Nochi katli intlajtolmoyauaj:

Ximoiljui tielij se tlen nopa apóstoles uan tiitstokej ipan tepetl Olivos. Jesús monextik kampa tiitstokej, uan kema nechka kisteuas para yas iluikak, techiljuia: “Kema ichikaualis Dios ualas ipan inmojuantij, inkipiasej tetikayotl. Uan inelisej notestigos ipan Jerusalén, ipan nochi Judea uan Samaria, uan hasta kampa más uejka ipan Tlaltipaktli” (Hech. 1:8). ¿Tlake tijchijtoskiaj?

Uelis timomajmatijtoskiaj uan timotlatsintokijtoskiaj: “¿Kenijkatsa titlajtolmoyauasej ‘hasta kampa más uejka ipan Tlaltipaktli’ tlaj amo timiakej?”. Uan uelis nojkia tikilnamiktoskiaj tlen Jesús kiijtok kema nechka kimiktiskiaj, ya kiijtok: “Se tlatekipanojketl amo kipia más tlanauatili que iteko. Tlaj inijuantij nechtlaijiyouiltijtokej, nojkia inmechtlaijiyouiltisej; tlaj inijuantij kineltokatokej notlajtol, nojkia kineltokasej inmotlajtol. Pampa inelij notokilijkauaj, inijuantij inmechchiuilisej nochi ni tlamantli pampa amo kiixmatij katli nechualtitlanki” (Juan 15:20, 21). Yeka, uelis timoiljuiaj: “¿Kenijkatsa senkistok titlajtolmoyauasej tlaj kampa ueli tokualankaitakauaj techtlatsakuiltisej?”.

Ipan ni tonali, Jehová itlajtoltemakauaj nojkia moneki senkistok titlajtolmoyauasej “hasta kampa más uejka ipan Tlaltipaktli” uan tikinkamanaljuisej “maseualmej tlen nochi altepemej” (Mat. 28:19, 20). Pero, ¿kenijkatsa uelis tijchiuasej ni tekitl tlaj Biblia kiijtoua maseualmej techtlatsakuiltisej?

Amochtli Hechos kiijtoua kenijkatsa Jehová kinpaleuik apóstoles uan sekinok Cristo itokilijkauaj tlen achtoui siglo ma tlajtolmoyauakaj. Ni amatlajkuiloli techpaleuis ma timomachtikaj amochtli Hechos uan kejuak ma tikitakaj nochi tlen panok. Tlauel timosentlachilisej kema tikitasej ipan ni tonali nojkia techpano sanse kej kinpanok Cristo itokilijkauaj katli uejkajkia itstoyaj. Nojkia tikitasej kenijkatsa moyakana tlajtolmoyaualistli. Kema timomachtisej tlen panok uejkajkia uan tlen nama pano, techpaleuis nojua tlauel ma timotemachikaj Jehová nelia kuali kiyakantok itlanechikol ipan Tlaltipaktli.

Timomaijtouaj por inmojuantij uan timotemachiaj amochtli Hechos inmechpaleuis más ximotemachikaj Jehová nelia inmechtlakechis ika ichikaualis. Uan timotemachiaj inmechyololinis nojua senkistok xitlajtolmoyajtokaj “tlen iTlanauatijkayo Dios” uan kiampa inkinpaleuisej miakej maseualmej ma momanauikaj (Hech. 28:23; 1 Tim. 4:16).