Vakaleho va Yehova ve ku likungulula luvali mu simano ku vihela vi va luka nguavo Vindzivo via Vuangana. Vati vie ku enda viuano viaco, kaha vukuasi vuka mu hasa ku uana nga mu yako?

•  Vika vie ku hita mu Ndzivo ya Vuangana?

•  Vukuasi vuka mu ka uana nga mu yako?

•  Vi ve ku handeka vakuenu

 Ndzivo ya Vuangana ya pua cihela ca ku lilongesela vati Mbimbiliya i hasa ku tu kuasa mu muono ua tangua na tangua. Viuano vi hasa ku mi kuasa:

•   ku lilongesa vusunga ku tuala hali Njambi.

•   ku ivuisisa omo lia vika visoti vi li na ku tualelelaho ku livuezelela.

•   ku vueza ku vifua vienu via cili.

•    ku uana vavusamba va cili.

 Mua vi tantekeyele ni? Vihela vi ve ku likunguluila Vakaleho va Yehova va vi luka nguavo Vindzivo via Vuangana, muomu ve ku longesako cikuma via Vuangana vua Njambi.—Mateo 6:9, 10; 24:14; Luka 4:43.

 Vi mu ka lilongesako vi ka mi kuasa. Vitume via mu Mbimbiliya vi ve ku longesa ku viuano via Vakaleho va Yehova vi ka mi kuasa ku “hianga mangana.” (Visimo 4:5) Eci ca lomboloka ngecize Mbimbiliya i hasa ku mi kuasa ku linga vihangula via cili. Kaha i hasa naua ku kumbulula vihula vienu via kama, ngue mua:

•   Vutumbe vua muono vuka?

•   Vuno Njambi ikeye ue ku koka visoti ha mavu ni?

•   Vika vie ku soloka ku muntu nga na tsi?

 Aci talenu imo mitue ya vimpande vi ve ku hanako ku ku-hua ca simano:

•   Omo lia Vika tua Pande ku Tavesa Mbimbiliya i tu Tuamenene?

•   Kulihi mu Hasa ku Uana Vukuasi mu Vintsimbu via Visoti?

•   Viuma vi Vuli na ku tu Lingila Vuangana vua Njambi Lelo Lino.

 “Umo mukuetu ku sikola uezile mu ku kunguluka netu. Ua tumamene na vusoko vuetu, kaha tua kele na ku kava neni ciuano mu mikanda yetu. Mu nima ya ciuano, ua nji lekele ngueni ua lemene cikuma vikumbululo via ku liseza-seza vi va kele na ku hana vantu. Kaha naua ngueni ku igreja yavo ka kua kele mikanda ya ku lilongesa, ngue yetu.”—Brenda

 Mua vi tantekeyele ni? Ku Ndzivo ya Vuangana ka ve ku fuetesa na vimo viahi.

 Ku likata na Vakaleho ci ka mi kaniamesa. Mbimbiliya ya muesa ngecize vumo vusunga vue ku tu lingisa ku kunguluka vua pua “ku limamuna,” ni nguetu, ku likaniamesa umo na mukuavo. (VaHevelu 10:24, 25) Ku likata na vantu ve ku tuameka Njambi na vakuavo ku lutue, ce ku kaniamesa muno mu mavu a lizangamena.

 “Mu nima ya ku fuitangana cikuma, nje ku ivua vusiua na vikato, vunoni vakuetu ku Ndzivo ya Vuangana ve ku nji ovolola. Mu nje ku hiluka ku ndzivo, nje ku ivua ndzolela na ndzili ya ku ka vula litangua li na hatako.”—Elisa.

 Mua vi tantekeyele ni? Mu mavu ose mua kala vikungulukilo vi tuvakana 120.000 via Vakaleho va Yehova. Kaha ve ku likunguluila ku vihela vi tuvakana 60.000. Nkala muaka, ve ku tunga Vindzivo via Vuangana 1.500 mu ku tambuilamo ku livuezelela ca vantu. *