lia membo mua kala vantu vavengi ku Londres, Inglaterra. Nja yoyele hamo na vanana kaha na va yayange vatatu. Va tata ka tua va hakele seho muomu va puile cinkolua.

Ku vunike, va nana va nji longesele ku vundila nkala vutsiki. Nja kele na kamo ka Mbimbiliya ka livulu lia Visamo lika, ngeci nja lipangelele imo miaso i nja kele na ku imba. Nji vuluka mezi amo a nja tandelele mu ka livulu kange, a kele mu mutima uange: “Tangua limo ka ku ka kala litangua lia mene.” Mezi aco a nji lingisile ku hinduka mu kati ka vutsiki na ku singanieka via ku lutue. Nja singaniekele nguange ‘Mua vusunga muono ua kala na vutumbe. Vika nja yoyela?’ Ka nja tondele ku tsa!

Nja tondele ku tantekeya via mahamba. Nja setekele ku handeka na vatsi, ngeci nja kele na ku ya ku vihilo na vakuetu va ku sikola, kaha tua kele na ku tala vifilme via vulozi. Tua singaniekele nguetu ku lingamo ce ku tu vuisile senga na liova.

Mu nja puisile miaka likumi nja putukile ku yoya muono ua vuhuka. Nja putuka ku sipa, kaha nja tengukile. Mu ku hita ca ntismbu, nja putuka ku sipa livangue ni liamba. Mu nja puisile miaka 11 nja lilongesa ku nua. Vutuhu ka vua nji tovalele, nja lemene ku penda. Nja lemene naua miaso na ku kina. Nja ile ku vilika via vutsiki hose ha nja tondelele. Nja kele na ku sevunuka vutsiki na ku ya ku vindzivo via vuala. Kaha lia mukuavo omo lia vikato, nja kele na ku ya mu ku eha ku sikola. Vintsimbu vimo nja kele na ku nuina vuala ku sikola.

Nja kele na ku tambula vinota via vindende ku sikola. Va nana va nji payele cikuma na ku nji nienguela omo lia vilinga viange via ku pihia. Tua licokotele, ngeci nja tinine ha ndzivo. Nja ka kele na lipangala liange mu matangua a andende, Tony, ua puile mukua ku niunga vinkambu via laha. Ikeye ua puile mukua ku nona via mbala na ku landesa vidroga, kaha ua tsimanene cikuma ku via luozi. Mu ku hita ca ntsimbu ua nji hana lizimo, kaha mu nja kele lika na miaka 16 tua kuatele kakeke ua yala.

Nja tantekeyele Vakaleho va Yehova tele nji li ku vuniungilo vua va niatukeke ka va sombokele. Va nji heleko imo hondo mu nja kele. Kua kele vampuevo vavali va Vakaleho va kele na ku meneka vakuetu vintsimbu viose. Kaha tangua limo nange nja halakana vi va kele na ku simutuila. Vutumbe vuange tele ku muesa ngecize va kele na ku handeka makuli. Vunoni va tavele vihula viange viose mu ka singimiko ku hitila mu Mbimbiliya. Va handekele na cikeketima na ngozi ngeci va nji ile ku mutima. Kaha nja likuminia ku lilongesa navo Mbimbiliya.

Mukemuo mu nja lilongesele vimo mu Mbimbiliya via aluluile muono uange. Tunde ku vunike, nja kele na vuoma vua ku tsa. Kaha nja tantekeyele honi cilongesa ca Yesu ca cisangukilo! (Yoano 5:28, 29) Nja lilongesele naua ngecize Njambi ue ku nji lela. (1 Petulu 5:7) Mezi a ku Yelemiya 29:11 a nji ile ku mutima, nguayo: “‘Muomu ange nji tantekeya visinganieka vize vi nji ku singanieka kuli enu, ngueni Yehova, visinganieka via ciyulo, kati via vipi, mu ku mi hia lulavelelo ku ntsimbu yenu ya ku sulumuina.’” Nja putuka ku tsiliela ku ka yoya miaka yose ha mavu mu Citungu.​—Visamo 37:29.

Vakaleho va Yehova va nji muesele cilemo ca vusunga. Litangua lia ku livanga li nja ile mu ku likungulula, ca nji ile cikuma ku mutima​—vose va nji tambuile na ndzolela! (Yoano 13:34, 35) Vi nja muene via litepele cikuma na cifua ci va kele na ku nji tambuilamo ku tembele i nja kele na ku ya. Vakaleho va nji tambuile vuino ka va talele ku cifua cange. Va nji hakele seho, va nji tualele mana na ku pangesa ntsimbu yavo mu ku nji kuasa. Nja livuile mpundu ku kala mu vusoko vua kama vua cilemo.

Mu cilongesa cange ca Mbimbiliya, nja muene ngecize nja pandele ku alulula cifua ca muono uange kuliya na masiko a Njambi. Ka ca nji puililile ca casi ku likela ku sipa. Nja nongonuene ngecize, imo miaso i nja lemene ikeyo ya sambeyelele cizango cange ca ku sipa livangue, ngeci nja viana miaso yaco. Mu ku tina ku kolua, nja likelele ku ya ku vikualo na ku vilika vize vie ku nji uisile mu ngandzo ya ku nua. Kaha nja putuka ku kala na vavusamba veka va cili vaze va nji kuasele ku kala na cifua ca muono ua cili.​—Visimo 13:20.

Mu ku hita ca ntsimbu, Tony ua putuka ku lilongesa Mbimbiliya na Vakaleho va Yehova. Mu ku linga Vakaleho va kele na ku kumbulula vihula vieni mu Mbimbiliya, Tony ua kele na vusunga ngecize via kele na ku lilongesa via puile via vusunga. Ngeci ua putukile ku alulula muono ueni: ua sezele vavusamba veni va luozi, ua likela ku koka milonga ya kama, kaha na ku likela ku sipa makaya a livangue. Linga tu ye Yehova ku mutima, tu vose tua tondekele ku alulula cifua ca miono yetu ya vupangala na ku lela vuino vana vetu. Tua liambatele mu 1982.

Nji vuluka mu nja tondesesele mu mikanda Vutala vua Kaniungi na Despertai! * nja uanenemo mizimbu ya vamo va hasele ku aluluka ngue mu nja tondele ange. Nja uanene ku simpa omo lia malungano avo! Nja kaniamene mu nja lihakelele kapandi ka ku seteka ku lingamo. Nja kele na ku vundila Yehova kati a nji seze. Nange na va Tony va tu mbatizile mu 1982 mu ku pua Vakaleho va Yehova.

Ku likuata vusamba na Yehova Njambi co hiela muono uange. Nange na Tony tua limuena vati Yehova ua tu kuasele mu vintsimbi via vi kalu. Tua lilongesa ku tsiliela muli Njambi mu ntsimbu yaco, kaha tua muene ngecize kasi ikeye ue ku tu kuasa na ku niunga vusoko vuetu.​—Visamo 55:22.

Nja viukilile cikuma ku longesa munetu ua yala na ua mpuevo via Yehova ngue mu nja lilongesele. Vuovuno nje ku viukilila ku va mona va longesa vana vavo Njambi omo va kola.

Ka nje ku niangumuka naua vutsiki na ku lisosomua via ku lutue ni ku-tsa. Nange na va Tony tue ku linga cipanga ca kama mu ku ka meneka nkala simano vikungulukilo via Vakaleho va Yehova mu ku va kaniamesa. Tua lipandakana navo mu ku longesa vakuetu nguetu nga va tsiliela muli Yesu, navo naua va hasa ku ka viukilila na muono ka ue ku hua.