Va tuntisa cikuma, kaha cikumo ca viliato via tavalu ngue mihiato! Ava tuvalu vauana va ngolo, na vakua ku vendesa ve ku soloka ngue va tuhuka mpundu mu mafo a Mbimbiliya! Kavalu ua ku vuka ua katete—mukua ku mu endesa ua hiana vukama, muangana ua muha u va zika cilongo. Mu nima yeni mua kava kavalu ua ku tila, uze ua tuhukile mu ku tundisa ciyulo mu mavu ose. Kaha kavalu ua mu citatu, ua ku lava ngue vutsiki, ua kele na cipeseleso mu livoko lieni na ku neha muzimbu ua ku pihia ua ndzala. Ua mu ciuana ua ku vukuluka, ua kele na muzimbu ua ku pihia ua mavezi na ku-tsa. Kaha Vukalo vua Vatsi vua mu kavele mu ku tsiha miono ya vantu!—Ku-Solola 6:1-8.

“Ha katete nja vuile vuoma mu nja tandele ava vamala vauana vakua tuvalu. Nja vuile ngecize Litangua lia ku Sompesa lili na ku iza, kaha mu ku linga ka nja liviukisilile, nguange ka nji kovoka.”—Crystal.

“Nja komokele ha ku mona ava vakua ku endesa tuvalu vauana va vifua via ku liseza-seza. Mu nja ivuisisile vi ca lombolokele cimona caco, viose via puile via vusunga.”—Ed.

Nenu mue ku livua ngue mua livuile Crystal ku tuala ha vamala vauana vakua tuvalu va ku livulu lia Ku-Solola? Ni ngue mua livuile Ed? Vutuhu ku endesa ca vamala vauana vakua tuvalu ca pua ca ntunda ya kama, cikeco cimona ca tsimana cikuma ku livulu liaKu-Solola, livulu lia ku sulumuina mu Mbimbiliya. Mu tantekeya ngecize mu hasa ku vezika mu ku ivuisisa cimona caco ni? Mu njila ika? Njambi ua mi kulahesa ngecize mu hasa ku kala na ndzolela ya vusunga mu ku tanda, ku lilongesa na ku kava viuma vi va soneka mu livuli eli lia vupolofeto mu ku yoya cenu.—Ku-Solola 1:1-3.

Vutuhu vamo ve ku ivua vuoma vua cimona ca vamala vauana vakua tuvalu, ka va ci sonekelele ku mi vuisa vuoma. Mua vusunga, makulukazi na makulukazi a vantu va na mono ngecize eci cimona ce ku kaniamesa lutsilielo luavo na ku va hana lulavelelo lua cili ku lutue. Nenu ci hasa ku mi nehela lulavelo luaco. Aci tandenu via cimona caco.