Miakej tlaijixnamijkej ipan iluikak
Kema Satanás kinojnotski Eva ika se kouatl, Eva nojkia kiijixnamijki Jehová
Nochi tonaltsitsij katli Jehová kinchijchijki eliyayaj kuajkualmej. Teipa, se iluikaejketl mochijki amo kuali. Nopa iluikaejketl eli Satanás o Diablo. Satanás kinekiyaya maseualmej ma kiueyichiuakaj ya uan amo toTeotsij Jehová. Namantsi tikitasej tlake panok.
Ipan xochimili Edén onkayaya miak kuatinij tlen temakayaya ajuiyak itlajka. Jehová kiniljuik Adán uan isiua Eva ueliskiaj kikuasej tlen ueli kuauitl itlajka. ToTeotsij kiniljuik san setsi kuauitl itlajka amo ueliskia kikuasej pampa mikiskiaj tlaj kikuaskiaj (Génesis 2:9, 16, 17).
Se tonali kema Eva itstoya iselti, se kouatl kinojnotski. Maske nesiyaya nopa kouatl kamanaltiyaya, nopa amo nelia pampa Satanás kichijki kiampa ma nesi. Satanás kiiljuik Eva tlaj kikuaskia nopa kuauitl itlajka tlauel tlalnamikiskia kej toTeotsij uan amo mikiskia. Nochi tlen kiiljuik eliyaya se istlakatili. Maske san kikajkayajki, Eva kineltokak tlen Satanás kiijtok uan kikuajki nopa kuauitl itlajka. Teipa, kimakak Adán uan ya nojkia kikuajki (Génesis 3:1-6).
Tlen tikitakej techmachtia Satanás tlaijixnamiki uan tlakajkayaua. Kiiljuik Eva amo mikiskia tlaj amo kineltokaskia toTeotsij. Nopa eliyaya san se istlakatili pampa Eva mijki uan Adán nojkia kiampa kipanok. Maske Satanás amo mijki ipan nopa tonali, teipa kena mikis pampa tlajtlakolchijki. Ipan ni tonali Satanás nojua itstok uan kinkajkayaua maseualmej. Nojua istlakati uan kineki maseualmej ma kiixpanokaj toTeotsij itlanauatiljuaj (Juan 8:44).
Sekinok iluikaeuanij katli tlaijixnamijkej
Teipa, sekinok iluikaeuanij nojkia mochijkej amo kuajkualmej. Inijuantij kinitakej nopa yejyektsitsij siuamej katli itstoyaj ipan Tlaltipaktli uan kinejkej motekasej ininuaya. Yeka, ualtemokej uan mochijkej kej tlakamej, uan mosiuajtijkej ininuaya nopa siuamej. ToTeotsij amo kinekiyaya kiampa ma kichiuakaj (Génesis 6:1, 2; Judas 6).
Iluikaeuanij ualajkej ipan Tlaltipaktli pampa kinekiyayaj momekatisej ika siuamej
Tlen kichijkej nojkia kintlaijiyouiltik maseualmej. Iluikaeuanij ininsiuajuaj kipixkej ininkoneuaj katli amo eliyayaj kej sekinok konemej. Inijuantij mochijkej tlauel uejkapantikej uan tlauel mosisiniyayaj. Teipa, ipan Tlaltipaktli nochi kichiuayayaj tlen amo kuali. Yeka Jehová kinejki kintsontlamiltis uan kichijki ma uetsi tlauel miak atl. San momanauijkej Noé uan ichampoyouaj pampa kuali monejnemiltiyayaj (Génesis 6:4, 11; 7:23).
Kema tlauel uetski atl, nopa amo kuali ajakamej sampa tlakuepilijkej iluikak. Maske amo mijkej, toTeotsij kintlatsakuiltik pampa ayokmo kinkajki ma itstokaj sansejko ininuaya sekinok iluikaeuanij. Nojkia, Jehová ayokmo kinkajki ma mochiuakaj kej tlakamej. Teipa, toTeotsij kintlajtolsenkauas uan kintsontlamiltis (2 Pedro 2:4; Judas 6).
Satanás kikixtijkej tlen iluikak
Satanás uan iajakauaj kinkixtijkej tlen iluikak
Ipan 1914, mochijki se ueyi tlauilankayotl ipan iluikak. Nopa amochtli Apocalipsis kiijtoua tlake panok: “Uan teipa onkak se tlateuijkayotl nepa ipan iluikak. Uan nopa tlayakankailuikaejketl, Miguel [Jesucristo kema ya moyolkuitoya], uan nopa iluikaeuanij [katli kuajkualmej] tlen yajaya kinyakanayaya moteuijkej iuaya nopa dragón [Satanás] uan iiluikaejkauaj [katli amo kuajkualmej] tlen mokueptoyaj ajakamej. Pero nopa dragón uan iajakauaj axkipixtoyaj chikaualistli keja iiluikaejkauaj toTeko uan ayok uelkej itstosej ipan iluikak. Uan iiluikaejkauaj toTeko kikuamajkajkej nopa dragón ininuaya nochi iajakauaj hasta ipan Tlaltipaktli. Nopa ueyi dragón, yajaya tlen itoka Axkualtlakatl o nopa Youalnenketl, uan yajaya tlen mokuepki nopa kouatl uejkajkia ipan nopa xochimili. Yajaya tlen kinkajkayaua nochi tlakamej tlen itstokej kampa ueli ipan Tlaltipaktli”.
¿Tlake panok pampa kiampa kichijki Jesús? Biblia nojua kiijtoua: “Uajka nama ma pakikaj nochi tlen itstokej iluikak”. Iluikaeuanij katli kuajkualmej tlauel yolpajkej pampa Satanás uan amo kuali ajakamej ayokmo itstoskiaj iluikak. ¿Uan tlake panoskia ipan Tlaltipaktli? Biblia kiijtoua: “Ipan Tlaltipaktli tlauel temajmati para nochi tlakamej tlen itstokej ipan tlali uan ipan ueyi atl, pampa ya asiko nopa Axkualtlakatl inmouaya. Yajaya nelia mokualankamaka pampa kimati axpoliui miak tonali para toTeko kitlajtolsenkauas” (Apocalipsis 12:7-9, 12).
Satanás uan katli kipaleuiaj kinkajkayauaj maseualmej uan kichiuaj ma pano miak tlamantli tlen amo kuali ipan Tlaltipaktli. Inijuantij kiniljuiaj amo kuali ajakamej. Nojkia tlauel mosisiniaj uan elij ikualankaitakauaj Jehová.