Toikniuaj katli tlauel tiinmechikneliaj:

Kipia se dos mil seiscientos xiuitl, tlajtolpanextijketl Ezequiel kiitak se tlenijki kejuak ipan se temiktli: tlen kiitak eliyaya kejuak se carro tlen kiyakantiauiyaya toTeotsij. Nopa carro nelia tlauel chikauak nemiyaya, uan kema monekiyaya yas oksejko o sejkanok, amo monekiyaya moketsas yon momalakachos (Ezeq. 1:4, 9, 12, 14, 16-27).

¿Tlake kinextia tlen kiitak Ezequiel? Kinextia Jehová itlanechikol tlauel motekiuijtok ipan iluikak. ¿Uan tlake kichiua itlanechikol ipan Tlaltipaktli? Tlen mochijki ipan xiuitl 2016 kinextia Jehová nojkia kinpaleuia itekipanojkauaj tlauel ma motekiuijtokaj ipan Tlaltipaktli.

Ne estados Unidos, miakej toikniuaj katli tlatekipanouaj ipan kali Betel tlauel motekiuijtokej pampa moneki yasej ipan nopa yankuik ueyi kali Betel ne Warwick (Nueva York), o ipan sekinok kali tlen iaxka Betel. Sekinok toikniuaj ayokmo tlatekipanouaj nopaya uan kintitlantokej ipan sekinok tlanechikoli. Uan ipan sekinok altepemej, nopa betelitas tlauel tekititokej pampa kichijchiuaj, kikualchijchiuaj uan kisansejkotiliaj se keski kali Betel, o pampa nojkia kintitlantokej sejkanok. Maske amo nochi toikniuaj kikajtejtokej ininchaj, tijmatij nojkia tlauel motekiuijtokej ipan sekinok tlamantli pampa kitekipanouaj Jehová.

Katli kinyakanaj Jehová itlajtoltemakauaj tlauel yolpakij uan kinyolchikaua kiitasej ipan nochi Tlaltipaktli toikniuaj tlauel motekiuijtokej pampa kinekij kichijtiasej tlen Jehová itlanechikol kiijtoua. Tijmatij miakej toikniuaj yajtokej tlatekipanouaj kampa moneki tlajtolmoyauanij. Uan sekinok kiyekojtokej seyok tlajtoli pampa kinekij tlapaleuisej ipan tlajtolmoyaualistli o kitemolijtokej kenijkatsa uelis nojua tlauel tlajtolmoyauasej. Uan sekinok kichijtokej kampeka nojua tlauel kitekipanosej toTeotsij ipan sekinok tlamantli. Nochi Cristo itokilijkauaj kinextiaj kuali tlaneltokaj, uan katli ya ueuejtixtokej o katli mokokouaj nojkia kiampa kichiuaj. Mosentlalijtokej tlauel kitekipanosej Jehová uan kinextisej Satanás san se istlakatiketl (1 Cor. 9:24).

Uelis inmotemachisej Jehová kiita nochi tlamantli tlen inkichiuaj pampa inkinekij inkitekipanosej (Heb. 6:10). Inkichiuaj kej Abraham uan Sara. Kema Abraham kipiayaya kipano 70 xiuitl, kikajtejki ichaj ipan altepetl Ur uan yajki ininuaya ichampoyouaj ipan Canaán, se tlali tlen uejka mokauayaya. Nopaya mochantijtinenki ipan yoyonkali se cien xiuitl, uan nopaya mijki. ¡Ya uan isiua kinextijkej nelia kineltokayayaj toTeotsij ika  nochi ininyolo! (Gén. 11:31; Hech 7:2, 3).

Kualtiaskia tikitasej tlaj nojkia tijchiuaj kej inijuantij. Nochi katli kichiuaj kampeka amo kitlauelkauasej Jehová ipan itlamia tonali, kinextiaj kichiuaj tlen Jesús tlanauatik. Ya kiijtok: “Uajka, xiakaj, uan xijchiuakaj ma elikaj notokilijkauaj maseualmej tlen nochi altepemej, xikinatsonpoliuiltikaj ika noTata itoka uan ika notoka uan ika noTata itonal” (Mat. 28:19, TNM).

Kema kiijtok “xiakaj”, Jesús kinekiyaya kiijtos monekiyaya tlauel timotekiuijtosej. ¡Uan tlauel tiyolpakij kema tikitaj nochi tlen kichijkej Cristo itokilijkauaj se xiuijtlaya! Nopa kinextia Jehová kiteochiua nochi tekitl tlen mochiua kema momoyaua nopa kuali tlamachtili tlen iTlanauatijkayo, uan techpaleuia nojua ma tijchijtokaj nopa tekitl (Mar. 13:10).

Miakej maseualmej pejtokej kitekipanouaj Jehová. Se xiuijtlaya itstoyaj 8,340,847 tlajtolmoyauanij uan sejse metstli kinmachtijkej ika Biblia 10,115,264 maseualmej. Nopa kinextia Jehová itlanechikol tlauel motekiuijtok uan kichiua miak tekitl, ¡uan inmojuantij nojkia! Jehová nojua kinkaua maseualmej ma momanauikaj, yeka nojua xijchijtokaj ni tekitl ipan ni tonali.

¡Tlauel kuali tlen techilnamikilia nopa texto tlen xiuitl 2017! Kiijtoua: “Ximotemachi ipan Jehová uan xijchiua tlen kuali” (Sal. 37:3, TNM). Tlaj tijchiuasej tlen kiijtoua ni texto uan tijchiuasej tlen kuali kema tijtekipanosej Jehová, uajka tijnextisej nelia timotemachiaj ipan ya. Nochipa ma tikilnamiktokaj amo tiitstokej toselti. Jesús kiijtok: “¡Xikitakaj!, mojmostla niitstos inmouaya uan nojkia kema tlamis nochi tlamantli tlen amo kuali” (Mat. 28:20, TNM). Ya nochipa kichiuas tlen kitenkajtok.

Ma tikilnamiktokaj Jehová nochipa kiteochiuas nopa tekitl tlen tijchiuasej kema tijtekipanosej. Tlaj tijchiuasej miak o pilkentsi, Jehová tlauel kipatiitas tlaj tijmakaj nochi tlen tiuelij uan tijchiuaj ika nochi toyolo. Kema kiampa tijchiuaj, ya tlauel yolpaki (2 Cor. 9:6, 7). Yeka, nochipa ma timomaijtokaj, ma timomachtijtokaj Biblia uan ma titlajtolmoyajtokaj ika nochi toyolo. Kiampa nojua kuali timouampojchijtiasej iuaya Jehová.

Satanás “kimati axpoliui miak tonali para toTeko kitlajtolsenkauas”, yeka kitemolia kenijkatsa kichiuas ayokmo ma tijtekipanokaj toTeotsij uan ma tijtlauelkauakaj (Apoc. [Rev.] 12:12). Tlaj nochipa tiitstosej inechka Jehová, Satanás amo uelis techiyokatlalis tlen ya (Sal. 16:8). Amo kema xikilkauakaj tojuantij tlauel tiinmechikneliaj uan tiinmechtlaskamatiliaj pampa intechpaleuiaj ma tijmokuitlauikaj nochi tlen Jehová iaxka.

Inmoikniuaj,

Katli kinyakanaj Jehová itlajtoltemakauaj