Lukungulukilo lua Vakaleho va Yehova lua ku matangua ano lua putukile ku ku hua ca sekulu 19. Ku ntsimbu ize, cimo civunga ca cindende ca vakua ku liongesa Mbimbiliya va kele ku hiehi na Pittsburgh, Pennsylvania ku Estados Unidos (United States), va putukile ku hilula Mbimbiliya. Va kele na ku setekesa vilongesa via malombelo na vi ya longesa Mbimbiliya. Va putukile ku tuhula vi va kele na ku lilongesa mu mavulu, viJornal, kaha na mukanda u ve ku sana lelo Vutala vua Kaniungi​—Vue ku Ambulula Vuangana vua Yehova.

 Ha kati ka cize civunga ca vakua ku lilongesa Mbimbiliya ha kele yala ua lizina Charles Taze Russell. Vutuhu Russell ua kele na ku tuamenena cipanga ca ku longesa via Mbimbiliya ku ntsimbu ize, kaha ikeye ua ku livanga ku tuhula Vutala vua Kaniungi, kati ikeye ua tumbikile vulombelo vua vuha. Vutumbe vua Russell na vakuavo vakua ku lilongesa Mbimbiliya vua puile ku longesa via Yesu na ku kava vilinga via vakua Kilistu va ku cikungulukilo ca ku sekulu ya ku livanga, ngue mu va va tantekeyele ku ntsimbu ize. Mu ku linga Yesu ikeye ua Tumbikile Cikungulukilo ca Vakua Kilistu, tue ku mu mona ku pua ikeye ua tumbikile lukungulukilo luetu.​—Kolose 1:18-20.