Nelia tlauel techyolkokoua kema se touampo o se tlen tochampoyouaj kikixtiaj ipan tlanechikoli pampa tlajtlakolchijki uan amo kineki moyolkuepas. Tlaj tijneltokaj tlen Jehová tlanauatia ipan Biblia, tijnextisej nelia tikikneliaj pampa tijneltokaj ika nochi toyolo. * Ma tikitakaj se keski tlamantli tlen ueliskia panos.

¿Kenijkatsa kinamiki tikitasej se akajya katli kikixtijtokej? Biblia kiijtoua: “Amo iuaya ximomatikaj se tlen kiijtoua para yajaya se toikni ipan Cristo pero noja tlen ueli kichiua ika seyok tlen axinamik, o tlaixtoka, o kinueyichiua tlaixkopinkayomej, o kipaktia tlateuis, o moiuintia, o tlachteki. [...] Niyon amo xitlakuakaj iuaya” (1 Corintios 5:11). Uan nojkia kiijtoua: “Intla se tlakatl [...] axmokaua tlatskitok san ipan nopa tlamachtilistli tlen Cristo, [...] amo xijselikaj ipan inmokalijtik uan amo xijyolchikauakaj [o amo xijtlajpalokaj, TNM]”. Tlaj se akajya kichiuaskia, kejuak “kipaleuis ika nopa tlen axkuali kichiua” (2 Juan 9-11). Ipan La Atalaya, noviembre 15, xiuitl 1981, ipan iamayo 19 kiijtoua: “Tlaj tikinnojnotsasej san se kentsi, uelis kichiuas ma timonojnotsakaj o kuali ma timouikakaj. ¿Tijnekiskiaj ma pano nopa iuaya se akajya tlen kikixtijtokej?”. Kema kikixtiaj se akajya, ayokmo timouikaj iuaya uan ayokmo tijchiuaj iuaya tlen tijchiuaskiaj ininuaya toikniuaj.

¿Nelnelia amo kinamiki tijnojnotsasej yon se kentsi? Amo, kiampa tijnextiaj tijtlepanitaj toTeotsij uan tlen ijkuilijtok ipan Biblia. Maske kemantika ouij, nochipa tijnekij tijneltokasej Jehová pampa tlauel tikikneliaj. Nojkia tijneltokaj pampa tijmatij Jehová teiknelia, kichiua tlen xitlauak uan pampa itlanauatiljuaj techpaleuia ipan tonemilis  (Isaías 48:17; 1 Juan 5:3). Nojkia amo tijnojnotsaj katli tlajtlakolchijtok pampa ueliskia techkuapolos. Uan tlaj amo timouikaj iuaya, nochi katli tiitstokej ipan tlanechikoli kuali timonejnemiltisej uan kuali tijtekipanosej toTeotsij, kiampa maseualmej amo techijilnamikisej (1 Corintios 5:6, 7). Kema tijneltokaj ni, uelis kipaleuis katli tlajtlakolchijtok, ¿kenke? Tlaj kiitas amo tijnojnotsaj pampa tijtlepanitaj tlen kiijtojkej ueuejtlakamej, uelis kiyololinis ma moyolkuepa uan ma kineltoka tlen ueuejtlakamej kiiljuiaj. Kema kiitas ayokmo ueli kinnojnotsa katli tlauel kiniknelia, uelis motlalnamiktis pampa kiitas tlauel tlajtlakolchijtok uan kichiuas kampeka sampa kitekipanos Jehová (Lucas 15:17).

¿Tlake tijchiuasej tlaj kikixtijtokej se tlen tochampoyouaj? Kema kikixtiaj se tlen tochampoyouaj, tlauel ouij tijmatij tijneltokasej tlen Jehová technauatia. Ipan ni tlamachtili amo uelis tikitasej sejse tlamantli tlen kinamiki tijchiuasej. Yeka tikitasej san ome tlamantli:

Kema itstok ininuaya ichampoyouaj. Maske nojua uelis kinojnotsasej uan kichiuasej se keski tlamantli iuaya, amo kinamiki kichiuasej tlamantli tlen ipa momajtoyaj kichiuaj kema kitekipanouayaya toTeotsij. ¿Kenke? Pampa katli tlajtlakolchijki ayokmo kinejki kitekipanos toTeotsij uan pampa ichampoyouaj amo kinekij kiixpanosej Jehová. Yeka maske uelis itstos ininuaya kema sansejko momachtisej Biblia, amo kinamiki tlapouas o tlanankilis. Uan tlaj ayamo kiaxitia 18 xiuitl, uajka itatauaj nojua moneki kimachtisej ika Biblia (Proverbios 6:20-22; 29:17). *

Kema amo itstok ininuaya ichampoyouaj. Maske amo kinamiki kinojnotsasej yon se kentsi, kemantika uelis kichiuasej pampa monekis kisenkauasej se tlamantli ika nochi ichampoyouaj. Katli kuali kitekipanouaj Jehová, kitlepanitaj  tlen kiijtoua Biblia uan ueuejtlakamej, yeka kema amo moneki, amo kinojnotsaj uan amo itstokej iuaya. Ni kichiuaj pampa kinekij kipaleuisej ma kineltoka tlen ueuejtlakamej kitlajtolmakatokej (Hebreos 12:11). *