¿Kenke Satanás uan iajakauaj mosentlalijtokej kinkajkayauasej maseualmej? Pampa kinekij nojkia ma titlaijixnamikikaj kej inijuantij uan pampa kinekij ma tikinueyichiuakaj. Nojkia, kinekij ma tijneltokakaj tlen inijuantij kiijtouaj uan ma tijchiuakaj tlen Jehová amo kipaktia. Miak tlen nopa tlamantli eli kema maseualmej kinueyichiuaj mijkatsitsij o kiniljuichiuiliaj.

Kema miki se akajya katli tlauel tikikneliaj, tlauel titlaijiyouiaj uan amo kenijki tlaj tichokaj o tijchiuaj sekinok tlamantli tlen ika tijnextiaj timoyolkokouaj. Kema iuampo Lázaro mijki, Jesús “chokak” (Juan 11:35).

Kampa ueli ipan Tlaltipaktli momajtokej kichiuaj miak tlamantli kema miki se akajya. Miak tlen nopa tlamantli amo kiijixnamiki tlen toTeotsij tlanauatia. Maske kiampa, miakej kichiuaj nopa tlamantli pampa moiljuiaj katli miktokej nojua yoltokej uan uelij techtlachiliaj kampa tiitstokej. Kema kinixpiaj mijkatsitsij, kema miak tonali kinextiaj moyolkokojtokej uan kema kichiuaj se ueyi iljuitl kema miki se akajya, kichiuaj pampa moiljuiaj katli miktokej uelis mokualanisej ininuaya. Biblia kiijtoua katli miktokej “ayok tleno kimatij”, yeka katli kichiuaj ni tlamantli kipaleuiaj nopa istlakatili tlen Satanás kimoyajtok (Eclesiastés 9:5).

Ipan miak altepemej momajtokej kichiuaj se keski iljuitl pampa moiljuiaj mijkatsitsij kinekij ma tikinpaleuikaj uan tlaj amo kiampa tijchiuaj uelis techchiuilisej tlen amo kuali. Uan ipan sekinok altepemej, momajtokej kichijchiuaj miak tlakualistli uan temakaj tlakajkaualistli 40 tonali o se xiuitl kema se akajya miki. Kiampa kichiuaj pampa moiljuiaj nopa kinpaleuis katli miktokej ma ‘panokaj’ kampa itstokej tonaltsitsij. Uan ipan miak altepemej momajtokej kintlaliliaj mijkatsitsij tlakualistli uan tlaili.

Tlen kichiuaj ni maseualmej eli tlauel amo kuali pampa kipaleuia nopa istlakatili tlen Satanás kiijtoua tlen mijkatsitsij. ¿Kuali kiitaskia Jehová tlaj tijchiuaskiaj se tlamantli tlen Satanás uan iajakauaj tlamachtiaj? ¡Amo! (2 Corintios 6:14-18).

Katli kitekipanouaj toTeotsij katli melauak amo kichiuaj yon se tlamantli tlen ika kipaleuiaj nopa istlakatili tlen Satanás kimoyaua. Inijuantij mosentlaliaj kinpaleuisej uan kinyolchikauasej katli kena yoltokej. Kimatij kema se akajya miki san Jehová uelis kipaleuis nopa maseuali (Job 14:14, 15).

Se keskij maseualmej kinnojnotsaj katli ya miktokej o kiniljuiaj tetlajchiuianij ma kinpaleuikaj kiampa kichiuasej. Kema se akajya kiampa kichiua, kitekiuijtok tlen tetlajchiuianij kichiuaj. Nojkia kiampa pano kema curanderos kinchikauaj maseualmej, kema tetlajchiuiaj, kema kiniljuiaj sekinok tlake panos teipa uan kema maseualmej kinekij monojnotsasej ininuaya mijkatsitsij.

Biblia kiijtoua ni tlamantli tlauel amo kuali. Nopaya kiijtoua: “Axkema xijtenkauakaj se inmokone para tlakajkaualistli, niyon amo xijchiuakaj se inmokone ma pano ipan tlitl. Axkema xiakaj ika se tlen tetonalita, o tlen teiljuia tlen onkas teipa, o tlen tlamati, niyon ika se tlen tetlajchiuia. Axkema xiakaj ika se tlen teuiuichiua, niyon tlen tekiti ika magia, niyon tlen kinnojnotsa ajakamej o tlen miktokej. ToTeko Dios tlauel kinkualankaita tlen kichiuaj nochi ni tlamantli, niyon axkineki kinitas. Uan yajaya kintojtokas nopa tlakamej inmoixtla ipan nopa tlali pampa inijuantij kichiuaj nochi ni tlamantli tlen fiero” (Deuteronomio 18:​10-12).

¿Kenke Jehová kiijtoua tlauel amo kuali tlaj tijchiuasej ni tlamantli?

Pampa kineki techpaleuis. Yeka kiijtoua amo ma tijtekiuikaj tlen tetlajchiuianij kitekiuiaj. Ya tlauel teiknelia uan kitekipachoua tlen kinpano maseualmej. Uan nojkia kimati titlaijiyouisej tlaj tijtekiuisej tlen kichiuaj tetlajchiuianij.

Nilda kiampa kipanok. Ya eliyaya tetlajchiuijketl ipan Brasil. Amo kuali ajakamej tlauel kitlaijiyouiltiyayaj. Ya kiijtoua: “Nopa amo kuali ajakamej kalakiyayaj ipan notlakayo. Kemantika nitlalnamikiyaya uan kemantika amo. Yeka, nechuikakej kampa kinpajtiaj katli uiuitiaj. Nopa amo kuali ajakamej tlauel nechtlaijiyouiltijkej uan kinempolojkej notlakayo. Yeka tlauel nipajtolouayaya, nitlaiyaya uan nitlachichinayaya. Kiampa nechpanok miak xiuitl”.

Teipa, Jehová uan itlajtoltemakauaj kipaleuijkej Nilda ma momanaui tlen nopa amo kuali ajakamej. Nama tlauel kuali itstok uan yolpaki. Ya kiijtoua: “Nijnekiskia amo aka ma kitekiui yon se kentsi tlen amo kuali ajakamej kichiuaj”.