Vuno Njambi ua kala ku Vihela Vuose Ni?
Cikumbululo ci ya hana Mbimbiliya
Njambi ue ku mona viose, na ku linga viose ku cihela cose-oco ca tonda. (Visimo 15:3; VaHevelu 4:13) Vunoni Mbimbiliya ka ya longesele ngecize Njambi ua kala kuose na mu viuma viose. Vutuhu ngoco, ua kala na cimo cihela ca kala mpundu, ngeci muetu vantu.
Cifua ca Njambi: Njambi ua pua sipilitu. (Yoano 4:24) Ka tu hasa ku mu mona. (Yoano 1:18) Vimona via vingi mu Mbimbiliya via muesa ngecize Njambi ua kala mpundu na cihela. Na hamo hahi va muesa ngecize ua kala kuose.—Isaya 6: 1, 2; Ku-Solola 4:2, 3, 8.
Cihela ca kala Njambi: Njambi ua kala mu melu a sipilitu, kaha a liseza na melu a tue ku mona na meso. (1 Vamiangana 8:30) Mbimbiliya ya muesa ngecize vintsimbu vimo tungelo “vezile mu ku lisolola ku meso a Yehova,” a eci ca muesa ngecize Njambi ua kala na cihela mpundu.—Yombi 1:6.
Nga Njambi ka kele kuose, vuno ua nji haka seho ni?
Eyo! Njambi ua haka seho muntu ku muntu. Vutuhu ua kala ku cihela ka tu hasa ku mu mona. Ca ku muenako: Njambi ue ku tuala mana ku vose va tonda ku mu ya ku mutima, kaha ue ku va kuasa. (1 Vamiangana 8:39; 2 Mizimbu 16:9) Tu hilulenu vati Yehova ue ku muesa seho ku vangamba veni:
Nga mu vundila: Yehova a hasa ku ivua vivundilo vienu ha ntsimbu i mue ku vundila mpundu.—2 Mizimbu 18:31.
Nga mu li mu vusiua: “Yehova a li ha hiehi na vaze va li na mutima ua ku tsa, Kaha ohiela vaze va li na cimbembesi ca ku vavala.”—Visamo 34:18.
Nga mu tonda ku mi tuamenena: Yehova ngueni, “Nji ka ku leka na ku ku longesa njila ize i u na pande ku endela” ku hitila mu Mbimbiliya.—Visamo 32:8.
Manguavo ku tuala ha cihela ca kala Njambi
Linguavo: Njambi ua kala kuose.
Vusunga: Njambi ka kele hano ha mavu ni mu kaye kose. (1 Vamiangana 8:27) Vintangantanga na viuma vikuavo via ku tanga vie ku “ambulula vumpahu vua Njambi.” (Visamo 19:1) Vunoni, Njambi ke ku kala mu viuma via tanga, ngeci mua mukua ku sona vikupulo ke ku kala ha vikupulo vie ku sona. Vunoni, vikupulo viaco vie ku tu muesa ku tuala hali ikeye. Na vuno vene, viuma via tanga Njambi vie ku tu muesa “vifua via vieni vize vintsa ka tu hasa ku mona” ngeci mua ngolo, mana na cilemo ceni.—Loma 1:20.
Linguavo: Njambi mu ku linga a tantekeya viose na ku pua mukua ngolo yose, noho a kale kuose.
Vusunga: Njambi ua kala na ngolo yeni, sipilitu santu. Ku hitila mu sipilitu santu, Njambi a hasa ku mona na ku linga viose-ovio ku cihela kuose-oko na ntsimbu yose-oyo ca ku hona kuyako mpundu.—Visamo 139:7.
Linguavo: Visamo 139:8 ya longesa ngecize Njambi ua kala kuose mu ku handeka nguayo: “Nga nji londa muilu, mu u li: Nga nji ala muhela uange mu Vukalo vua Vatsi, tala, mu u li.”
Vusunga: Eci cinimbu, ka ca handekele via cihela ca kala Njambi mpundu. Vunoni ca pangesa lika yimo handekesi mu ku muesa ngecize Njambi a hasa ku tu kuasa ku cihela kuose-oko tu li.
a Yehova lia pua lizina lia Njambi ngue mu ya muesa Mbimbiliya.
Halumo mu Hasa ku Lema Naua Evi
VILONGESA VIA SEHO VIA MU MBIMBILIYA
Njambi kua Kala Mpundu Ni?
Hilulenu vusunga vua muesa ngecize ku tsiliela muli Njambi ka ca puile ku sevuka.
VIHULA VIA MBIMBILIYA VI VA KUMBULULA
Sipilitu Santu ya pua Vika?
Mbimbiliya ya kala na vusunga vua ku setekesa sipilitu santu na “mavoko.”
YETU VEYA
Vundilenu Cilongesa
Simutuilenu ku tuala ha vihula via mu Mbimbiliya ni lilongesenu via vingi ku tuala ha Vakaleho va Yehova.