Nenu mue ku livua ngeci muavo ni? Halumo mua tondele ku tanda Mbimbiliya kaha mua likela. Vavengi ve ku ivua vuoma vua ku tanda Mbimbiliya.Vunoni vati nga mu tantekeya ngecize Mbimbiliya i hasa ku mi kuasa ku yoya muono ua ndzolela? Vati co nga mu tantekeya ngecize kua kala vinjila via viasi via ku tandelamo Mbimbiliya na ku ivuisisa? Mu ka kala na cizango ca ku tantekeya vika mu hasa ku uana mu Mbimbiliya ni?

Aci talenu vi va handekele vamo ha ku vezika ci va uanene mu va putukile ku tanda Mbimbiliya.

Ezekiele, vuovuno a puisa miaka 20, ngueni: “Laza nja puile ngue muntu endesa likalu ca ku hona ku tantekeya kua ya. Vunoni ku tanda Mbimbiliya ca nji kuasa ku yoya muono ua vutumbe. Muomu ya kala na vimamuna vi nje ku pangesa nkala litangua.”

Frieda, ua miaka i tuvakana 20 ngueni: “Nja puile mukua kazavuzavu. Vunoni mu nja putuka ku tanda Mbimbiliya nja lilongesa ku kuata mutima. Vuno nje ku litavasiana na vakuetu, kaha nja kala na vavusamba va vengi.”

Umo mpuevo ua lizina Eunice a li na miaka i tuvakana 50 ua handekele ngueni, “Mbimbiliya ye ku nji kuasa ku pua muntu ua cili, na ku seza vilinga via ku pihia.”

Ava va tu na tumbula ngeci na makulukazi a vakuavo ve ku lingamo, va limuena ngecize ku tanda Mbimbiliya ce ku kuasa ku yoya muono ua ndzolela. (Isaya 48:17, 18) Vukuasi vukuavo vu mu hasa ku uanamo vua pua (1) ku hangula viuma via cili, (2) ku kala na vavusamba va cili, (3) ku pinda na cikela ni stress kaha (4) ku vueza ku li evi viose, mu ka tantekeya vusunga ku tuala hali Njambi.Vimamuna via Mbimbiliya via tunda kuli Njambi, nga mu vi niunga ku mu sevuka.Njambi ke ku hana vimamuna via ku pihia.

Ca kama ku mu na putuka lika. Vinanga vika vi tondeka linga mu tande Mbimbiliya mu njila i ka mi ya ku mutima?