Satanás uan amo kuali ajakamej amo nochipa kinkajkayajtosej maseualmej. Jehová ya kinkixtik tlen iluikak (Apocalipsis 12:⁠9). Uan nechka kintsontlamiltis Satanás uan amo kuali ajakamej. Kejuak ipan se temiktli tlen Jehová kinextilik, apóstol Juan kiitak “se iluikaejketl tlen temoyaya tlen iluikak ika illaves nopa ostotl tlen tlauel uejkatla hasta axkipia itsintla. Uan nojkia kipixtoya imako se ueyi teposcadena. Uan kiitskik nopa ueyi dragón, yajaya nopa kouatl tlen uejkajkia, yajaya tlen itstok nopa Youalnenketl uan nopa Axkualtlakatl. Uan kiilpik ika teposcadenas uan kitsajki para se mil xiuitl. Uan nopa iluikaejketl kikuamajkajki nopa Axkualtlakatl ipan nopa ostotl tlen tlauel uejkatla hasta axkipia itsintla. Uan kitsajki nopa ostotl uan kitlalilik se sello para axuelis kisas uan ayok uelis kinkajkayauas tlakamej ipan kampa ueli tlaltinij hasta tlamis nopa mil xiuitl” (Apocalipsis 20:​1-3). Teipa, Satanás uan amo kuali ajakamej kintsontlamiltisej uan amo kema sampa itstosej (Apocalipsis 20:10).

Nojkia kintsontlamiltisej maseualmej katli kichiuaj tlen amo kuali (Salmo 37:​9, 10; Lucas 13:⁠5).

Kema Satanás uan amo kuali ajakamej ayokmo itstosej, Jehová tlauel kinteochiuas maseualmej. Xikilnamiki katli miktokej amo tleno kimatij. Jesús kiijtok katli miktokej kejuak kochtokej, nopa kiijtosneki tlauel kochtokej uan amo tlatemikij (Juan 11:11-14). Jesús kiampa kiijtok pampa kimatiyaya se tonali nochi katli miktokej sampa moyolkuisej. Ya kiijtok: “Asis se tonali nojkia kema nochi tlakamej tlen miktokej uan tlen kintlalpachojtokej, [...] pankisasej” (Juan 5:28, 29; nojkia xikita Hechos 24:15).

Katli moyolkuisej itstosej ipan ni Tlaltipaktli. Ipan nopa tonali ayokmo tijkakisej tlaj se akajya mijki, ¡san tematiltisej ajkia inijuantij ya moyolkuikej! ¡Tlauel tiyolpakisej pampa kema moyolkuisej, tikinselisej katli tikinikneliaj!