Eyo. Vakaleho va Yehova va tsiliela ngecize Mbimbiliya ya ku “huiminina kuli Njambi kaha i silivila ku longesa vize via vuviuke.” (2 Timoteo 3:16) Eci ca ambatesela kumo na Testamentu ya Laza na Testamentu ya Iha, ngue mu ve ku vi sana vavengi. Vakaleho va Yehova ve ku sana evi ku pua Visoneka via ciHevelu na Visoneka via ciNgelengu via Vakua Kilistu. Kaha eci ka ce ku muesa ngecize kuli mitamba ya Mbimbiliya ya kala na seho ku hiana ikuavo.

Kapostolo Paulu va mu huiminine ku soneka ngueni: “Muomu viose vi va sonekele laza, va vi sonekelele ku tu longesa, linga ku lukakatela na ku ku-lembezieka, via ku visoneka tu kale na ku lavelela.” (Loma 15:4) Ngeci mukemuo, mu visoneka via ciHevelu mua kala mizimbu ya seho ya kama kuli yetu. Mu visoneka viaco mua kala vimamuna via seho na mizimbu i hasa ku tu kuasa mu muono.

• Visoneka via ciHevelu via ambatesela kumo na mizimbu ya ku tanga ca viuma na vati vupi vua putukile ha mavu. Eyi mizimbu yaco nga ku ya keleko, nga ca tu kaluuila ku uana vikumbululo via vihula ngeci muevi: Kulihi tua tunda? Vika tue ku tsila? (Njenisisi 2:7, 17) Cikuavo naua mu Visoneka via ciHevelu mua kala mizimbu ya muesa via lingile Yehova Njambi ku vantu veni mu va kele mu ndzolela na mu tuyando ngue tu tue ku hita vintsimbu vimo.—Tiango 5:17.

• Vimamuna via seho ya kama. Mavulu a mu Mbimbiliya ngeci mua Visimo na Eclesiaste, a pua mutamba ua Visoneka via ciHevelu, mua kala vimamuna vi kuasa mu muono. Muli vimamuna via vati mua ku yoyela na ndzolela mu vusoko (Visimo 15:17) Ku mona vipanga mu njila ya cili (Visimo 10:4; Ekelesiaste 4:6), na vati vakuendze va hasa ku yoya muono u ka va vuisa ndzolela.

Cikuavo naua tu hasa ku lilongesa via vingi ku mu Lilongesa Masiko a Mosesa a va soneka mu mavulu atanu a katete. Vutuhu Vakua Kilistu masiko aco ka a va pandele vunoni mua kala vitume via vingi vi hasa ku tu kuasa ku yoya muono ua ndzolela.—Levitiku 19:18; Ndeutelonomi 6:5-7.