Tonaltsitsij amo itstoyaj yon mijkej ipan Tlaltipaktli
¡Nopa tonaltsitsij nelnelia itstokej! Itstokej tonaltsitsij katli kualmej uan katli amo kualmej. ¿Elij maseualmej katli achtouia itstoyaj ipan Tlaltipaktli uan teipa mijkej?
Amo, amo elij inijuantij. Kema se akajya miki amo yaui kampa itstokej tonaltsitsij, kej miakej moiljuiaj. ¿Kenijkatsa tijmatij nopa? Pampa Biblia ya nopa kiijtoua. Biblia eli se amochtli tlen kiijtoua tlen melauak, uan tlen techmakatok toTeotsij katli itoka Jehová. Jehová kinchijchijki maseualmej, yeka ya kuali kimati tlake kinpano katli mikij (Salmo 83:18; 2 Timoteo 3:16).
Adán kichijchijkej ika tlali uan kema mijki sampa mokuepki tlali
Biblia kiijtoua toTeotsij kichijchijki nopa achtoui tlakatl, Adán, “ika tlali” (Génesis 2:7). ToTeotsij kichijki ma itsto ipan nopa xochimili Edén. Tlaj Adán kichijtoskia tlen Jehová kinauatik, amo miktoskia uan ipan ni tonali nojua itstoskia ipan Tlaltipaktli. Kema Adán kiixpanok toTeotsij itlanauatiljuaj, toTeotsij kiiljuik “Na nijchijki motlakayo ika tlali, uan kema timikis, sampa timokuepas tlali” (Génesis 3:19).
¿Tlake kiijtosneki nopa? ¿Kanke itstoya Adán kema toTeotsij ayamo kichijchiuayaya? Amo kana itstoya. Amo eliyaya se iluikaejketl katli teipa tlakatiskia. Ya amo yoltoya. Yeka kema Jehová kiijtok “sampa timokuepas tlali”, kinejki kiijtos Adán mikiskia. Adán amo yajki kampa itstokej tonaltsitsij. Kema mijki, Adán ayokmo yoltoya. Kema se akajya miki, ayokmo itstok uan ayokmo tleno kimati.
¿Uan tlake kinpanotok sekinok maseualmej katli nojkia miktokej? ¿Nojkia ayokmo itstokej o ayokmo tleno kimatij? Biblia kinankilia nopa tlajtlanili.
“Nochi omej [maseualmej uan tlapialmej] yauij ipan iuikal lugar. Nochi omej ualajkej tlen tlaltejpoktli uan sampa mokuepasej tlaltejpoktli” (Eclesiastés 3:20).
“Tlen miktokej ayok tleno kimatij” (Eclesiastés 9:5).
“Intla teiknelijkej, tekokolijkej, kitlasomatkej se tlenijki [...] nochi ya nopa ya tlanki” (Eclesiastés 9:6).
“Ipan nopa mijkaostotl kampa [...] tias, ayok uelis tijchiuas niyon se tekitl, ayok uelis timoyoliljuis kejatsa tijchiuas se tlamantli tlen kuali. Ayok tleno tikixmatis, niyon ayok tijpias tlalnamikilistli” (Eclesiastés 9:10).
“Pampa se tonal mikisej nochi tlakamej uan mokuepasej tlali” (Salmo 146:4).
San katli yoltokej uelij kichiuaj ni tlamantli
¿Tijmati ouij tijneltokas tlen kiijtoua ni textos tlen Biblia? Tlaj kiampa tijmati, ximoiljui ni: se tlakatl tekiti uan kiampa kinpanoltia ichampoyouaj. Kema miki nopa tlakatl, ichampoyouaj tlauel tlaijiyouiaj. Kemantika isiua uan ikoneuaj amo kipiaj yon se kentsi tomij tlen ika kikouasej tlakualistli. Nojkia uelis se keskij maseualmej kintlaijiyouiltiaj ichampoyouaj. Nama ximoiljui ni: tlaj nopa tlakatl nojua itstok kampa itstokej tonaltsitsij, ¿Kenke amo kinmaka ichampoyouaj tlen ika mopanoltisej? ¿Kenke amo kinmanauia kema kintlaijiyouiltiaj? Pampa tlen kiijtoua Biblia nelia melauak. Nopa tlakatl ayokmo yoltok uan amo tleno ueli kichiua (Salmos 115:17).
Katli miktokej amo uelij kinpaleuiaj katli mayanaj yon katli kintlaijiyouiltiaj
¿Uajka kiijtosneki katli miktokej ayokmo kema sampa itstosej? Amo, amo kiijtosneki nopa. Ipan seyok tlamachtili tikitasej kema moyolkuisej katli miktokej. Maske kiampa tikijtouaj, namantsi katli miktokej amo kimatij tlake tijchiua. Inijuantij amo uelij mitsitaj, mitskakij yon mitsnojnotsasej. Yeka amo kinamiki tikinmakasis. Inijuantij amo uelij mitspaleuisej yon mitschiuilisej tlen amo kuali (Eclesiastés 9:4; Isaías 26:14).