Umo kanike ua mpuevo ua muene muisi ua uingi u kakumuka ku fabrika kaha vu moneka ngue maselua. Ngeci ua singaniekele ngueni fabrika yaco ikeyo ye ku panga maselua. Eci ku hona ku ivuisisa ca cindende ca kanike ci zolesa. Vunoni ku hona ku ivuisisa vuino viuma via seho ya kama vi hasa ku neha vitanga mu muono. Ca ku muenako, ku hona ku ivuisisa vuino mua ku pangesela vihemba ci hasa ku koka luvinda lua kama.

Ku hona ku ivuisisa vuino via Njambi ci hasa ku neha luvinda lua kama cikuma. Ca ku muenako, kua kele vantu vamo ka vevuisisile vuino vilongesa via Yesu. (Yoano 6:48-68) Mu cihela ca ku lilongesa via vingi, va vianene viose via kele na ku longesa Yesu. Mua vusunga va zimbalesele via kama!

Nenu mue ku tanda Mbimbiliya i mi tuamenene ni? Nga mukemuo kaha mua cili. Vuno nenu mue ku uila mu ngandzo ya ku hona ku ivuisisa vuino viose vi mue ku tandamo ni? Kati lika lienu. Aci talenu vimo viuma vitatu, vantu ka ve ku ivuisisa vuino.

• Vantu vamo ka ve ku ivuisisa vuino vi ya handeka Mbimbiliya ku tuala ha ku “vuila Njambi vuoma.” Ve ku singanieka nguavo ca pua ku zuzua ni ku cikitila Njambi. (Ekelesiaste 12:13) Vunoni Njambi ka tondele vakua ku mu lemesa va mu vuile vuoma vua cifua eci. Ua handekele ngueni: “Kati u ivue vuoma, muomu ange nji li nove; kati u livete cikumba [ni ku uma mutima], muomu yange Njambi yove; nji ka ku kolesa cili, nji ka ku kuasa.” (Isaya 41:10) Ku vuila Njambi vuoma ca lomboloka ku mu singimika ku tundilila ku intsi lia mutima uetu.

• Vamo ka ve ku ivuisisa mua cili aa mezi a mu Mbimbiliya: “Ku viuma viose kua kala muaka uavio,. . .ntsimbu ya ku semuua, na tsimbu ya ku tsa.” Ve ku singanieka nguavo Njambi ua hangula laza ntsimbu ya ka tsa nkala muntu. (Ecclesiaste 3:1, 2) Vunoni, vutumbe vua vinimbu evi vua pua ku muesa vati muono ua fua na ku tsindika ngecize ku tsa ca kala ku vose. Lizi lia Njambi lia tu leka naua ngecize vi tue ku hangula ku linga mu muono vi hasa ku tepulula ni ku lahesa muono uetu. Ca ku muenako va soneka ngecize: “Ku vuila Yehova vuoma ci lahesa matangua.” (Visimo 10:27; Visamo 90:10; Isaya 55:3) Mu njila ika? Ca ku muenako, ku ononoka Lizi lia Njambi ci hasa ku tu ohiela ku vilinga via mazilo ngeci mua ku penda na vupangala.​—1 Kolintu 6:9, 10.

• Vamo ka ve ku ivuisisa vuino Mbimbiliya mu ya handeka ngecize melu na mavu va “vi suekela tuhia,” vakevo ve ku singanieka nguavo Njambi tangua a ka tsimika mpundu na tuhia ano mavu. (2 Petulu 3:7) Vunoni Njambi ua kulahesa ngueni kali ka tavesa na limo litangua liahi ku nongesa mavu ano. Njambi “ua hakele mavula a mavu linga kati a taliangele ku miaka yose.” (Visamo 104:5; Isaya 45:18) Vantu vakua vupi va kala hano ha mavu vakevo va ka nonga, ka va ka kalako naua, ngue va ku uema ku tuhia. Kaha melu ntsimbu imo e ku imanena vukambuila, kuze kua kala vintangantanga ni vukalo vua Njambi. Evi viaco ka vi ka nonga.

Ngue mu mu na li muena mu vimueso evi, vantu vavengi ka ve ku ivuisisa mua cili imo mizimbu i ve ku tanda mu Mbimbiliya. Omo lia vika Njambi ue ku tavesa linga viuma via cifua eci ku lingika? Vamo halumo va hasa ku singanieka: ‘Nga Njambi ua pua mukua ku hiana ku mangana na mana, nga ua tu hana limo livulu lia liasi ku livuisisa ku muntu uose. Omo lia vika ka lingililemo?’ Tu ci simutuilenu ha vusunga vutatu linga tu mone omo lia vika Mbimbiliya ka ve ku i ivuisisa mua cili.

1. Mbimbiliya va i sonekela linga vakua ku likehesa na vaze va kala na cizango ca ku lilongesa va i ivuisise. Yesu ua vundilile Ise ngueni: “Nja ku santsela tata, Muangana ua muilu na hano ha mavu, muomu viuma evi ua vi suekele ku vakua mangana  na vakua mana, kaha u na vi solola ku tukeke: omo vene tata; muomu ca viuka ngecize ku meso ove.” (Luka 10:21) Mbimbiliya va i soneka mu cifua ca ku linga vaze lika vakua vilinga via cili va hasa ku ivuisisa muzimbu uayo. Vantu vakua ku lihalesa, vakevo ve ku limona nguavo “vakua mangana na vakua mana,” ve ku ivuisisa Mbimbiliya mua ku pihia. Vunoni vaze ve ku muesa cifua ngue ca “tukeke” ve ku likehesa mu ve ku tanda Mbimbiliya na ku lihakela kapandi ka ku lilongesa. Kaha ve ku uana cilunguiso ca ku ivuisisa mua cili muzimbu ua Njambi. Mua vusunga Njambi ua tumbika vuino Mbimbiliya!

2. Mbimbiliya va i sonekela vantu vakua mitima ya vusunga kaha ve ku tonda vukuasi vua Njambi linga i va lomboloke. Yesu ua muesele ngecize vantu va ka tondeka vukuasi linga vevuisise vuino vilongesa vieni. Veya va fuile ku vu tambula? Yesu ua lomboluele ngueni: “Vunoni Mukuasi, ikeye Sipilitu Santu vene, ya li ka tuma Tata mu lizina liange a ka mi longesa viuma viose, kaha aka mi vuluisa viose vi nji na handeka nenu.” (Yoano 14:26) Njambi ue ku hana sipilitu santu yeni ni nguetu ngolo yeni mu ku kuasa vantu vevuisise viuma vi va tanda. Vunoni Njambi ke ku hana sipilitu santu yeni kuli vaze ka va tsilielele mu vukuasi vueni, ngeci ka ve ku ivuisisa Mbimbiliya. Sipilitu santu naua ye ku kuasa Vakua Kilistu va ku hia mu lutsilielo linga va kuase vaze va tonda ku ivuisisa.—Vilinga 8:26-35.

3. Ku li vinimbu vimo via Mbimbiliya ci tava lika ku vi ivuisisa mu ye ku heta ntsimbu yaco. Ca ku muenako, kapolofeto Ndaniele va mu lekele ku soneka muzimbu ua viuma vi ka soloka ku lutue. Kangelo ua mu lekele ngueni: “Vunoni ove, A Ndaniele, soko ku mezi na ku haka citantekeyeso ku livulu noho ha ku kotokela.” Mu vihita via miaka via hateleko, vantu vavengi va kele na ku tanda livulu lia Ndaniele mu Mbimbiliya vunoni ka va kele na ku livuisisa. Cipue ivene Ndaniele mpundu kevuisisile via kele na ku soneka. Ua litavelele ngueni: “Nja vuile, vunoni ka nja tantekeyele.” Kaha mu ku hita ca ntsimbu vantu ve ku hasele ku ivuisisa vupolofeto vua sonekele Ndaniele, vunoni ku ntsimbu imo ya hanguile Njambi. Kangelo ua lomboluele ngueni: “Hamoye kuove, Ndaniele; muomu va na soko ku mezi na ku a haka citantekeyeso noho ku tsimbu ya ku kotokela.” Iya honi na pandele ku ivuisisa muzimbu ua Njambi? “Na umo uahi kuli vakua vipi a ka tantekeya.” (Ndaniele 12:4, 8-10) Njambi ke ku solola via lomboloka vimo vinimbu ku vanga noho i heta ntsimbu yaco.

Vuno Vakaleho va Yehova navo ntsimbu imo va sevukile mu ku ivuisisa Mbimbiliya ni? Eyo. Vunoni mu ye ku heta ntsimbu ya Njambi ya ku lombolola vuino vimpande Vakaleho ve ku vi tava na mutima umo. Ve ku lingamo mu ku temunuina vapostolo va Kilistu, va likehesele na ku aluluila ku ivuisisa cavo omo Yesu ua va sungamesele.​—Vilinga 1:6, 7.

Via muane uze kanike ka mpuevo ku tuala ha kulihi kua tunda maselua ca puile ku sevuka ca cindende. Vunoni vi ya longesa Mbimbiliya via pua via seho ya kama kuli yenu. Muzimbu ua Mbimbiliya ua pua seho ya kama cikuma ku nkala muntu, ka pandele ku lilongesa mua lika lieni. Ngeci mukemuo tondenu vukuasi mu ivuisise vuino vi mu tanda. Lombenu vukuasi kuli vaze ve ku tanda na ku likehesa kaha va lema ku sipilitu santu ya Njambi linga mu ivuisise Mbimbiliya, vantu vaze vali na vusunga ngecize tuli na ku yoya ku ntsimbu ize Njambi a tonda tu ivuisise vuino Mbimbiliya ku hiana ku laza. Kati mu hone, ci tava mu simutuile na Vakaleho va Yehova ni ku tanda mizimbu ive ku tondesesa mua vutongue mu site jw.org mu tantekeye via vingi. Mbimbiliya ya kulahesa nguayo: “Nga u tambakana linga u nongonone. . . , amba vuose u ka  . . , uana mana a ku tantekeya Njambi.”​—Visimo 2:3-5.