Makuli: Vakaleho va Yehova ka ve ku lia Natale muomu ka va tsilielele muli Yesu.

Vusunga: Etu tu Vakua Kilistu. Tua tsiliela ngecize ku ovoka ce ku iza lika ku hitila muli Yesu Kilistu.—Vilinga 4:12.

Makuli: Mue ku tepa masoko mu ku va longesa kati va lie Natale.

Vusunga: Tua haka seho ku vusoko, kaha tue ku pangesa Mbimbiliya mu ku kolesa masoko.

Makuli: Enu mua zimbalesa vuhuanga, ciyulo na ku linga via cili ku vantu ha Natale.

Vusunga: Tue ku lihakela kapandi ka ku muesa vuhuanga na ku pua vakua ciyulo nkala litangua. (Visimo 11:25; Loma 12:18) Ca ku muenako, cifua ci tue ku endeselamo viuano vietu ca litombola na mezi a Yesu, ngueni: “Vuana mu na tambula ngoco, vu hanienu ngoco.” (Mateo 10:8) Cikuavo naua, tua tsileila Vuangana vua Njambi muomu vukevuo lika vu ka neha ciyulo ca vusunga ha mavu.—Mateo 10:7.

• Muomu Yesu ua tu sika lika ku vuluka ku-tsa ceni, kati ku semuka ceni.—Luka 22:19, 20.

• Vapostolo na vandongesi va Yesu va ku livanga ka va lile Natale. Livulu New Catholic Encyclopedia ngualio “Cilika ca ku semuka ca Yesu ca putukile ku miaka ya 243 [T.K.N.],”” tele mua hiti miaka i tuvakana cihita tunde ha ku-tsa ca vapostolo va ku manusuila.

• Ka kua kele vusunga vua muesa ngecize Yesu ua semukile lia 25 ya Dezembro; kaha litangua lia ku semuka ceni ka va lisonekele mu Mbimbiliya.

• Tuli na vusunga ngecize cilika ca Natale Njambi ka ci tavele muomu ca tunda ku vilika na ku visemuavia vakua mavu.—2 Kolintu 6:17.

Cingi ca vantu ve ku linga cilika ca Natale vutuhu va tantekeya ngecize ca pua cilika ca vakua mavu kaha Mbimbiliya ka ye ku ci hakuila. Ngeci vamo ve ku lihula nguavo: Omo lia vika vakua Kilistu ve ku-lia Natale?

Mbimbiliya ya tu kaniamesa ku lihilula etu vavene na ku pangesa ngolo yetu ya ku ‘singanieka.’ (Loma 12:1, 2) Ye ku tu longesa naua ku lema vusunga. (Yoano 4:23, 24) Vutuhu tue ku lisosomua na cifua ci ve ku tu muenamo vakuetu, tue ku kava vitume via Mbimbiliya cipue nga vantu va handeka mukuli hali etu.

Vutuhu ka tue ku lia Natele, tue ku singimika mpoko ya nkala muntu ya ku lihanguila ha cimpande eci. Ka tue ku tangula vakuetu ve ku linga cilika ca Natele.