Cimo ku tondesesa ca muesele ngecize ha kati ka vakuendze na vahumbe 100 va ku pua 80 ve ku vundila. Vunoni mutamba ueyi numelu vakevo lika ve ku vundila matangua ose. Kaha cingi cavo ve ku lihula nguavo: ‘Vuno ku vundila ce ku tu lembamesa lika mutima ni ca kala na vukuasi vukuavo?’

•  Ku vundila ca pua vika?

•  Vuno Njambi ue ku ivua vivundilo ni?

•  Vika nji hasa ku vundila?

•  Vi ve ku handeka vakuenu

 Ku vundila ca pua njila ya ku handekelamo na Sakatanga ua viose. Aci singaniekenuho, Yehova ua hiana vantu mu vifua viose, vunoni “kesi ku laako netu vose.” (Vilinga 17:27) Kaha mu Mbimbiliya mua kala eci cilanio: “Suenenu kuli Njambi, kaha ikeye a ka suena kuli enu.”—Tiango 4:8.

 Vati mu hasa ku suena kuli Njambi?

•   Njila ya ku livanga, ku vundila. Ikeyo njila ya ku handekelamo na Njambi.

•   Njila ya mu civali ya pua ku tanda Mbimbiliya. Ikeyo njila ye ku pangesa Njambi mu ku “handeka” nenu.

 Eci ku simutuila na Njambi, ku hitila mu ku vundila na ku tanda Mbimbiliya, ci ka mi kuasa ku likuata vusamba vua kama neni.

 “Ku handeka na Yehova, uze ua pua Mukua ku Hiana Vose, ca pua civezikiso ca ku hiana.”—Jeremy.

 “Ku vundila kuli Yehova na mutima uose ce ku nji lingisa ku suena mu hiehi neni.”—Miranda.

 Ambe nga mua tsiliela muli Njambi kaha mue ku vundila kuli ikeye, ci hasa ku pua ca cikalu ku tava ngecize ue ku halakana mpundu. Vunoni Mbimbiliya ya tumbula Yehova nguayo “Mukua ku ivua vivundilo.” (Visamo 65:2) Kaha ya mi lania nguayo “Mbilenu cisoti cenu cose kuli ikeye.” Omo lia vika? “Muomu ikeye a mi lela.”—1 Petulu 5:7.

 Aci singaniekenu hali evi: Vuno mue ku lihakela kapandi ka ku uana-uana ntsimbu ya ku simutuila na vavusamba vuenu ni? Mu hasa ku lingamo na Njambi. Puenu na ku vundila kuli ikeye ku sua kumo, na ku tumbula mpundu lizina lieni, Yehova. (Visamo 86:5-7; 88:9) Kaha Mbimbiliya ya mi lania nguayo: “Vundilenu na ku huima cahi.”—1 Tesalonika 5:17.

 “Ku vundila ca pua ku simutuila cange na Tata ua muilu, muze mu nji hasa ku mu lekela viose vili ku mutima uange.”—Moises.

 “Nje ku handeka na Yehova mu ku lova, ngue nji handeka na vanana ni na kavusamba ua kama.”—Karen.

 Mbimbiliya nguayo: “Mu viose mu ku vundila na ku lambelela hamo na ku santsela, tumbulenu vizango vienu kuli Njambi.”—Filipu 4:6.

 Vuno eci ca lomboloka ngecize citava mu mu leke visoti vienu? Eyo! Kaha Mbimbiliya nguayo: “Mbila citeli cove hali Yehova, kaha ikeye a ka ku kolesa.”—Visamo 55:22.

 Vunoni omo mu vundila kuli Njambi, ka mua pandele ku handeka lika via visoti vienu. Umo muana-mpuevo ua lizina Chantelle ngueni: “Vusamba vua ku vundila lika vukuasi ka vue ku kuata vuino. Vusamba na Yehova navuo mukemuo mu vua fua. Mu ku mona cange, ku santsela cikeco ca pande ku tuama ku lutue. Kaha kua kala via vingi vi tua pande ku santsela Yehova.”

 Aci singaniekenu hali evi: Viuma vika via mi lingila Njambi vi mu hasa ku mu santsela? Setekenu ku singanieka ha viuma vitatu vi mu hasa ku santsela kuli Yehova mu litangua lia lelo.

 “Ambe koma kakandende ngeci mua ntemo ya cili, ka hasa ku tu lingisa tu vundile kuli Yehova mu ku mu santsela.”—Anita.

 “Singaniekenu ha cimo cuma ca ku tanga ce ku mi komouesa, ni cimo cinimbu ca mu Mbimbiliya ce ku mi kuata ku mutima, kaha santselenu Yehova.”—Brian.