Vuno Vuangana vua Njambi vua Kala mu Mutima Uenu Ni?
Cikumbululo ci ya hana Mbimbiliya
Houe, Vuangana vua Njambi ka vua kele mu mitima ya vantu. a Mbimbiliya ya muesa kuiko mpundu vuangana vuaco, mu ku vu tumbula nguayo “vuangana vua muilu.” (Mateo 4:17) Talenu vati Mbimbiliya ya muesa ngecize Vuangana vua Njambi vua pua nguvulu ya muilu, kaha vuli na ku sika.
Vuangana vua Njambi vua kala na vamiangana, vasuana, masiko, kaha na lisesa lia ku puisamo cizango ca Njambi muilu na ha mavu.—Mateo 6:10; Ku-Solola 5:10.
Vuangana vua Njambi vu ka sika “vantu, na miyati na malimi” a ha mavu. (Ndaniele 7:13, 14) Kaha ngolo ya Vuangana vuaco ka ye ku tunda ku vantu vayo, vunoni kuli Njambi mpundu.—Visamo 2:4-6; Isaya 9:7.
Yesu ua lekele vapostolo veni ngueni a ka sika navo mu Vuangana vua muilu na ku “tumama ha vitumamo via vuangana.”—Luka 22:28, 30.
Vuangana vua Njambi vua kala na vitozi, kaha vi ka vu nongesa.—Visamo 2:1, 2, 8, 9; 110:1, 2; 1 Kolintu 15:25, 26.
Mbimbiliya ka ya longesele ngecize Vuangana vua muilu vua kala mu mutima ua muntu ni nguetu vue ku sikila mu mitima ya vantu. Vunoni ya muesa ngecize “halakana lizi lia vuangana” ni “zimpande ezi vene zia cili zia vuangana” vi hasa ku tu kuata ku mitima kaha via pande ku tu kuata vene.—Mateo 13:19; 24:14.
Vika a lomboloka mezi “vuangana vua Njambi vu li mu kati kenu”?
Vamo vie ku va lingisa ku takania kuiko mpundu vua kala vuangana vua Njambi via pua mezi a ku Luka 17:21. Ca ku muenako, Mbimbiliya ya Luchazi nguayo “vuangana vua Njambi vu li mu kati kenu.” Linga tu ivuisise vuino eci cinimbu, tua pande ku tala vinimbu via lihata naco.
Vuangana vua Njambi ka vua kele mu mitima ya vitozi va Yesu, vaze va kuasele ku ku-tsa ceni kaha naua va puile vakua ku lihalesa
Yesu ua kele na ku handeka na vaFaliseo. VaFaliseo va puile cimo civunga ca vakuluntu va malombelo va kele na ku luisa Yesu kaha va kuasele vutumbe vua ku mu tsiha. (Mateo 12:14; Luka 17:20) Vuno citava tu handeke nguetu Vuangana vua Njambi vua kele mu mitima ya vaze vakua ku lihalesa ni? Yesu ua va lekele ngueni “mu na pu ngue vakua vuviuke ku mbandza yenu vunoni mu ntima mu na sulu na civembulu na vupi.”—Mateo 23:27, 28.
Vunoni vimo viMbimbiliya via lombolola vuino mezi a ku Luka 17:21. “Vumuene vua Njambi muli navwo akati kenu.” (Mezi yetu tua a sendeveka; Livulu lya Shukulu Kalunga) “Vuangana vua Njambi vuli ha kati kenu.” (Tradução no Novo Mundo). Kaha Vuangana vua kele “ha kati” ka vaFaliseo, muomu Yesu, uze ya hangula Njambi mu ku sika Vuangana vuaco, ua kele ha kati kavo.—Luka 1:32, 33.
a Malombelo a engi, eku longesa ngecize Vuangana vua Njambi vua kala mu kati ka muntu ni mutima vene. Ca ku muenako, ku Estados Unidos, vulombelo vua Southern Baptist Convention vua handekele nguavuo mutamba ua Vuangana vua Njambi “ue ku sika mu mutima na muono ua muntu.” Kaha naua, mu livulu lieni Yesu ua ku Nazaleta (Jesus of Nazareth) Papa Bento 16 ua handekele ngueni “Vuangana vua Njambi vue ku iza mutima ue ku halakana.”
Halumo mu Hasa ku Lema Naua Evi
ESSENTIAL BIBLE TEACHINGS
Vika Vuangana vua Njambi?
Yesu mu ku ambulula ceni cose ua longesele via Vuangana vua Njambi ku hiana nkala cimpande. Mu vihita via miaka vandongesi veni va ambulula via ku iza ca vuangana vuaco.
VUTALA VUA KANIUNGI
Iya Muangana ua Vuangana vua Njambi?
Vakua ku soneka Mbimbiliya vavengi va sonekele vimueso vi ka kuasa ku nongonona Iya a ka pua Muangana ua Vuangana vua Njambi. Mu mavu ose Yesu ikeye lika na ua puisamo viose via tondeka ku li muangana ua cili.