Nochi katli kiikneliaj Jehová:

Jesús kiijtok: “Inkimatisej tlen melauak, uan nopa tlen melauak inmechtojtomas” (Juan 8:32). ¡Tlauel techyolchikaua ni tlajtoli! Maske ipan “itlamia tonali” tlauel tekajkayauaj, uelis tijmatisej tlen melauak (2 Timoteo 3:1). ¿Tikilnamiki kema pejki timomachtia tlen melauak ipan toTeotsij iTlajtol? ¡Uelis tlauel tiyolpajki!

Amo san moneki tijmajtos tlen melauak tlamachtia Biblia uan titlajtolmoyauas, nojkia moneki timonejnemiltis kej kiijtoua Biblia. Moneki tijchiuasej kampeka ma techiknelijto toTeotsij. ¿Kenijkatsa uelis tijchiuasej? Kema Jesús nechka kimiktiskiaj kiijtok: “Tlaj inkichiuasej tlen niinmechnauatia, inmokauaj ipan notlaiknelilis keja nojkia kema nijchiua tlen noTata nechnauatia, nimokaua ipan itlaiknelilis” (Juan 15:10).

ToTeotsij nochipa kiiknelik Jesús pampa nochipa kichiuayaya tlen kinauatiyaya. Tojuantij nojkia moneki tijchiuasej kej Jesús tlaj tijnekij ma techiknelijto toTeotsij, moneki timonejnemiltisej nochipa kej technauatia Biblia. Jesús nojkia kiijtok tlauel tiyolpakisej tlaj tijchiuasej tlen timomachtijtokej ipan toTeotsij iTlajtol (Juan 13:17).

Nelia tijnekij ni amochtli ma techpaleui timonejnemiltisej kej timomachtijtokej ipan Biblia, uan kej nopa ‘ma techiknelijto toTeko uan ma techmaka nopa yolistli tlen axkema tlamis’ (Judas 21).