Vuno Njambi ua Pangesele Evulusao mu Tanga Vifua via ku liseza-seza via Muono Ni?
Cikumbululo ci ya hana Mbimbiliya
Houe. Mbimbiliya ya muesa ha toma ngecize Njambi ua tangele vantu, kaha na miyati ya ku liseza-seza ya tusitu na miti. a (Njenesisi 1:12, 21, 25, 27; Ku-solola 4:11) Kaha ya handeka ngecize, vantu vose va tunda kuli Andama na Eva, visemi vetu va katete. (Njenesisi 3:20; 4:1) Mbimbiliya, ka ya hakuilile cilongesa ca muesa ngecize Njambi ua pangesele evulusao mu ku tanga vifua via ku liseza-seza muono. Vunoni, ka ya vianene vilongesa va siensia ca muesa ngecize, vimo vifua via muono vie ku lihimpula ku liya na muyati uavio. b
Vuno Njambi ua pangesele evulusao ni?
Vaze va tsiliela nguavo Njambi ua pangesele evulusao, ve ku lombolola cilongesa caco mu vingila via ku liseza-seza. Vamo va tsiliela ngecize, Njambi ue ku pangesa evulusao mu ku niunga ku lisemunuina ca viuma via muono ku liya na cihela ci via kala.
Kaha vilongesa vikuavo vi va tsiliela vakua evulusao evi nguavo:
Viuma viose via muono via tunda ku cikota cimo lika ca muono ca ku ntsenkulu.
Cimo cifua ca muono ci hasa ku aluluka ma vutuntu na ku pua cuma ceka. Cilongesa caco va ci tumbula vintsimbu vimo nguavo macro-evolusão.
Citava Njambi ikeye ue ku endesa viose evi vi lipuisemo.
Vuno evulusao ya litombola na Mbimbiliya ni?
Cilongesa ca evulusao, ce ku lingisa muzimbu ua mu Mbimbiliya ku tuala ha ku tanga ca viuma, u soloke ngue kati ua vusunga. Vunoni Yesu, ua muesele ngecize muzimbu ua ku Njenesisi ku ua kele mpundu, kaha ua pua vusunga. (Njenesisi 1:26, 27; 2:18-24; Mateo 19:4-6) Mbimbiliya nguayo Yesu tele kanda eze hano ha mavu, ua kele muilu hamo lika na Njambi, kaha ua kuasele Njambi ku tanga “viuma viose.” (Yoano 1:3) Ngeci mukemuo, cilongesa ca muesa ngecize Njambi ua pangesele evulusao mu ku tanga viuma via ku liseza-seza via muono ka ca litombuele na Mbimbiliya.
Vuno miti na tusitu vie ku aluluka nga tu vi tuala ku cihela ni?
Mbimbiliya ka ya lomboluele vukama vua ku aluluka ca viuma via ku tanga via ku muyati umo. Vunoni naua ka ya vianene ngecize, tusitu na miti ya ku liseza-seza ya tangele Njambi ye ku aluluka ni ku lisemunuina, mu ye ku kala ku vihela vieka. Vutuhu vamo ve ku mona ku aluluka caco ku pua mutamba ua evulusao, vunoni ka he ku tunda muono ueka ua uha na umo uahi.
a Lizi “muyati” li va pangesa mu Mbimbiliya, liemanena via vingi ku hiana lizi “cifua” li ve ku pangesa vakua siensia. Vintsimbu via vingi, vakua siensia ve ku handeka nguavo umo mukua muono na himpuka mu vutuntu na ku pua cuma ceka. Vunoni lizi muyati li ya pangesa Mbimbiliya, lia muesa ngecize ku aluluka caco kasi ca ku muyati umo lika.
b Cilongesa caco vintsimbu vimo ve ku ci tumbula nguavo micro-evolusão.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vuno Vakaleho va Yehova va Tsiliela Ngecize Melu na Mavu va vi Tangele mu Matangua 7 Mpundu ni?
Mua tantekeya ngecize vaze va tsiliela nguavo mavu va a tangele mu matangua 7 ve ku luisa Mbimbiliya?
YETU VEYA
Vundilenu Cilongesa
Simutuilenu ku tuala ha vihula via mu Mbimbiliya ni lilongesenu via vingi ku tuala ha Vakaleho va Yehova.