Eyo, Vakaleho va Yehova ve ku kuasa nga kua soloka viyovo via mavu. Tue ku kuasa vantu vose, cipue vaze ka va puile Vakaleho ngue mu ya muesa Mbimbiliya ku Ngalata 6:10, nguayo: “Tu pangienu vize via viuka kuli vantu vose, kaha cikuma vene kuli vaze va na pandama ku vusoko vua ku tsiliela.” Ha vintsimbu viaco tue ku seteka ku lembezieka na ku kuasa vantu mu lutsilielo.​—2 Kolintu 1:3, 4.

 Mu nima ya cimo ciyovo, vakuluntu va vikungulukilo via kala ku cihela ci na hiti ciyovo caco, ve ku seteka ku meneka vose va mu vikungulukilo linga va tantekeye nga vose vali vuino kaha na vukuasi vuka va tondeka. Mu nima yaco ve ku tuma mizimbu ku seketa ya Vakaleho va Yehova ya mu cifuti caco.

 Nga vikungulukilo via ku cihela ku na hiti ciyovo caco ka vi hasa ku hana vukuasi vuose vu tondeka, Civunga ca Vantuamena ca Vakaleho va Yehova ce ku tuma vukuasi vuaco. Eci ca litombola na cifua ci va liniungililemo umo na mukuavo Vakua Kilistu va ku livanga mu ntsimbu ya ndzala. (1 Kolintu 16:1-4) Seketa ya mu cifuti ye ku hangula Civunga ca Vakua ku Kuatasanesa mu ku endesa na ku tuamenena viuma. Vakaleho va ku vifuti vieka ve ku lihana mu ku pangesa ntsimbu na vupite vuavo mu ku kuasa vamuanaye.​—Visimo 17:17.

 Milambu i ve ku tuma ku viseketa via Vakaleho va Yehova ve ku i pangesa mu ku kuasa kuze kua soloka ciyovo. (Vilinga 11:27-30; 2 Kolintu 8:13-15) Mu ku linga vakua ku linga cipanga caco ka ve ku va fueta, vimbongo ve ku vi pangesa mu ku kuasa vaze vali mu visoti, kati vaze ve ku linga cipanga caco. Tue ku pangesa vuino milambu i ve ku hana vamuanetu.​—2 Kolintu 8:20.