Mutamba ua ku tondesesa ua mu JW Library u hasa ku mi kuasa ku uana lizi ni mezi mu Mbimbiliya ni mu mukanda ueka.

Kavenu evi vitume linga mu hase ku tondesesa:

• Tondesesenu mu Mbimbiliya

• Tondesesenu mu Mukanda

• Tondesesenu Cimpande

Mu hasa ku tondesesa lizi ni mezi mu Mbimbiliya i muli na ku tanda.

Omo mu tanda Mbimbiliya, niatenu ha Tondesesenu kaha sonekenu lizi li mu tonda. Omo mu soneka lizi mu ka mona akuavo a lifua nalio. Hangulenuho limo, ni niatenu ha tekla ya ku kovela nayo mu mone mezi aco.

Mu hasa ku hangula lizi. Vinimbu via Helu vie ku muesa vinimbu vi ve ku pangesa cikuma via litombola na vize vi muli na ku tonda. Vinimbu Viose via muesa vinimbu viose ngue mu via litombuela mu Mbimbiliya. Vimpande via muesa mezi a ku vuputukilo na ku mezi a ku vuezako.

Nga mu soneka mezi a engi, talenu ha cikasa Mezi a mu Tonda Mpundu linga mu mone lika mezi a litombola na vize vi mu tonda.

Mu hasa ku tonda lizi ni mezi mu mukanda u muli na ku tanda.

Nga muli na ku tala umo mukanda, niatenu ha Tondesesenu kaha putukenu ku soneka lizi li muli na ku tonda. Omo mu soneka, ku ka soloka mezi akuavo. Niatenuho limo, ni niatenu ha tekla ya ku kovela linga mu vi mone.

Nga mu soneka mezi a engi, talenu ha cikasa Mezi a mu Tonda Mpundu linga mu mone lika mezi a litombola na vize vi mu tonda.

Nga mua tupulula Estudo Perspicaz das Escrituras, mu hasa ku tondamo cimo cimpande. Mutamba ua ku tondesesa mu hasa ku u pangesa mu nkala Mbimbiliya ni livulu li mu tanda mu Aplikativu.

Niatenu ha Tondesesenu, kaha putukenu ku soneka cimpande ci mu tonda. Omo mu soneka, vimpande via mu Estudo Perspicaz das Escrituras navio vie ku soloka ha mukana. Niatenu ha cimpande linga ci sokoloke.