Nitlakatki ipan se altepetl tlen itoka Sajonia, tlen kiiljuiyayaj República Democrática Alemana (RDA). Ipan nochaj tlauel timoikneliyayaj uan notatauaj nechnextilijkej kenijkatsa kuali nimonejnemiltis. Ipan República Democrática Alemana, maseualmej kinekiyayaj tlanauatianij ma moaxkatikaj nochi tlamantli, yeka ipan Sajonia maseualmej amo kipatiitayayaj religión. Na nimoiljuiyaya amo itstok toTeotsij uan ipan 18 xiuitl san nijneltokak ome tlamantli: nimoiljuiyaya amo itstok toTeotsij uan nijnekiyaya tlanauatianij ma moaxkatikaj nochi.

¿Kenke nijnekiyaya tlanauatianij ma moaxkatikaj nochi? Pampa nijnekiyaya nochi maseualmej sanse ma kinitakaj. Nojkia nimoiljuiyaya monekiyayaj kuali ma kixelokaj nochi tlen onka, kiampa amo san se keskij tlapijpiaskiaj uan sekinok amo. Yeka pejki nikinpaleuia telpokamej katli nojkia kiampa moiljuiyayaj. Uan kema nijpixtoya 14 xiuitl pejki nitekiti kampa kiitayayaj kenijkatsa sampa kitekiuisej amatl. Tlanauatianij tlen Aue tlauel kinpaktik, yeka nechmakakej se regalo. Maske nojua nieliyaya nitelpokatl, nikinixmatki se keskij tlanauatianij katli tlauel kinixmatiyayaj ipan noaltepe. Nimoiljuiyaya kuali tlen nijchiuayaya uan yeka kuali niitstoskia.

Ipan xiuitl 1989 kiuelonijkej nopa tepamitl tlen Berlín, uan yeka ipan Europa del Este ayokmo kinejkej tlanauatianij ma moaxkatikaj nochi. Tlauel nimoyolkokok kema kiampa panok. Teipa nikitak kenijkatsa tekichiuanij kichijtoyaj miak tlamantli tlen amo xitlauak. Se neskayotl, katli amo kinpaleuiyayaj nopa tlanauatianij amo tlauel kinpatiitayayaj. ¿Kenke tlanauatianij kiampa kichiuayayaj tlaj inijuantij kiijtouayayaj nochi tielij sanse? ¿Eliyaya san se istlakatili tlen kiijtouayayaj? Nochi ni tlamantli kichijki tlauel ma nimokueso.

Mopatlak tlen nijnekiyaya nijchiuas, yeka nimosentlalik nitlatsotsonas uan nitlaixkopinas. Pejki nimomachtia kampa kinmachtiaj kenijkatsa tlatsotsonasej pampa nijnekiyaya nias universidad; san nijnekiyaya nitlatsotsonas uan nitlaixkopinas. Maske notatauaj nechmachtijkej kuajkuali tlamantli, teipa ayokmo kuali nimonejnemiltik. Na san nijnekiyaya nimoyolpakiltis, yeka pejki ninemi ika miakej ichpokamej. Maske nitlatsotsonayaya, nitlaixkopinayaya uan nijchiuayaya tlen na nijnekiyaya, amo niyolpakiyaya, uan tlen nikixkopinayaya kinextiyaya nimokuesoua. ¿Kenijkatsa tiitstosej teipa? ¿Kenke tiitstokej?

Nimosentlachilik kema nijmatki tlen nijnekiyaya nijmatis. Se tonali kema niitstoya escuela nimoseuik ininuaya se keskij telpokamej katli kiijtouayayaj kenijkatsa tiitstosej teipa. Nopaya itstoya Mandy,  * se Jehová itlajtoltemajka, ya nechiljuik: “Andreas, tlaj tijneki tijmatis kenke tiitstokej uan tlake panos teipa, moneki kuali timomachtis Biblia”.

Maske amo nijnekiyaya nimomachtis Biblia, kena nijnekiyaya nijkuamachilis se keski tlamantli. Mandy nechnextilik Daniel capítulo ome uan kema nijpojki nimosentlachilik. Nopa tlajtolpanextili kiijtoua itstoskiaj uejueyij tlanauatianij ipan Tlaltipaktli katli nojua pankisaj ipan ni tonali. Teipa, Mandy nechnextilik sekinok tlajtolpanextili tlen kiijtoua kenijkatsa tiitstosej teipa. Ipan nopa tonali nijmatki tlen uejkajkia nijnekiyaya nijmatis. Uan, ¿ajkia kiijkuilok nopa tlajtolpanextili? ¿Ajkia kimatiyaya tlake panoskia teipa? ¿Kinextiyaya ni tlamantli nelnelia itstok toTeotsij?

Mandy kinejki ma nikixmati toikni Horst uan isiua Angelika, inijuantij nechpaleuijkej nojua kuali ma nijkuamachili Biblia. Kema pejki nimomachtia nima nikitak san Jehová itlajtoltemakauaj kinmachtiaj sekinok kenijkatsa itoka toTeotsij uan kitekiuiaj nopa tokajyotl (Salmo 83:18; Mateo 6:9). Nojkia nijyekok Jehová kiijtojtok se tonali maseualmej uelis itstosej nochipa ipan Tlaltipaktli kema mochiuas se xochimili. Salmo 37:9 kiijtoua: “Tlen motemachiaj ipan [Jehová] kinteochiuas uan moaxkatisej nopa tlali”. Niyolpajki nijmatis Jehová kinteochiuas nochi maseualmej katli kichiuaj kampeka monejnemiltisej kej ya kipaktia.

Ouij nijmatki nijchiuas ipan nonemilis tlen Biblia kiijtoua. Tlauel nimoueyimatiyaya pampa kuali nitlatsotsonayaya uan nitlaixkopinayaya, yeka monejki nijpatlas nopa tlamantli. Nojkia ouij nijmatki kuali nimonejnemiltis. Tlauel nijtlaskamatilia Jehová pampa kipia ueyi iyolo, techkuamachilia uan kiniknelia nochi katli kichiuaj kampeka kichiuasej tlen Biblia tlamachtia.

Maske ipan 18 xiuitl nimoiljuiyaya toTeotsij amo itstok uan nijnekiyaya tlanauatianij ma moaxkatikaj nochi, Biblia nechpaleuik ma nijpatla nonemilis. Tlen nijyekok nechpaleuik nijmatis amo san tlapik tiitstokej uan kichijki ayokmo ma nimokueso kema nimoiljuiyaya ipan tlen panos teipa. Ipan xiuitl 1993 nimoatsonpoliuiltik kej se tlen Jehová itlajtoltemakauaj, uan ipan xiuitl 2000 nimosiuajtik iuaya Tabitha. Ya nojkia kitekipanouayaya toTeotsij ika miak pakilistli. Nosiua uan na tijchiuaj kampeka tikinpaleuisej sekinok ma kikuamachilikaj tlen Biblia kiijtoua. Miakej maseualmej nojkia kiniskaltijkej kej na, uan amo tlaneltokaj ipan toTeotsij uan kinekij tlanauatianij ma moaxkatikaj nochi. Tlauel niyolpaki nikinpaleuis sekinok ma kiixmatikaj Jehová.

Notatauaj amo kinpaktik kema pejki nimomachtia ininuaya Jehová itlajtoltemakauaj. Uan nama, inijuantij kiitstokej kenijkatsa tlen Biblia tlamachtia nechpaleuijtok ipan nonemilis. Tlauel niyolpaki pampa notatauaj pejtokej momachtiaj Biblia uan mosentiliaj ininuaya Jehová itlajtoltemakauaj.

Tabitha uan na tlauel tiyolpakij pampa tijchiuaj kampeka tijchiuasej tlen Biblia kiniljuia katli mosenkajtokej, kej amo tikixpanosej tosiua o toueue, nopa techpaleuijtok nojua kuali ma tiitstokaj (Hebreos 13:4).

Nama ayokmo nechtekipachoua tlen panos teipa uan tlen nijchiuas ipan nonemilis. Nochi Jehová itlajtoltemakauaj elij kej nochampoyouaj, nochi sansejko tiitstokej uan ika tlaseuilistli. Nochipa nijnekiyaya sanse ma techitakaj uan ipan Jehová itlanechikol kiampa eli.