Vusunga vu na hatako, vua muesa omo lia vika Vakaleho va Yehova ka ve ku ya ku ndzita:

1.   Ku ononoka Njambi. Mbimbiliya ya handeka ngecize vangamba va Njambi va ka “fula mikuale yavo mu ku puisa matemo” kaha “ka va ka lilongesa ndzita naua.”​—Isaya 2:4.

2.   Ku ononoka Yesu. Yesu ua lekele kapostolo Petulu ngueni: “Somekamo naua mukuale uove mu cikanda cauo: muomu vose va kuata mukuale va ka nonga na mukuale.” (Mateo 26:52) Yesu ua muesele ngecize vakua ku mu kava ka va pandele ku pangesa vitua via ndzita.

    Vandongesi va Yesu ve ku ononoka lisiko lia ku viana ku pua “vakua mavu” mu ku hona ku likovelesa mu vimpande via pulitika (Yoano 17:16) Ka ve ku luisa vipanga via masualale ni ku vindika vose va lihanguila ku kovela mu vusualale.

3.   Cilemo ku vakuetu. Yesu ua sikile va ndongesi veni va “lileme umo na mukuavo” (Yoano 13:34, 35) Mu ku lingamo, ve ku puile civunga ca vamuanaye kaha na umo uahi ha kati kavo ue ku katuile ndzita mu ku luisa muanaye.​—1 Yoano 3:10-12.

4.   Lungano lua Vakua Kilistu va ku livanga. Limo livulu li va tumbula Enciclopédia da Religião e da Guerra ngualio: “Vakua ku kava Yesu va ku livanga va vianene ku kovela mu vusualale ni ku lua ndzita,” va tantekeyele ngecize vilinga viaco “ka via litombuele na lisiko lia tumbuile Yesu lia ku muesa cilemo ku umo na mukuavo na ku vitozi.” Umo mulongisi ue ku longesa via vulombelo mu Alemanha ua lizina Peter Meinhold, ua handekele ku tuala ha vandongisi va Yesu, ngueni: “Ku pua Mukua Kilistu kaha na ku pua lisualale ha ntsimbu imo lika ka via litombuele.”

 Vakaleho va Yehova ve ku kuasa vantu ku vihela ku va kala, kaha ka va hasa ku linga viuma vie ku koka visoti mu cifuti. Tue ku singimika vanguvulu ku omo lia masiko a Mbimbiliya a na hatako:

•   “Vantu vose, muntu ku muntu vononoke ku vakua ku suana.”​—Loma 13:1.

•   “Hienu Sezale viuma via Sezale; na Njambi viuma via Njambi.”​—Mateo 22:21.

 Ngeci mukemuo, tue ku ononoka masiko, tue ku fueta lisimu kaha tue ku linga vi i tonda nguvulu nga va viukisa viuma via mbunga.