¿Nojkia mitspano kej nikaj kiijtouaj? Uelis nojkia mitstsakuilik se tlamantli kema tijnekiyaya tijpouas Biblia. Miakej maseualmej nojkia amo kinpaktia kipouasej Biblia. ¿Nojua kiampa timoiljuiskia tlaj tijmatiskia mitspaleuis tiyolpakis uan kuali tijyolmatis? ¿Tijpouaskia Biblia tlaj tijmatiskia onka se keski tlamantli tlen kichiuas ma mitspakti? ¿Tijnekiskia tikitas se kentsi kenijkatsa Biblia uelis mitspaleuis?

Xikita tlen kiijtouaj se keskij katli pejkej kipouaj Biblia uan kenijkatsa kinpaleuijtok pampa kiampa kichijtokej.

Ezekiel, katli kipia kipano 20 xiuitl, kiijtoua: “Achtouia nechpanoyaya kej se akajya katli kiitskia se ojtli uan amo kimati kanke yaui, kema pejki nijpoua Biblia ayokmo kiampa nechpanok. Mojmostla nikita kenijkatsa nechpaleuia tlen nechtlajtolmaka”.

Frieda, katli kipia kipano 20 xiuitl, kiijtoua: “Achtouia nochipa nikualaniyaya. Nama pampa nijpoua Biblia, nechpaleuia ayokmo nima nikualanis. Yeka, kuali nimouampojchijtok ininuaya sekinok”.

Se siuatl katli itoka Eunice uan kipia kipano 50 xiuitl, kiijtoua: “Nechpaleuijtok nijpatlas ipan nonemilis se keski tlamantli tlen amo tlauel nechpaleuiyaya”.

Tlaj tijpouas Biblia mitspaleuis nelnelia tiyolpakis, kej kinpanok Ezekiel, Frieda, Eunice uan sekinok maseualmej (Isaías 48:​17, 18). Biblia nojkia mitspaleuis: 1) kuali tijtlapejpenis tlen tijchiuas, 2) tikinpias kuali mouampoyouaj, 3) amo tlauel timotetsopas uan 4) tijyekos tlen melauak tlen toTeotsij, ya nopa tlen tlauel ipati. Tlen Biblia tetlajtolmaka uala tlen toTeotsij, yeka nochipa techpaleuis tlaj tijchiuaj tlen technauatia. Ya nochipa kuali tetlajtolmaka.

San moneki xijpeualti tijpouas Biblia. Ipan sekinok tlamachtili tijpantis tlen mitspaleuis tijpeualtis tijpouas Biblia uan tlake uelis tijchiuas uan kiampa mitspaktis.