Yesu uovuele vantu va ku ononoka mua hele muono ueni ku pua nkombelo. (Mateo 20:28) Mbimbiliya ya sana Yesu nguayo: “Muovole ua vakua mavu.” (1 Yoano 4:14) Kaha ya handeka naua nguayo: “Muli ueka ka muesi vuovole: muomu muintsi lia lilu ka muesi lizina lieka, lia ku hana ha kati ka vantu, li tua pande ku ovoka nalio.”—Vilinga 4:12.

 Yesu ua ‘makelele ku-tsa’ mu lizina lia vose va mu tsiliela. (VaHevelu 2:9; Yoano 3:16) Mu nima yaco, ‘Njambi ua mu sanguile ku vatsi’ kaha Yesu ua hilukile muilu na muvila ua sipilitu. (Vilinga 3:15) Muilu, Yesu “a hasa ku ohiela, na ha ku sulumuina, vaze va ku suena kuli Njambi hali ikeye, omo ikeye a yoya ntsimbu yose mu ku va hakuila.”—VaHevelu 7:25.

Omo lia vika tua tondeka Yesu a tu hakuile?

 Muomu tu vose tu vakua vupi. (Loma 3:23) Vupi vua tu zikiliya na ku tu tepesa kuli Njambi, kaha vue ku tuala ku ku-tsa. (Loma 6:23) Ngeci Yesu ua pua “Lihako” lia vaze va tsiliela mu nkombelo yeni. (1 Yoano 2:1) Ni nguetu ue ku va handekelako kuli Njambi, linga Njambi a halakane vivundilo viavo na ku ecela vipi viavo ku hitila mu nkombelo yeni. (Mateo 1:21; Loma 8:34) Kaha Njambi ue ku tava ku lambelela ca Yesu muomu ca litombola na cizango Ceni. Njambi ua tumine Yesu ha mavu linga “vakua mavu va kovoke hali ikeye.”—Yoano 3:17.

Vuno ku tsiliela muli Yesu cikeco lika ca tondeka linga tu kovoke ni?

 Houe. Vutuhu ku tsiliela muli Yesu ca tondeka linga tu kovoke, vunoni kuli vikuavo naua. (Vilinga 16:30, 31) Mbimbiliya nguayo: “Muomu ngue muvila nga ka uesi na cimbembesi u na tsi, mukemuo na ku-tsiliela nga ka cesi na vilinga ci na tsi.” (Tiango 2:26) Linga tu kovoke tua pande:

•   Ku lilongesa via Yesu na Ise Yehova.—Yoano 17:3.

•   Ku va tsiliela.—Yoano 12:44; 14:1.

•   Ku muesa lutsilielo luetu mu ku vononoka. (Luka 6:46; 1 Yoano 2:17) Yesu ua longesele ngecize kati vose ve ku mu sana “Muangana” va kovoka, ku vanga vaze lika ve “ku linga cizango ca [Ise a] li muilu.”—Mateo 7:21.

•   Ku tualelelaho ku muesa lutsilielo cipue mu visoti. Ngeci Yesu ua muesele ha toma ngueni: “Ou a ka kolesa na ha ku kotoka a kovoka.”—Mateo 24:13.