¿Tlake nechpaleuis ayokmo nimoijitskis kampa amo kinamiki?
TLAMACHTILI 25
¿Tlake nechpaleuis ayokmo nimoijitskis kampa amo kinamiki?
“Kema nijpixtoya chikueyi xiuitl, pejki nimoijitskia kampa amo kinamiki. Teipa nijyekok toTeotsij amo kuali kiitayaya nopa tlamantli, uan yeka kema sampa nimoijitskiyaya, tlauel nimoyolkokouayaya. Nimoiljuiyaya: ‘ToTeotsij amo kema nechiknelisʼ ” (Luis).
KEMA se akajya motelpokachiua o moichpokachiua, peua tlauel kineki motekas iuaya se akajya, uan yeka miakej telpokamej uan ichpokamej peuaj moijitskiaj kampa amo kinamiki. * Sekij uelis mitsiljuisej amo kenijki tlaj tijchiuas nopa, uan amo tleno mitspanos tlaj kiampa tijchiuas. Maske kiampa moiljuiaj, amo ximoijitski kampa amo kinamiki. ¿Kenke? Xikita tlen apóstol Pablo kiijtok: “Amo ximoiljuikaj tlen axkuali. Amo xijtokilikaj tlen fiero tlen kineki inmotlakayo” (Colosenses 3:5). Kema se akajya moijitskia kampa amo kinamiki, kichiua nojua tlauel ma kineki momekatis uan amo kitlamiltia tlen kiyoltilana. Xikita tlake sekinok tlamantli kipano:
● Katli moijitskia kampa amo kinamiki peua moiljuia san ipan ya. Nojkia, san mosentlalia ipan tlen ya kiyolpakiltia.
● Amo kintlepanita sekinok pampa kinita kej ajauili, kej se tlenijki tlen ika san uelis moyolpakiltis.
● Mosentlalia san ipan tlen ya kiyolpakiltia, uan yeka amo moiljuia ipan tlen kiyolmati o tlen kiyolpakiltia isiua o iueue kema moteka iuaya.
Uajka, tlauel ipati tijnauatis motlakayo uan kiampa amo timoijitskis kampa amo kinamiki maske tlauel mitsyoltilanas (1 Tesalonicenses 4:4, 5). ¿Tlake uelis mitspaleuis timonauatis? Biblia kiijtoua moneki amo tijchiuas o tikitas tlamantli tlen mitsyololinis ximoijitski (Proverbios 5:8, 9). ¿Uan tlaj ya pejtok timoijitskia kampa amo kinamiki? Uelis maske tijchijtok kampeka ayokmo timoijitskis, nojua kiampa tijchiua. Sekij moiljuiaj san tlapik kichiuasej kampeka kikauasej moijitskisej, pampa moiljuiaj amo kema uelis itstosej kej toTeotsij kipaktia. Kiampa moiljuiyaya se telpokatl katli itoka Pedro. Ya kiijtoua: “Tlauel nimoyolkokouayaya, pampa maske nijchiuayaya kampeka, nojua nimoijitskiyaya kampa amo kinamiki. Nimoiljuiyaya yon se tlamantli ueliskia kichiuas ma nechtlapojpoljuikaj. Uan amo ueliyaya nimomaijtoua”.
Tlaj ta nojkia kiampa tijyolmati, amo ximokueso. Amo ximoiljui ayokmo tleno uelis tijchiuas. Miakej telpokamej uan katli ya uejueyij kena ueltokej kikauaj nopa tlamantli. Uan tlaj inijuantij ueltokej, ¡uajka ta nojkia tiuelis tijkauas!
¿Tlake uelis tijchiuas tlaj timoyolkokoua?
Kej tikitstokej, katli moijitskiaj kampa amo kinamiki teipa moyolkokouaj pampa kimatij amo kuali tlen kichiuaj. Kej kiijtoua 2 Corintios 7:11, mokuesouaj “keja toTeko kipaktia”. Tlaj kiampa tijyolmati, amo ximotekipacho, pampa ni uelis mitsyololinis tijchiuas kampeka ayokmo timoijitskis kampa amo kinamiki. San amo xijkaua nopa tekipacholi tlauel ma moueyili, pampa tlaj tlauel timokuesos, kichiuas ximoiljui san tlapik tijchiuas kampeka pampa timoiljuis amo kema tiuelis tijkauas (Proverbios 24:10).
Uajka, ximosentlali ipan se keski tlamantli. Kema se akajya moijitskia kampa amo kinamiki, tlauel kisokiuia itlakayo, uan nopa kichiua san ma moyoliljuijto ipan tlamantli tlen sokiyo uan ma kichiua tlamantli tlen amo kinamiki (Tito 3:3). Maske nopa tlamantli eli sokiyo, amo kiijtosneki timomekatijtok (Judas 7). Uajka, tlaj timoijitskia kampa amo kinamiki, amo ximoiljui amo kema uelis mitstlapojpoljuisej. Kinamiki nojua tijchijtos kampeka amo tijkauas ma mitstlani tlen mitsyoltilana.
Uan tlaj teipa sampa peua timoijitskia kampa amo kinamiki, amo ximoiljui san tlapik tlen tijchijtok. Xikilnamiki Proverbios 24:16, nopaya kiijtoua tlaj “se kuali tlakatl” uetsi “chikome ueltas, nochipa sampa motlananas”, uan katli “axkuajkualmej” ayokmo motlananaj maske san sempatsi uetsij. Uajka tlaj timokuapolos, amo kiijtosneki amo tijpia kuali moyolo. Kualtiaskia timoiljuis kenke sampa pejki timoijitskia kampa amo kinamiki uan kuali timoiljuis tlake mitspaleuis ayokmo kiampa tijchiuas.
Nojkia kuali ximoyoliljui kenijkatsa toTeotsij tlauel teiknelia uan tetlasojtla. David, katli kiijkuilok miak salmos, nojkia tlauel moyolkokok pampa kichijki tlen kiyoltilanayaya. Maske mokuesok, teipa kiijtok: “Keja se tetata kintlasojtla ikoneuaj, keja nopa [Jehová] kintlasojtla tlen kimakasij uan kitlepanitaj. Pampa toTeko kimati para tojuantij san tielij tlaltejpoktli” (Salmo 103:13, 14). ToTeotsij kuali kimati tojuantij timokuapolouaj, uan yeka ‘mokualtlalijtok techtlapojpoljuis’ (Salmo 86:5). Maske kikuamachilia tlen techpano, ya kineki ma tijchiuakaj kampeka uan kiampa ayokmo tijchiuasej tlen amo kuali. Ma tikitakaj se keski tlamantli tlen uelis tijchiuas uan kiampa uelis tijkauas timoijitskis kampa amo kinamiki.
Kuali xikita tlake tijmauisoua. ¿Tikita ipan películas, ipan televisión o ipan internet tlamantli tlen kichiua xijneki timoijitskis? Katli kiijkuilok se salmo kiijtok ni tlamantli kema momaijtok: “Xinechuejkatlali tlen nochi tlamantli tlen axkuali para axnikixtokas. Más kuali ajachika tinechyolchikauas para senkistok ninemis ipan moojui” (Salmo 119:37). *
Ximochiualti timoiljuis ipan seyok tlamantli. William, katli kitekipanoua toTeotsij, kiijtoua tlake uelis tijchiuas: “Kema ya tikochis, achtoui xijpoua se keski tlamachtili tlen uala ipan Biblia. Tlauel mitspaleuis tlaj kema tikochis, timoiljuijtos ipan toTeotsij uan ipan tlen kiijtoua Biblia” (Filipenses 4:8).
Xikiljui se akajya tlen mitspano. Maske uelis tlauel tipinauas, xikiljui se akajya tlen mitspano. Tlaj tijchiuas, mitspaleuis ayokmo ximoijitski kampa amo kinamiki. Kiampa kichijki se telpokatl katli itoka David. Ya kiijtoua: “Nikiljuik notata tlen nechpanoyaya. Amo kema nikilkauas tlen nechiljuik. Notata kiitak tlauel ouij nijmatki nikiljuis nokuesol, yeka ixuetskak uan nechiljuik: ‘Tlauel niyolpaki pampa tinechiljuik’. Tlen kiijtok tlauel nechyolchikajki. Yeka nimosentlalik nijchiuas kampeka nijpatlas nonemilis.
”Maske achtoui nechpouilik se keski textos tlen kichijki amo tlauel ma nimoyolkoko, teipa nechpouilik sekinok textos tlen ika nechpaleuik ma nikita kenke tlauel amo kuali tlen nijchiuayaya. Teipa nechiljuik ma nikixtlali se keski tonali uan ma nijchiua kampeka amo nimoijitskis. Kema ya panotoskia nopa tonali, sampa kamanaltiskia nouaya. Uan nechiljuik tlaj amo nikijiyouiskia uan sampa nimoijitskiskia, uajka sampa ma nikixtlali sekinok tonali uan nama ma nijchiua kampeka nikijiyouis miak tonali uan amo kej achtouia”. ¿Kenijkatsa kipaleuik David pampa kiiljuik se akajya tlen kipanoyaya? Ya kiijtoua: “Tlauel nechpaleuik, pampa nama itstoya se akajya katli kimajtoya tlen nechpanoyaya uan nechpaleuiskia ayokmo ma nijchiua nopa tlamantli”. *
¿Nelia amo tleno mitspanos tlaj timotekas iuaya seyok san pampa tijneki timoyolpakiltis?
[Tlatsintla kiijtoua]
^ Ika nopa tlajtoli “moijitskia” tijnekij tikijtosej kema se akajya kiijitskia itlakayo kampa amo kinamiki san pampa kineki moyolpakiltis. Ni amo eli sanse ika tlen kipano se telpokatl kema tlanexilia uan kiita moxolonijtok ika tlen kiski ipan ipiltlakayo o kimati kejuak kineki motekas iuaya se akajya. Nojkia, kema se ichpokatl moijitskia kampa amo kinamiki san pampa kineki moyolpakiltis amo eli sanse ika tlen kipano kema nechka esotemos o kema ya panok, pampa achtoui o teipa uelis tlauel kinekis motekas iuaya se akajya.
^ Nojua moixtoma sekinok tlamantli ipan volumen 2, tlamachtili 33.
^ Tijpantis sekinok tlamachtili ipan volumen 2, iamayo 239-241.
TEXTO TLEN MITSPALEUIS
“Uajka xicholojteua kema se tlamantli mitsyoltilana para xijchiua keja telpokamej tlen ni Tlaltipaktli [...]. Xijtokili tlen xitlauak. Xijneltoka toTeko ika nochi moyolo, uan xikinikneli [maseualmej]. Xiitsto ika kuali ika nopa tlaneltokanij tlen motemachiaj ipan toTeko ika ininyolo kuali iixpa” (2 Timoteo 2:22).
UELIS TIJCHIUAS NI
Ximomaijto ika Jehová achtoui, kema ayamo tlauel tijneki tijchiuas tlen mitsyoltilana. Xikiljui ma mitsmaka “nopa ueyi chikaualistli” uan kiampa uelis tikijiyouis (2 Corintios 4:7).
¿TIJMAJTOYA NI?
Sekij nima kichiuaj tlen inintlakayo kineki. Uan se akajya katli kuali tlalnamiktok kichiuas kampeka monauatis uan kiampa amo kichiuas tlen kiyoltilana. Uan nojua tlauel kichiuas kampeka kema amo aka kiita.
¡XIJCHIUA NI!
¿Tlake uelis nijchiuas tlaj nijneki nimoiljuijtos ipan tlamantli tlen amo sokiyo? ․․․․․
¿Tlake nijchiuas kema sampa nijnekis nimoijitskis kampa amo kinamiki? ․․․․․
¿Tlake uelis nijtlatsintokis nonana o notata tlen ni tlamantli? ․․․․․
UAN TA, ¿TLAKE TIMOILJUIA?
● ¿Kenke tlauel moneki tikilnamiktos Jehová ‘mokualtlalijtok tetlapojpoljuis’? (Salmo 86:5).
● ToTeotsij kichijki ma tijnekikaj timotekasej iuaya se akajya uan kimati nopa tlamantli tlauel techyoltilana. ¿Timoiljuia techiljuiskia ma timonauatikaj tlaj kimajtoskia amo tiueliskiaj?
[Tlajtoli katli pankisa]
“Kema ayokmo nimoijitskik kampa amo kinamiki, nijpixki notlalnamikilis tlapajpaktik iixpa Jehová, ni amo kema nijpatlaskia ika yon se tlamantli” (Sara).
[Tlaixkopinkayotl]
Tlaj tiuetsi kema timotlalojtia, timoketsa uan sampa timotlaloua. Uajka, tlaj sampa timoijitskik kampa amo kinamiki, amo kiijtosneki san tlapik nochi tlen tijchijtok
Tlen nojkia mitspaktis tikitas
PILTELPOKATSITSIJ UAN TELPOKATLAKAMEJ
Tlen telpokamej kinekij kimatisej
Telpokamej kemantika kinekij kimatisej kenijkatsa kinamiki kiitasej kema omej motekaj sansejko, tlake kinpaleuis ika ininuampoyouaj, ika inintatauaj uan ipan escuela.
