1. Xikijto tlake kichiuaj maseualmej ipan iljuitl tlen Pentecostés.

 IPAN Jerusalén itstokej miakej maseualmej. a Ipan teokali nesi kisa poktli uan levitas uikaj tlen eltok ipan Salmos 113-118 (nojkia kiixmatij kej Hallel). Uan kakisti kenijkatsa monankiliaj kema uikaj. Ipan calles nemij miakej katli kampa ueli euaj, sekij ualajtokej tlen Elam, Mesopotamia, Capadocia, Ponto, Egipto uan Roma. b ¿Kenke nemij miakej? Pampa mochiua iljuitl tlen Pentecostés o “nopa iljuitl ipan ipejya pixkistli” (Núm. 28:26). Ni iljuitl mochiua sejse xiuitl kema tlamij kipixkaj cebada uan peuaj kipixkaj trigo.

 2. ¿Tlake panok ipan Pentecostés tlen xiuitl 33?

² Eli domingo a las 9 ika ijnalok kema nojua tlasesestok uan tlatepak. Ipan ni tonali tlen xiuitl 33, pano tlen tlauel ipati uan tlen nochipa kiilnamikisej. “Ipan iluikak sanima kakistik se tlamantli kej kema chikauak tlaajaka” o “keja se tlatomonilotl tlen ualajki tlen iluikak. Elki keja se ajakatl tlen tlapitski tlauel chikauak” (Hech. 2:2; Itlajtol Toteco). Tlen kakistik, kikajkej se 120 Cristo itokilijkauaj. Teipa peua nesi ipan ininatipanixko “piltlilelemektsitsij tlen moxexelojtiajki uan motlalito ipan sejse katli nopaya itstoyaj”. c Ipan nopa tlalochtli nochi Cristo itokilijkauaj peuaj kamanaltij miak tlajtoli pampa kinasik ichikaualis Dios. Kema kisaj tlen nopa kali, katli kampa ueli euaj mosentlachiliaj pampa kamanaltiyayaj “kej inijuantij” (Hech. 2:1-6).

 3. 1) ¿Kenke tlen panok ipan xiuitl 33 kichijki ma tijueyichiuakaj Jehová kej kinamiki? 2) ¿Kenijkatsa kitekiuik Pedro nopa achtoui “llaves tlen nopa Tlanauatijkayotl” ipan Pentecostés?

³ Tlen panok kinextia kenijkatsa pejkej kiueyichiuaj Jehová kej kinamiki o kenijkatsa pejkej kintlapejpeniaj katli yasej iluikak (Gál. 6:16). Pero nojkia panok sekinok tlamantli. Kema Pedro kinkamanaljuik  nopa miakej maseualmej kejuak kitekiuik se tlen nopa eyi “llaves tlen nopa Tlanauatijkayotl”. Kiampa miakej ueliskiaj kiselisej se tlateochiualistli tlen tlauel ipati (Mat. 16:18, 19). Nopa achtoui llave kinpaleuiskia judíos uan katli amo eliyayaj judíos d ma kikakikaj nopa kuali tlamachtili uan nojkia ueliskiaj yasej iluikak. Kiampa eliskiaj nopa 144 mil, katli kipaleuisej Jesús kej tlanauatianij uan sacerdotes (Apoc. 5:9, 10). Nopa llave nojkia kinpaleuiskia samariaeuanij uan teipa katli amo eliyayaj judíos. ¿Tlake techmachtia tlen panok?

 4. ¿Kenke kema timosentiliaj tijnextiaj tijchijtiualajtokej sanse kej katli monechikojkej ipan xiuitl 33?

⁴ Kej tikitakej, Cristo itokilijkauaj pejkej mosentiliaj kema se 120 kiselijkej ichikaualis Dios. Ipan nopa tonali itstoyaj ipan se cuarto tlen eltoya uejkapa (Hech. 2:1). Pero ika tiotlak ya moatsonpoliuiltijtoyaj tlauel miakej. Uan hasta nama kiampa tijchijtiualajtokej pampa sekinok nojkia monechikouaj touaya. Ipan Jehová itlanechikol itstokej tlakamej uan siuamej katli tlauel kiikneliaj Dios. Inijuantij kimoyauaj nopa “tlamachtili tlen iTlanauatijkayo Dios [...] ipan nochi Tlaltipaktli para nochi altepemej uelis kikakisej” kema ayamo kitsontlamiltiaj tlen amo kuali (Mat. 24:14).

 5. ¿Kenijkatsa tlapaleuijtok tlanechikoli ipan achtoui siglo uan ipan ni tonali?

⁵ Kema monechikoskiaj, kinpaleuiskia uan kinyolchikauaskia katli yaskiaj iluikak uan nojkia nopa “sekinok pilborregojtsitsij” (Juan 10:16). Pablo tlauel kipatiitayaya kema toikniuaj kichiuayayaj kampeka  moyolchikauasej. Yeka kiniljuik toikniuaj tlen Roma: “Nelia nijneki niinmechitas para niinmechpanoltilis se yajatili tlen Itonal Toteko temaka para initstosej intemachmej uan inkipiasej más chikaualistli ipan Toteko Dios. [...] Kema tikitaj keja ne se kuali kineltoka Toueyiteko, noja más tijpiasej chikaualistli tijneltokasej” (Rom. 1:11, 12).

6, 7. ¿Kenijkatsa toikniuaj uelij tlajtolmoyauaj ipan nochi Tlaltipaktli?

⁶ Nama nojkia tijchiuaj kej toikniuaj tlen achtoui siglo. Pero achtoui moneki tijchiuasej tlen Jesús technauatik maske eli ouij, ya kiijtok: “Xiakaj uan xikinmachtikaj maseualmej tlen nochi altepemej ma elikaj notokilijkauaj. Xikinatsonpoliuiltikaj ika itoka toTata, ika iKone uan ika ichikaualis Dios. Xikinmachtikaj ma kineltokakaj nochi tlen niinmechnauatijtok” (Mat. 28:19, 20).

⁷ Jehová kintekiuia nochi toikniuaj para ma kinmachtikaj miakej maseualmej. Maske eli ouij tikinkamanaljuisej ipan inintlajtol, Jehová itlajtoltemakauaj kichiuaj kampeka kinkamanaljuisej pampa kichijchijtokej amatlajkuiloli ipan kipano mil tlajtoli. ¿Nojkia timonechikoua, titlajtolmoyaua uan titlamachtia? Tlauel xiyolpaki kema tijchiua ni tekitl pampa amo miakej kipiaj ni tlateochiualistli.

 8. ¿Tlake tlateochiualistli tijseliaj ipan tlanechikoli?

⁸ Jehová nojkia techpaleuia ma tikinpiakaj toikniuaj katli kampa ueli euaj, pampa kineki ma tiyolpakikaj uan ma tijtekipanojtokaj maske tikixnamikisej tlaouijkayotl. Xikita tlen Pablo kintlajkuiljuilik toikniuaj hebreos: “Ma tijtemokaj kejatsa timosemakasej se ika seyok para más timoiknelisej uan tijchiuasej tlen kuali. Ximomokuitlauikaj para axinkikauasej inmosentilisej ininuaya sekinok tlaneltokanij. Amo xijchiuakaj keja sekinok tlen ayok mosentiliaj. Kinamiki ximosentilikaj uan ximosemakakaj achi más ama pampa ya inkiitaj monechkauia para sampa ualas  Jesucristo” (Heb. 10:24, 25). Kej tikitaj, kema sansejko timoyolchikauaj, eli se ueyi tlateochiualistli tlen Jehová techmakatok ipan tlanechikoli. Yeka nochipa xikintemo toikniuaj uan xia tlanechikoli.

9, 10. ¿Tlake kichiuaj se keskij toikniuaj pampa kinekij kinmachtisej sekinok ika inintlajtol?

⁹ ¡Ximoiljui kenijkatsa tlauel yolpajkej judíos uan katli amo eliyayaj! Uelis ipan nopa tonali, miakej kitekiuiyayaj se tlajtoli tlen ika ueliyayaj mokuamachiliaj, uelis griego o hebreo. Pero kema kinasik ichikaualis Dios, “kinkakiyayaj sejse itokilijka Jesús kamanaltiyaya kej inijuantij” uan kinkuamachiliyayaj (Hech. 2:6). Yeka kema maseualmej kikajkej nopa kuali tlamachtili, asik ipan ininyolo. Maske ipan ni tonali ichikaualis Dios ayokmo kichiua sanima ma tikamanaltikaj sekinok tlajtoli, kena ueli tikinmachtiaj maseualmej ika inintlajtol. ¿Kenijkatsa tijchiuaj? Sekij mosentlaliaj kiyekosej sekinok tlajtoli pampa kinekij tlapaleuisej ipan seyok tlanechikoli o kinekij yasej ipan seyok altepetl. Yeka maseualmej mosentlachiliaj kema kinitaj toikniuaj kichiuaj kampeka momachtisej inintlajtol.

¹⁰ Kiampa kipanok Christine, katli momachtik tlajtoli gujaratí ininuaya sekinok chikomej toikniuaj. Kema kipantik se siuatl katli iuaya tekitiyaya, kitlajpalok ika itlajtol. Nopa ichpokatl mosentlachilik uan kitlatsintokik kenke momachtiyaya gujaratí pampa tlauel ouij. Christine uelki kimachtia, yeka nopa ichpokatl kiijtok: “Tlen intlamachtiaj eli tlauel ipati”.

11. ¿Tlake uelis tijchiuasej tlaj tijnekij tikinmachtisej sekinok ika inintlajtol?

¹¹ Maske amo nochi tiuelij tijyekouaj seyok tlajtoli, kena uelis  tikinmachtisej miakej ika inintlajtol. ¿Kenijkatsa uelis tijchiuasej? Uelis tijtekiuisej JW Language^®. Ika ni aplicación uelis timomachtisej titetlajpalosej ipan se tlajtoli tlen motekiuia kampa tiitstokej. Nojkia uelis tikitasej tlake tikiniljuisej maseualmej para ma kinekikaj momachtisej. Uelis tikiniljuisej ma kiitakaj tlen eltok ipan jw.org, o uelis tikinnextilisej video o amatlajkuiloli ika inintlajtol. Ma tijchiuakaj kampeka tijtekiuisej tlen Jehová itlanechikol techmakatok. Tlaj kiampa tijchiuasej, nojkia tlauel tiyolpakisej kej toikniuaj tlen achtoui siglo.

12. 1) ¿Tlake kiijtojtoya teokamanalojketl Joel panoskia ipan Pentecostés? 2) ¿Kenke monekiyaya moaxitis ni tlajtolpanextili ipan achtoui siglo?

¹² Hechos kiijtoua “Pedro moketski” uan kinkamanaljuik nochi katli itstoyaj ipan nopa iljuitl (Hech. 2:14). Kiijtok Jesús itokilijkauaj kamanaltiyayaj ipan sekinok tlajtoli pampa Dios kichiuayaya ma moaxiti tlen kiijtok teokamanalojketl Joel. Ya kiijkuilojtoya: “Uan teipa nijtitlanis Notonal ipan nochi tlakamej” (Joel 2:28). Monekiyaya moaxitis ni tlajtolpanextili ipan achtoui siglo. Kema Jesús ayamo tlakuepiliyaya iluikak, kiijtok: “Nijtlajtlanis noTata uan ya inmechmakas seyok tlapaleuijketl”. Uan ya kiniljuik nopa tlapaleuijketl eli: “Ichikaualis Dios” (Juan 14:16, 17).

13, 14. ¿Tlake kichijki Pedro pampa kinejki ma asi ipan ininyolo maseualmej tlen kiniljuik, uan kenijkatsa uelis tijchiuasej kej ya?

¹³ Kema Pedro nechka tlamiskia kamanalti, ya kiijtok: “Nochi israeleuanij kuali ma kimatikaj para ni Jesús, katli inmojuantij inkimiktijkej ipan se kuauitl, Dios kichijki ma eli toTeko uan nojkia Cristo” (Hech. 2:36). Maske miakej katli tlakaktoyaj amo kiitakej kema kimiktijkej Jesús, Pedro kejuak nojkia kintlajtlakoltik pampa eliyayaj judíos. Maske Pedro kiampa kinkamanaljuik, kichijki ika tlatlepanitakayotl pampa kinekiyaya  ma asi ipan ininyolo. Kinekiyaya ma kimatikaj nojua ueliskiaj momanauisej tlaj moyolkuepaskiaj. Nopa maseualmej amo kualankej, inijuantij “tlauel moyolkokojkej” uan tlatsintokakej: “¿Tlake moneki tijchiuasej?”. Kej kamanaltik Pedro, kinpaleuik ma kipatlakaj inintlalnamikilis uan ma moyolkuepakaj (Hech. 2:37).

¹⁴ Tojuantij nojkia uelis tijchiuasej kej Pedro tlaj tijnekij ma asi ipan ininyolo maseualmej tlen tikinmachtiaj. Kema titlajtolmoyauaj amo ma tikinixkoiljuikaj maseualmej tlen amo kuali kichiuaj uan tlen moiljuiaj. Moneki san timosentlalisej ipan tlen kuali kichiuaj, kiampa uelis tikinpaleuisej ma kikuamachilikaj tlen Biblia kiijtoua. Tlaj tikamanaltij ika tlatlepanitakayotl sanse kej kichijki Pedro, katli kipiaj kuali ininyolo kinekisej momachtisej.

15. 1) ¿Tlake kiniljuik Pedro katli amo eliyayaj judíos uan katli kena, uan tlake kichijkej? 2) ¿Kenke moatsonpoliuiltijkej nopa 3 mil maseualmej?

¹⁵ Ipan ni tonali, Pedro kiniljuik katli amo eliyayaj judíos uan katli kena ma kichiuakaj ni tlamantli: “Ximoyolkuepakaj, uan sejse tlen inmojuantij ma moatsonpoliuilti” (Hech. 2:38). Yeka moatsonpoliuiltijkej se 3 mil maseualmej, uelis ipan akomoli tlen eltoya nechka Jerusalén. e ¿Kiampa kichijkej pampa amo kimatiyayaj tlake kichiuasej? Ika tlen panok, ¿kiijtosneki moneki moatsonpoliuiltisej katli tikinmachtiaj uan ininkoneuaj toikniuaj maske ayamo kuali tlaneltokaj? Amo. Nochi katli moatsonpoliuiltijkej, kuali momachtijtoyaj iTlajkuilol Dios pampa achtouia Jehová kintlapejpenijtoya kejuak ialtepe. Nojkia  tlauel kuali tlaneltokayayaj, yeka yajtoyaj hasta Jerusalén. Inijuantij san monekiyaya kikuamachilisej kenijkatsa Jesús kichiuaskia ma moaxiti tlen Jehová mosentlalijtok. Kema kikuamachilijkej ni tlamantli, moatsonpoliuiltijkej uan mochijkej Cristo itokilijkauaj, uan ni kinpaleuik nojua kuali ma kitekipanokaj Jehová.

16. ¿Kenijkatsa kinextijkej toikniuaj tlen achtoui siglo kinpaktiyaya temakasej tlen kipiayayaj?

¹⁶ Jehová tlauel kinteochiuayaya nochi katli itstoyaj ipan nopa iljuitl. “Nochi katli peuayayaj tlaneltokaj itstoyaj sansejko uan momajmakayayaj nochi tlen kipiayayaj, kinamakayayaj inintlal uan tlen kipixtoyaj, uan nopa tomij tlen kisentiliyayaj kinmakayayaj katli kinpolouayaya” (Hech. 2:44, 45). f Tlaj nojkia titeikneliaj uan titemakaj tlen tijpiaj, tlauel titlapaleuisej.

17. ¿Tlake moneki kichiuas katli kineki moatsonpoliuiltis?

¹⁷ Katli kineki kimaktilis Jehová inemilis, moneki achtoui: 1) kiyekos tlen Biblia tlamachtia (Juan 17:3). 2) Kuali tlaneltokas uan moyolkuepas ika tlen amo kuali kichijki, kinextis nelia kiyolkokoua tlen kichijki (Hech. 3:19). Uan, 3) kipatlas inemilis uan peuas monejnemiltis kej se Jehová itekipanojka (Rom. 12:2; Efes. 4:23, 24). Kema ya kichijki ni tlamantli, uelis kichiuas se tlamaijtoli uan kimaktilis Jehová inemilis uan moatsonpoliuiltis (Mat. 16:24; 1 Ped. 3:21).

18. ¿Tlake tlateochiualistli kiselia katli moatsonpoliuiltia?

¹⁸ Uan ta, ¿ya tijmaktilik Jehová monemilis uan timoatsonpoliuiltik? Ximotemachi ya mitsmakas ichikaualis sanse kej kichijki ika itekipanojkauaj tlen achtoui siglo, kiampa senkistok titlajtolmoyauas uan tijchiuas ipakilis. ¡Eli se ueyi tlateochiualistli kema tijtekipanouaj!