Eyo. Njambi ue ku haka seho ku nkala ngamba yeni nga a vavala. Ku tuala hali umo ngamba yeni ua ku ononoka Mbimbiliya nguayo: “Yehova a mu kolesa ku muhela ua ku vavala.” (Visa. 41:3) Nga muli na ku pinda na vuvezi ka vue ku kanguka vinanga vitatu vi na hatako vi hasa ku mi kuasa:

1.   Vundilenu ngolo ya ku kolesa. Njambi a hasa ku mi hana ‘ciyulo ceni ca hiana mana ose,’ cize ci ka mi kolesa na ku tepulula ku lisosomua cenu.—Filipu 4:6, 7.

2.   Lihakelenu kapandi ka ku pua mukua ndzolela. Mbimbiliya nguavo: “Mutima ua ku santsuka ukeuo cihemba ca ku viuka; vunoni cimbembesi ca ku vatuka ci umisa vitsiha.” (Visimo 17:22) Lihakelenu kapandi ka ku zola-zola, muomu ku lingamo ka ci ka mi kuasa lika mu ntsimbu ya ikalu, vunoni ci ka kuasa naua ku cihindu cenu.

3.   Tsilielenu mu vikulaheso via Njambi. Ku lavelela viuma via cili ku lutue, ci hasa ku mi kuasa ku yoya mu ndzolela, vutuhu mue ku pinda na vuvezi ka vue ku kanguka. (Loma 12:12) Mbimbiliya ya kulahesa nguayo tangua ku ka kala ntsimbu ya ku linga na umo uahi a ka handeka ngueni: “Nji ku vavala.” (Isaya 33:24) Ku ntsimbu yaco, Njambi a ka kanguisa mavezi ose aze ka ve ku hasa vantu lelo lino. Ca ku muenako, Mbimbiliya ya kulahesa ngecize Njambi tangua a ka fumisako vusinakazi, nguayo: “Ntsitu yeni i ka viuka ku hiana ize ya kanike; a hiluka ku matangua a vukuendze vueni.”—Yombi 33:25.

 Tantekeyenu evi: Vakaleho va Yehova va tantekeya ngecize Njambi ue ku kuasa vantu nga va vavala, ngeci navo ve ku tonda vihemba nga ka va hindukile. (Mako 2:17) Vunoni, ka ve ku leka vantu ku saka cika va na pande ku kava. Muomu muntu ku muntu ua kala na mpoko ya ku lihanguila ku saka cika a tonda.