Omo lia Vika ka mue ku Tava ku mi Haka Maninga?
Visinganieka via ku henga via vantu ku tuala ha Vakaleho
Makuli: Vakaleho va Yehova ka va tsilielele ngecize vandotolo va hasa ku va kuasa ngeci ka ve ku tonda ku va saka.
Vusunga: Tue ku tonda ku saka ca cili cize ci hasa ku tu kuasa na vusoko vuetu. Nga tuli na visoti via cihindu, tue ku ya ku vandotolo va tantekeya vuino ku saka na ku tavula ca ku hona ku haka maninga. Tue ku santsela cikuma ku vifua via viha via ku sakelamo. Mua vusunga, ku saka ca ku hona maninga ka ve ku ci linga mu ku kuasa lika Vakaleho va Yehova, vunoni na vantu vose. Mu vifuti via vingi, nkala muvezi a hasa ku hangula ku mu saka ca ku hona ku mu haka maninga, mu ku liniunga ku mavezi.
Makuli: Vakaleho va Yehova va tsiliela nguavo lutsilielo lukeluo lu hasa ku kanguisa mavezi a vantu.
Vusunga: Etu ka tue ku vundilila vantu linga va kanguke.
Makuli: Ve ku viana ku va saka na maninga muomu ca pua ca ndando ya kama.
Vusunga: Ku saka ca ku hona maninga ka ca puile ca ndando ya kama. *
Makuli: Cingi ca Vakaleho, hamo lika na vanike ve ku-tsa muaka ku muaka omo lia ku viana ku va haka maninga.
Vusunga: Eyi mizimbu ka ya puile ya vusunga. Muomu vandotolo mu ve ku saka mavezi a kama, ngeci mua ku tavula mutima, ku haka vimo vilio mu muvila ua muntu, ka ve ku pangesa maninga. * Vavezi va ve ku tavula ca ku hona ku va haka maninga hamo lika na vanike, ve ku kanguka ku tuvakana va ve ku haka maninga. * Ngeci mukemuo, ka citava tu handeke nguetu muntu a hasa ku-tsa omo lia ku viana ku mu haka maninga ni a hasa ku yoya omo lia ku mu haka maninga.
Omo lia vika Vakaleho va Yehova ka ve ku tava ku va haka maninga?
Eci ca pua cimpande ca vulombelo kati ca vakua ku saka. Testamentu ya Laza neyi ya Iha via tu sika ku tina ku mulonga ua maninga. (Njenisisi 9:4; Levitiku 17:10; Ndeutelonomi 12:23; Vilinga 15:28, 29) Cikuavo naua, kuli Njambi maninga akeo muono. (Levitiku 17:14) Ngeci mukemuo, ka tue ku ononoka lika Njambi mu ku tina mulonga ua maninga, vunoni na ku mu singimika muomu ikeye Ndundzi ya muono.
Ku aluluka ca cifua ca ku sakelamo
Citava ku tavula muntu ca ku hona ku mu haka maninga
Laza, vakua ku saka va kele na ku singanieka nguavo ku tavula ca ku hona ku haka maninga ca pua ku tsiha muntu, vunoni mu miaka ino va na alulula cifua ca ku tavuilamo. Ca ku muenako, mu 2004 va tuhuile cimo cimpande mu mukanda ua vakua ku saka nguaco, “cingi ca vinjila vi ve ku pangesa mu ku tavula Vakaleho va Yehova ku miaka ya ku lutue vi ka pua vinjila via ku tavuilamo vantu vose.” * Kaha cimpande cikuavo ca mu mukanda Heart, Lung and Circulation ca mu 2010 nguaco “ku tavula ca ku hona ku haka maninga ka va pandele lika ku ci linga ku Vakaleho va Yehova, vunoni va pande ku ci linga ku vantu vose nkala litangua.”
Makulukazi a vandotolo mu mavu ose vali na ku pangesa vinjila vie ku vindika maninga ku hita nga va tavula muntu. Evi vinjila viaco ve ku vi pangesa cipue mu vifuti via vuhutu, kaha na ku vantu vavengi vaze ka va puile Vakaleho va Yehova ca ku hona ku va haka maninga.
^ cin. 8 Talenu Transfusion and Apheresis Science, vol. 33, n.° 3, p. 349.
^ cin. 10 Continuing Education in Anaesthesia, Critical Care & Pain, Volume 4, No. 2, page 39.
^ cin. 10 Talenu The Journal of Thoracic and Cardiovascular Surgery, vol. 134, n.° 2, pp. 287-288; Texas Heart Institute Journal, vol. 38, n.° 5, p. 563; Basics of Blood Management (Princípios Básicos do Gerenciamento de Sangue), p. 2; e Continuing Education in Anaesthesia, Critical Care & Pain, vol. 4, n.° 2, p. 39.
^ cin. 14 Talenu The Journal of Thoracic and Cardiovascular Surgery, vol. 89, n.° 6, p. 918; e Heart, Lung and Circulation, vol. 19, p. 658.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vuno Vakaleho va Yehova ve ku Tava ku va Saka ku Sipitali ni?
Vamo ve ku singanieka nguavo Vakaleho va Yehova ve ku viana ku saka cose. Vusunga ni?
YETU VEYA
Vundilenu Cilongesa
Simutuilenu ku tuala ha vihula via mu Mbimbiliya ni lilongesenu via vingi ku tuala ha Vakaleho va Yehova.