Ndzita ya Alemangendo yemanena ndzita ya ku manuisila ha kati ka vuangana vua Njambi na mavuangana a vantu. Vanguvulu na vantu vavo ve ku luisa Njambi na ku viana ku sika ceni. (Visamo 2:2) Ndzita ya Alemangendo i ka nongesa mavuangana ose a vantu.— Ndaniele 2:44.

Lizi “Alemangendo” lia soloka lumo lika mu Mbimbiliya ku Ku-Solola 16:16. Vupolofeto vuaco vua ku Ku-solola vua muesa ngecize oku ku “Cihela ci va sana mu ciHevelu Alemangendo,” “vamiangana va mavu ose,” “mu ku va kungulula ku ndzita ya litangua lia kama lia Njambi.”—Ku-Solola 16:14.

Veya va ka lua ndzita ya Alemangendo? Yesu a ka tuamenena masualale va muilu ku vula vitozi va Njambi. (Ku-Solola 19:11-16, 19-21) Ava vitozi vaco va lipandakana kumo na vose ve ku viana mpoko ya Njambi kaha ka ve ku mu singimika.

Vuno ndzita ya Alemangendo va ka i luila mpundu ku vifuti via ha kati ka Europa ni? Houe. Ndzita ya Alemangendo ka i ka hiti lika ku vifuti vimo, vunoni i ka pua ya mavu ose.—Yelemiya 25:32-34; Ezekiele 39:17-20.

Lizi Alemangendo, va li tumbula nguavo “Har–Magedon” (Mu ciHevelu Har Meghiddohnʹ), lia lomboloka “Muncinda ua Mengindo.” Mengindo ya puile imo mbonge ya mu Isaleli. Mizimbu ya ku laza ya muesa ngecize kukekuo ku va kele na ku luila ndzita, ngue imo i va soneka mu Mbimbiliya. (Vangazi 5:19, 20; 2 Vamiangana 9:27; 23:29) Vunoni Alemangendo ka ci tava ku tumbuila ku cimo cihela ca lihatele na Mengindo ya laza. Kaha ka kua kele muncinda ua kama, ua lihata na cimbongo ca Yezelele u hasa ku pua vose vaze va ka luisa Njambi. Ngeci mukemuo, Alemangendo i ka pua ndzita ya mavu ose, omo vakua vifuti va ka katuka mu ku luisa Njambi.

Vati i kenda ndzita ya Alemangendo? Mu ku linga ka tu tantekeya vati Njambi ue ku pangesa ngolo yeni, a hasa ku pangesa nkala vitua via na zange ngue mua lingile ku miaka ya ku nima, ngeci mua—ku nokesa vivue via kama, mandunduma, mema a ku sindumuka, tuhia, fofo, mihiato na misongo. (Yombi 38:22, 23; Ezekiele 38:19, 22; Havakuke 3:10, 11; Zakaliya 14:12) Vunoni vamo vitozi va Njambi va ka litsiha avo vavene, kaha va ka tantekeye mpundu ngecize Njambi ikeye ali na ku va luisa.—Ezekiele 38:21, 23; Zakaliya 14:13.

Vuno Alemangendo ika nongesa mavu ni? Houe! Ka ci ka pu ku nongesa ca mavu a tua kala, muomu fumeko mavu va tangelele ku pua limbo lia vantu. (Visamo 37:29; 96:10; Ekelesiaste 1:4) Ndzita ya Alemangendo ka i ka nongesa vantu vose , vunoni i kovola “civunga ca kama” ca vangamba va Njambi.— Ku-Solola 7:9, 14; Visamo 37:34.

Lizi “mavu” mu Mbimbiliya va li pangesa mu ku tumbula cifua ca vantu va vapi vaze va alulukila Njambi. (1 Yoano 2:15-17) Ngeci mukemuo, ndzita ya Alemangendo ika neha ku “kotoka ca mavu.”—Mateo 24:3, King James Version.

Tangua lika Alemangendo ikeza? Omo ua simutuile via “lamba ya kama” ize ika tuala ku ndzita ya Alemangendo, Yesu ua handekele ngueni: “Vunoni litangua lize, cipue ola ize, na umo uahi a li tantekeya, cipue tungelo va muilu, cipue Muana, vunoni Ise lika.” (Mateo 24:21,36) Ngeci mukemuo, Mbimbiliya ya muesa ngecize Alemangendo ika kalako mu ntsimbu ya ku-iza ca Yesu, cize ca putukile mu muaka ua 1914.—Mateo 24:37-39.