Houe, malombelo ose ka a lifuile. Mbimbiliya ya tumbula malombelo a engi ka e kuya Njambi ku mutima. Kaha ose citava ku a tepa mu vivunga vivali.

Civunga 1: Aze eku lemesa vanjambi va makuli

 Mbimbiliya ya luka ku lemesa vanjambi va makuli nguayo “vungoco” na “viuma ka viesi na seho.” (Yelemiya 10:3-5; 16:19, 20) Ku laza, Yehova a Njambi ua sikile vaIsaleli ngueni: “Kati u ka kale na vanjambi veka ku meso ange.” (Ezundu 20:3, 23; 23:24) Omo vaIsaleli va lemesele vanjambi veka, “vutenu vua Yehova vua [va] suamenene.”—Numelu 25:3; Levitiku 20:2; Vangazi 2:13, 14.

 Na lelo lino, Njambi kasi ue ku mona vakua ku lemesa “vimosi ve ku tumbula vinjambi” mu cifua cimo lika. (1 Kolintu 8:5, 6; Ngalata 4:8) Ngeci ua sika vaze va tonda ku mu lemesa, va likele ku likata na vakua ku lemesa vanjambi va makuli, ngueni: “Tuhukenu ha kati kavo, Lihangunukienu navo.” (2 Kolintu 6:14-17) Nga malombelo ose a lifua kaha eku tuala vantu kuli Njambi, vika honi Njambi ua hanena eli lisiko?

Civunga 2: Aze eku lemesa Njambi ua vusunga mu njila ka lemene

 Vintsimbu vimo, vaIsaleli va lemesele Njambi mu ku temunuina vilinga via vakua malombelo a makuli. Vunoni Yehova ua vianene cize ku lemesa ca ku pesula na vulombelo vua makuli. (Ezundu 32:8; Ndeutelonomi 12:2-4) Yesu ua payele vakuluntu va malombelo va ku ntsimbu ize, omo lia cifua ci va kele na ku lemeselamo Njambi. Muomu helu va limuesele ngue vakua ku lemesa mu vusunga, vunoni va likelele “ku linga vize vi na hiana via mezi a lisiko, ngue vusunga, na cikeketima, na ku tsiliela.”—Mateo 23:23.

 Na lelo lino vene, vulombelo vuze vua hitukila ha vusunga vukevuo vue ku kuasa vantu ku suena mu hiehi na Njambi. Vusunga vuaco vua kala mu Mbimbiliya. (Yoano 4:24; 17:17; 2 Timoteo 3:16, 17) Malombelo a kala na vilongesa vie ku liluisa na Mbimbiliya, eku sondolola lika vantu kuli Njambi. Vilongesa vi ve ku singanieka vantu nguavo via tunda mu Mbimbiliya ngeci mua: cilongesa ca Vanjambi Vatatu, muono ka ue ku-tsa, na ngehena ya tuhia, via tunda kuli vakua ku lemesa vanjambi va makuli. Ngeci nkala vulombelo vue ku sambeya vilongesa viaco vue ku “lemesa ngoco,” ni nguetu ku lisina ngoco, muomu vue ku sintsisa masiko a Njambi na vizila via vantu.—Mako 7:7, 8.

 Njambi ua zinda ku mu lemesa na civembulu. (Tito 1:16) Vulombelo vua vusunga vua pande ku kuasa vantu va likuate vusamba na Njambi, kati ku sula na vizila na ku lemesa ca helu-helu lika. Ca ku muenako, Mbimbiliya nguayo: “Umo nga na singanieka ngecize ikeye mukua ku lemesa, vunoni ka pokuesa lilimi lieni, vunoni onga mutima ueni, ku-lemesa ceni ni ca ngoco. Ku-lemesa ca ku lela, cize ka cesi na mazilo ku meso a Njambi ikeye Tatetu, cikeco ci na pu eci: ku hinduisa va ntuluue na vana va ntsiua ku tuyando tuavo, na ku liniunga ku mazilo ose a ha mavu.” (Tiango 1:26, 27) Mbimbiliya ya Rei Jaime ya pangesa lizi “vulombelo vua ku lela” mu ku tumbula eci ku lemesa ce kuya Njambi ku mutima.