Houe, Vakaleho va Yehova ka ve ku fuetesa cimo ku likumi; cipanga cetu ve ku ci fuetela na milambu ya vuana ya vantu ka ve ku litumbula ha mazina. Vika ca lomboloka ku hana cimo ku likumi? Kaha omo lia vika Vakaleho va Yehova ka ve ku ci linga?

Lisiko lia ku hana cimo ku likumi, lia puile mutamba ua Masiko a hele Njambi ku vaIsaleli va ku laza. Vunoni Mbimbiliya ya muesa ngecize eli lisiko liaco—“Hamo na lisiko lia cimo ku likumi”—ka lia pandamene ku Vakua Kilistu.— VaHevelu 7:5, 18; Kolose 2:13, 14.

Mu cihela ca ku fueta cimo, Vakaleho va Yehova ve ku tambuluisa lungano lua Vakua Kilistu va katete kaha ve ku kuatesa vipanga viavo mu vinjila vivali: Mu ku ambulula na ku longesa ca ku hona ku fueta na mu ku hana milambu ya vuana.

Tue ku kava cimamuna ca mu Mbimbiliya ku Vakua Kilistu nguaco: “Muntu ku muntu a hane ngue omo na zange ku mutima ueni, kati ngue na ntsindiye, cipue ngue ca mu pande: muomu Njambi a ku lema uze a ku hana na ndzolela.”—2 Kolintu 9:7.