Houe. Tue ku ambulula ku ndzivo ku ndzivo, vunoni ka tua tsilielele ngecize tu ka uana kovoka omo lia ku cipanga cetu va ku ambulula. (Efeso 2:8) Omo lia vika?

Aci hilulenu ha cimueso eci: Singaniekenu umo yala ua ngozi na kulahesa ku hana vumo vuana vua ndando ya kama cikuma ku vose va ka soloka ku cihela ca na tumbula na litangua liaco. Nga mua tsiliela mpundu mu cikulaheso ca yala uaco, ka mu ka kava vitume vieni ni? Mua vusunga, mu ka lekako na vavusoko na vavusamba via cikulaheso caco linga navo va ka tambule ovu vuana. Vutuhu ngoco, ka mu ka tambula vuana vuaco omo lia ku kava vitume via uze yala, houe. Vunoni muomu yala uaco na tondele mpundu ku mi hana vuana vuaco.

Na vuno vene, Vakaleho va Yehova va tsiliela mu cikulaheso ca Njambi ca ku hana muono ka ue ku hua ku vose va mu ononoka. (Loma 6:23) Ngeci tue ku lihakela kapandi ka ku lekako vakuetu via lutsilielo luetu, linga navo va uane vukuasi ku vikulaheso via Njambi. (Loma 1:17; 3:28) Vunoni ka tua tsilielele ngecize tu ka uana ku ovoka omo lia ku ambulula, houe. Muomu na umo muntu uahi a ka tambula ovu vuana vua kama cikuma vua kuli Njambi omo lia vipanga vieni. Njambi a ka tu ovola “kati ngue ku vipanga vi tua pangele etu vavene mu vuviuke, houe, vunoni ku cikeketima ceni.”