Veya va Kaya Muilu?
Cikumbululo ci ya Hana Mbimbiliya
Njambi ua hangula Vakua Kilistu va lutsilielo va ku puamo, linga va ka yoyele muilu, mu nima ya ku-tsa na ku sanguka cavo. (1 Petulu 1:3, 4) Kaha nga Mukua Kilistu va na mu hangula mu cifua eci, na pande ku tualelelaho ku kaniamesa lutsilielo lueni na ku kala na vilinga via ku lela, linga kati va mu tundise ha mukana ua vaze va ka tambula vusuana vuavo muilu.—Efeso 5:5; Filipu 3:12-14.
Vika va ka linga vaze va kaya muilu?
Va ka panga hamo na Yesu mu ku pua vamiangana na vasasendote mu likulukazi lia miaka. (Ku-Solola 5:9, 10; 20:6) Va ka pua “melu a aha,” ni nguetu, nguvulu ya muilu ize i ka sika “mavu a aha,” ni nguetu, vantu ha mavu. Ava vamiangana, va ka kuasa vantu ku kala na muono ua cili ngue muze mua tondele Njambi ha katete.—Isaya 65:17; 2 Petulu 3:13.
Vangahi va ka sanguka na kuya muilu?
Mbimbiliya ya muesa ngecize vantu va ku pua 144.000 vakevo va ka sanguka na ku ka yoyela muilu. (Ku-Solola 7:4) Mu cimona ca ku Ku-Solola 14:1-3, kapostolo Yoano ua muene “Muana Mpanga ha muncinda ua Siono, kaha hamo neni cihita na makumi auana a makulukazi na makulukazi auana.” Mu cimona caco, “Muana Mpanga” uemanena Yesu uze ua sangukile. (Yoano 1:29; 1 Petulu 1:19) Kaha “Muncinda ua Siono” co uemanena vukama vua Yesu na va 144.000 vaze va ka sika hamo neni muilu.—Visamo 2:6; VaHevelu 12:22.
Vaze va va “sana” na “ku hangula” linga va ka sike hamo na Kilistu mu Vuangana, va va luka nguavo “kavutanga.” (Ku-Solola 17:14; Luka 12:32) Eci ca muesa ngecize va pua va vandende mu ku va setekesa ku numelu ya vampanga vose va Yesu.—Yoano 10:16.
Visinganieka via ku henga ku tuala hali vaze va kaya muilu
Linguavo: Vakua vilinga via cili vose va kaya muilu.
Vusunga: Njambi ua kulahesa cingi ca vantu vakua vilinga via cili muono ua ya-ye ha mavu.—Visamo 37:11, 29, 34.
Yesu ua handekele ngueni: “Na umo uahi na londa muilu.” (Yoano 3:13) Na mezi aa, Yesu ua muesele ngecize vantu vakua vilinga via cili, vaze va tsile ku nima yeni, ngeci mua Avilahama, Mosesa, Yombi na Ndaviti, ka va ile muilu. (Vilinga 2:29, 34) Vunoni, va kele na lulavelelo lua ku ka sanguka na ku ka yoyela hano ha mavu.—Yombi 14:13-15.
Ku sanguka ca vaze va ka yoyela muilu va ci luka nguavo, “cisangukilo ca ku livanga.” (Ku-Solola 20:6) Eci ca muesa ngecize ku ka kala cisangukilo cikuavo. Kaha ci ka pua cisangukilo ca vaze va ka yoyela ha mavu.
Mbimbiliya ya longesa nguayo mu vu ka sika Vuangana vua Njambi, “ku tsa ka ci ka kala naua.” (Ku-Solola 21:3, 4) Eci cikulaheso noho ca ku lipuisemo hano ha mavu, muomu muilu ka mua kele ku-tsa.
Linguavo: Citava muntu ku muntu a lihanguile kuiko a ka yoyela nga muilu ni ha mavu.
Vusunga: Yehova ikeye ue ku hangula iya ha kati ka Vakua Kilistu a ka tambula “cilunguiso ca ku-sana,” ni nguetu, lulavelelo lua ku ka yoyela muilu. (Filipu 3:14) Njambi mue ku hangula kuiko a ka kala muntu, ke ku tala kue ku tonda ku ka yoyela muntu uaco.—Mateo 20:20-23.
Linguavo: Lulavelelo lua ku yoyela ha mavu lua kala na seho ya indende, ngeci ve ku lu hana kuli vaze ka va fuilile kuya muilu.
Vusunga: Njambi ua luka vaze va ka tambula muono ua ya-ye ha mavu ngueni “vantu vange” “vaze va nji na hangula” “vaze va a na vezikisa Yehova.” (Isaya 65:21-23) Kaha va ka kala na civezikiso ca ku puisamo vutumbe vua katete vua Njambi ku tuala ha vantu. Vutumbe vuka? Ku yoya miaka yose mu vutantuluke mu citungu ha mavu.—Njenisisi 1:28; Visamo 115:16; Isaya 45:18.
Linguavo: Numelu ya 144.000 i va tumbula ku Ku-Solola ya pua lika ya cimueso.
Vusunga: Vutuhu vimo vinumelu vi va tumbula ku Ku-Solola via pua via cimueso, vunoni vikuavo via pua vinumelu mpundu. Ca ku muenako ya tumbula “mazina likumi na avali a vapostolo vaze likumi na avali muana mpanga.” (Ku-Solola 21:14) Tu hilulenu vukaleho vua muesa ngecize numelu 144.000 nayo ya pua numelu mpundu.
Ku-Solola 7:4 nguayo “cihita ca makulukazi na makulukazi makumi auana na auana, va va hakele citantekeyeso [ni nguetu va tambuile vukaleho ngecize va kaya muilu.” Mu vinimbu via hata ku cinimbu eci, va tumbulako civunga ceka ca litepa neci ca katete nguavo “civunga ca kama, na umo uahi ua hasa ku va tanda.” Kaha ava vakua “civunga ca kama” navo va ka tambula vuovoke kuli Njambi. (Ku-Solola 7:9, 10) Nga 144.000 ya pua lika cimueso ca ngoco, nga ka ca tavele ku tepesa evi vivunga vivali. a
Cikuavo naua Mbimbiliya nguayo va 144.000 “va va landele ha kati ka vantu, va pue mihako ya katete.” (Ku-Solola 14:4) Lizi “mihako ya katete” ve ku lipangesa lika mu ku imanenako vimo viuma. Ngeci mukemuo, lizi liaco lia litombola vuino na vaze va lavelela ku kaya muilu, linga va ka sike mbunga ya vantu ka ci tava ku i tanda hano ha mavu.—Ku-Solola 5:10.
a Mulongisi ua Mbimbiliya Robert L. Thomas, ua sonekele ku tuala ha numelu 144.000 i va tumbula ku Ku-Solola 7:4 ngueni: “Ya pua numelu mpundu kaha va i tepesa na numelu i va tumbula ku Ku-Solola 7:9. Nga tu i tumbula nguetu ya pua ya cimueso, kaha na imo numelu ya mu livulu lia Ku-Solola yemanena mpundu numelu yahi.—Revelation 1-7: An Exegetical Commentary, lifo 474.
Halumo mu Hasa ku Lema Naua Evi
ESSENTIAL BIBLE TEACHINGS
Vika Vuangana vua Njambi?
Yesu mu ku ambulula ceni cose ua longesele via Vuangana vua Njambi ku hiana nkala cimpande. Mu vihita via miaka vandongesi veni va ambulula via ku iza ca vuangana vuaco.